2 Korintiyeku 8 - Mewar Alqawarang

Vu̱rti ni nu̱ Mbu Yesu shiki ku Khar wor Nggaran

¹ Nyeezaku, nga shim ku̱ zu̱n nu ɗyi nu̱ke mu̱nkir ɓu̱ Magham saki tabar ɓu̱ nu̱ mbu Yesu ku nu̱ Makidoniya tu̱ shi.

² Aa nu̱ke wa za bonyeku maɗyi ku̱me damtarku ndu̱ bonye nu̱ gwaki vaanda mban. Yang kap ndu̱ nang, tu̱ ɓong memu̱nar maɗyikandi sa wor tu̱ shi mu̱nkir ye nduki nu̱ ku̱nshe vu̱rti nu̱ shiki ku, aa nu̱ke nungndan ku.

³ Nga maita nu̱ ɗyine ji ma shi vu̱rti nang ku wa nu̱ke du̱mbu̱r ɓaanda ka ɗu̱maki, tu̱ yang vu̱r dukti du̱mbu̱r ɓaanda. Vu̱r ku ku̱me memu̱na wor wa da ye wora, nduk a nje nu̱ rannaki wor ɓa.

⁴ Wor khuɗki rem ku̱ njig mi wor ku̱ shi nda tlu̱nar shaatar nduki ɓu̱ Magham nu̱ke a mbu̱ dlar ghai Yakhudiya.

⁵ Tu̱ yang vu̱r ku tu̱ duk ɗyi nyem tamanki. Wa vu̱r ɗyin wor ye Zhinkir gwaanji gumapaali, kom tu̱ vu̱r ɗyin wor yerem, wa nu̱ Magham shimki.

⁶ Nar nang saki chem khuɗ Titus nyem za ku̱ zu̱m guma ndu̱ tlu̱nar tabar vu̱rti nu̱ke memu̱na nduki daki ye wor nang she nu tu̱k, ma nu̱ke chin nggaki san.

⁷ Tun kya guma mbe aa nu̱m, mbe maitar Masiya, mbe ɓala, mbe zu̱ndi zhire, mbe shimndi tlu̱nar ɓu̱ Magham, ndu̱ ndolar nun ka wutki yerem. Ku̱me nang chem a shim ku̱ zu̱m nu guma mbe pooni vu̱rti nu̱ memu̱na nu ka daki ye nu nang.

⁸ Nga shikya ranna nu ku̱ shi nu ɓa, nga shim ku̱ buu nga kya komkomi ɓaanu ndu̱ ɓu̱ ɓeena nduki, ku̱me nang ka wutki pooni ndolar nu̱ke tun a shiran.

⁹ Tun wa zu̱n mu̱nkir ɓu̱ Zhinerem gwaanji Yesu Masiya. Aa nu̱ke gu̱naran, tu̱ gaɓ ndu̱ ɗyinan ma nu̱ nugun ku̱me tunu. Ma ku̱ kha nu gu̱naran gume Magham nu̱ ku̱nshe nungndi ɓaran.

¹⁰ Yang wonji sawari ɓang ye nu ɗyine ɗyi nang, ka shi mbar ku̱ zu̱m nu guma ndu̱ ɗyi nun nggaki san sonyi nu̱ peetaki, ku̱me tun wa shi vu̱rti nu̱ke nduk saki nu ɓa, tun daki ye memu̱na nu.

¹¹ Nu̱ke wanangang, shi ma ɗyi nu̱ke du̱mbu̱r ɓaanu ka ɗu̱maki, tun du̱ng su̱ tlu̱nar nu̱ memu̱na nu daki ye nwang.

¹² Mbu̱ memu̱nar vu̱rtan a nje kha nu, Magham ka tu̱k mu̱ndi vu̱rti nu̱ke tun a shiran, mbu̱ tun vu̱r wa nu̱ke du̱mbu̱r ɓaanu ka ɗu̱maki. Nu̱ Magham shim ku̱ vu̱r nu ɗyi nu̱ dukki du̱mbu̱r ɓaanu ɓa.

¹³ Nyem shim ku̱ shi mi longgume ye nduki nggur chem du̱ng shipiti taɗakandi ye nu ɓa, yang ba ku̱ kha ku̱rku̱r.

¹⁴ Yang ma ku̱ shakhti tlu̱nar nang kha torop, tun ka shaataki wor leendang, nu̱ke njivanang nje kha nu. Sarchi nun mbu̱ɗki ɗyi nggur nu̱ke a nje kha wora, tu̱ shaata nu ku tu̱k. Shir wanang ka sa tu̱ aa nu̱m kha ku̱ku̱r.

¹⁵ Ba wa nu̱ Bu̱lar ɓalar ɓu̱ Magham zu̱ki za, “Njif nu̱ tabaki khang, nu̱ shi yenda khang ɓa, yang njif nu̱ tabaki koɗomma, nu̱ kata nda zum ɓa.”

Titus ndu̱ Mu̱dlen

¹⁶ Nga kuna Magham nu̱ saki nu̱ memu̱na Titus ku̱ shaata nu ba wa nang shimki shiran.

¹⁷ Nu̱ ɗu̱ she nu ku̱me chem wa khuti nda ku̱ ɗu̱ ɓa, chin nu̱ varan kashaki ɓar she nu.

¹⁸ Chem a ru̱kti nda ku̱ ɗa ɓa she nu su̱yen ndu̱ mu̱dlerem nu̱ke aa nyi tabar ɓu̱ nu̱ mbu Yesu ku a kuna nda ku̱me wopar Labar Mbarkandang.

¹⁹ Yang tu̱k, tabar ɓu̱ nu̱ mbu Yesu ku datki nda ku̱ ki yir su̱yen ndu̱ chem mbu̱ tlu̱nar mu̱nkir nu̱ke chem a shiran ma vu̱r zhaaji ye Zhinkir gwaanjang. Shir wanangang ka wut chem wa sa ye memu̱na rem ku̱ shaata mi nu.

²⁰ Chem a ɗa ku̱ nduk pu̱zerem nu̱ ɗyine ɗyi nyem shiki ndu̱ vu̱rti nu̱ nduki shiki nu̱ke memu̱na wor daki ye wor nang ɓa.

²¹ Chem a ranna vaarem ku̱ shi mi ɗyi nu̱ke Magham ka tu̱kki mu̱ndan, tu̱ nduki kasha tu̱k.

²² Chem a ru̱k mu̱dlerem ku̱ ɗa ɓa su̱yen ndu̱ wora, ku̱me chem wa maita nda, sar khang chem wa gwa ɗya njif nu̱ke a shim shaata nduki, yang wonji wa maita nu a shim shaata nu maɗyi.

²³ Mbu̱ tun wa kori, Titus ɗya njif nyem ka shiki tlu̱nar su̱yen, yang chem a tlu̱narang ku̱me tunu. Ɓeeni nyeezerem nu̱ke a su̱yen ndu̱ chin ɗya tabar ɓu̱ nu̱ mbu Yesu ku a ru̱kki wora, tlu̱nar nu̱ke a shiran kwang a vu̱r zhaaji ye Masiya.

²⁴ Wut ma ndolar ye nduki nang, ku̱me tabar ɓu̱ nu̱ mbu Yesu ku nu̱ ɗa ru̱kki wor ka tu̱k ɗyi nun shiki, tu̱ zu̱n nu̱ ɗyine makhtar nu nu̱ke chem a shiranang ɗya zhire.