2 Korintiyeku 7 - Mewar Alqawarang

¹ Nu̱ke wa shi alqawar ɗyiku nang yerem kap, nyeezaku, ku̱ shakh mi ɗyinerem ndu̱ ɗyiku nu̱ke ka saki tu̱ man vaarem ndu̱ memu̱na rem kha zopan. Bu ku̱ khar viti ɓaarem kha shakhshakh nyeedlan nu̱ sawar Magham.

Bulus wa Kasha Maitar Yesu nu̱ Korontiyeku Shiki

² Wut ma ndolar yerem ɓa. Ai, nyem sola aa nu̱m ye nu ɓa, nyem su̱bu̱r aaki ɓa, yang nyem shi batal ye aaki ɓa.

³ Nang shi ɓalar nang ma vu̱r nga zop ye nu ɓa, wa nang zu̱ki ye nu, tun a nje nu̱ke ka shakki chele ɓaarem chem zhang ndola nu gha ɓa, aa chem wa mu̱ɗi aa chem a nje nu̱ nyifiri.

⁴ Nga maita nu maɗyi, nga zu̱ndo nu, nu̱ memu̱nara kha rap rap ndu̱ tun ɓa. Kap ndu̱ bonye nu̱ke nga zaran nang, nga kashar maɗyi.

⁵ Aa sarchi nyem a ɓa ki Makidoniya, nyem gwa chem mas ɓaa. Aa chem mbu̱m nu̱ fu̱n damtar a nje, mbu̱ chem wa vi nu̱ dam tu̱ nduki ku̱s gangnderem ndu̱ dakhlari, kha mi gha mbu chem a tu̱k sawa.

⁶ Yang Magham, nu̱ka vu̱rki du̱mbu̱r ye nduki nu̱ me bu̱n wor datlki, wa pa du̱mbu̱r yerem sarchi nu̱ Titus a ɓa ki.

⁷ Ɓar ɓaran ɗyenda saki ɓa, labar par du̱mbu̱r nun shiki yendang saki chem kasha. Wa ze rem za tun wa shim na nga maɗyi, kom ndu̱ chiti mbi nun shiki ku̱me ɗyi nu̱ ɗatlki, ndu̱ jiiri sa nun shiki. Nang ke ɗyi nu̱ saki tang tu̱k mu̱ndan maɗyi.

⁸ Aa lagarkati ɓang wa su̱bu̱r mbonu nang kor vara ɓa. Gumapaali nang tu̱k mu̱ndan nu̱ lagarkatang su̱bu̱rki mbonu ɓa, yang nga su̱bu̱r memu̱narang ba me sarchi koɗomma.

⁹ Yang aa nu̱ke ɗyen wa shi wanang, memu̱nara ɓong. Aa nu̱ke nang tu̱k mu̱ndi su̱bu̱rti memu̱na nu nang shiki ɓa, yang ba su̱bu̱rti memu̱na nwang wa sa tun nggoɗi tu̱ ɗye shir ɓaanu kha mbari. Su̱bu̱rti memu̱na nwang ɗya shimndi ɓu̱ Magham, ku̱me nang ɗyi nyem shikyang, nyem shi zop ye nu ɓa.

¹⁰ Jiwa su̱bu̱rti mbi nu̱ Magham njigki ku̱ gwaarem, wa ka nggoɗ nduku, tu̱ gaɓ nu̱ she Magham, tu̱ gwa ɗanar ku̱nshe nang. Yang nu̱ zhin ɓu̱ kor varan nu̱ gana ɓa. Su̱bu̱rti mbi nu̱ larji a ɓa ki si wa ka shi tlaghar mu̱ti.

¹¹ Na ma ɗyi nu̱ su̱bu̱rti mbi nu̱ Magham njigki ku̱ gwaanu nang a ɓa ki si ye nu. Wa sa nu tun wut maa nu̱ke nun shi torop ɓa. Wa sa tun shi shokhnari, tun tu̱k sawar tu̱k. Wa sa tun sa memu̱na nu, nun ndola vaanu ɓa. Tun daasaran ma ku̱ wu nu aaki nu̱ shiki zop wa nu̱ shipaki. Ve ɓalar nang tun wa wut mbe anyi njiva nu̱ ɗyine nun shi zop ɓa.

¹² Sarchi nang bu̱laki lagarkati naandang nang damta ndu̱ ki shiki zop ɓa, yang nang damta ndu̱ shi zopang ye ki ɓa. Me ɓu̱ nang nga bu̱la za Magham wa zu̱n nu̱ ɗyine tun wa damta ndu̱ chem maɗyi.

¹³ Nang ke ɗyi nu̱ saki chem gwa du̱mbu̱r mbu̱ memu̱narem ɗo. Qu̱rse gwar du̱mbu̱r nyem shiki, chem wa kasha tu̱k maɗyi ku̱me ɗye kashar nu̱ Titus gwaki, tun wa shaata nda maɗyi nun paki du̱mbu̱r yenda.

¹⁴ Nga ze nda nga za nga makhta nu maɗyi, ku̱me nun wut kawa ya ɓa. Ba wa nu̱ke ɗyi nang zu̱ki ye nu kap ɗya zhire, wanang tu̱k, makhtar nu nu̱ke chem a shiran ɗya zhire she Titus.

¹⁵ Titus a ndola nu maɗyi, yang nu̱ shi wa mbu̱ wa kor mburi zu̱r ɓaran nun shiki, ndu̱ zhaaji nun vu̱rki yenda sarchi nun gaɗaki nda ndu̱ sawar ndu̱ dlu̱rti var ɓa.

¹⁶ Nga kashar leendang ku̱me nga maita nu maɗyi.