2 Korintiyeku 6 - Mewar Alqawarang

¹ Mbe tlu̱nar nu̱ke chem a shiran ndu̱ Magham, chem a khutonu, ku̱ njig nu mu̱nkir ɓaran tu̱ kha bam ɓa.

² Tu̱k ma ɗyi nu̱ Magham zu̱ki, “Nu̱ sarchi nang shimki wut nga mu̱nkir ɓang ye nu shiki, Tang tu̱kto nu. Nu̱ sarchi ɗanar a ɓa ki, Tang shaata nu.” Tu̱k ma! Nang ke sarchi nu̱ke tun ka dlu̱ki mu̱nkir ɓu̱ Magham, meeni ke fu̱ɗar gwar ɗanari!

³ Nyem shim ku̱ nduk gwa rem ndu̱ zop mbu̱ tlu̱nar ɓaarem ɓa, nang ke ɗyi nu̱ saki nyem kha ma ɗye ji sar ye aaki ɓa.

⁴ Me ɓu̱ nang, chem a wutan ye nduki nu̱ ɗyine chem nu̱ tlu̱narku ɓu̱ Magham ve aa nyi njiva. Chem a gu̱n memu̱narem, mbe damtarku ndu̱ bonye ndu̱ palase.

⁵ Mbe dlabti ku, mbe khiiri nu̱ zhaaru̱m, ndu̱ dakhlar ku, mbe tlu̱narku gu̱rgu̱rndi ku, mbe song ɗyeniri ndu̱ meeri.

⁶ Mbe khar wakakandi, mbe dar mbu̱ tunu, mbe kanaɗyi ndu̱ mbarki, nu̱ ku̱nshe Jiimbi ɓu̱ Magham ndu̱ ndolar zhirekandi.

⁷ Chem a wutan chem nu̱ tlu̱nar ɓu̱ Magham ku tu̱k nu̱ ku̱nshe zu̱r zhire, ndu̱ zalale ɓu̱ Magham su̱yen nu̱ boote ndu̱ dambu, ma ɗye dakhlar ɓaarem nyem khubki nu̱ mbu̱ khaarem zu̱ma ndu̱ gu̱ɗau.

⁸ Nu̱ ku̱nshe vu̱rti zhaaji nu̱ wuti kata, zu̱r ɗyi malkandi, ndu̱ zu̱r ɗyi mbarkandi nu̱ ɗyinerem, chem nu̱ zhire yang a daran ku wa chem a shingga vaarem nu̱ ɗyine wora.

⁹ Wa no za nu̱ nduki zu̱nderem ɓa, yang wa zu̱nderem ku maɗyi. Wa chem a mu̱ti, yang chem a nje ndu̱ nyifiri. Wa dlabterem ku yang nu̱ tlagha rem ɓa,

¹⁰ chem a su̱yen ndu̱ chiti mbu yang ba chem a kashari. Aa nu̱ke chem nungndan, yang chem sa nduki khang tu̱ shi gu̱na. Wa tun kha rem ɓa, yang aa nu̱m kap ɗya ɓaarem.

¹¹ Tun Korontiyeku, nyem tuka aa nu̱m ye nu ɓa, chem wa qu̱n mberem ye nu maɗyi.

¹² Ai, nyem zhang wut ndolar ɓaarem ye nu ɓa, tun zhangki wut ndolar ɓaanu yerem gha.

¹³ Nga ɓalar nang ye nu ba wa nu̱ke zhinki ka dakhlaki woi ɓaran, wut ma ndolar ɓaanu yerem.

Kha nu Da ndu̱ Nduki nu̱ke ɗya nu̱ Song Maito ku ɓa

¹⁴ Kha nu da ndu̱ nduki nu̱ke ɗya nu̱ mbu Zhinerem gwaanji ku ɓa. Nduk mbarkandi ka shi khar ndu̱ nduk malkandi mu? Yarang ndu̱ zhum maari wa ka kha ye maa da ku mu?

¹⁵ Ɗa Masiya ka ba raptikir ndu̱ Sheɗan mu? Yang nu̱m tabaki nu̱ mbu Yesu ndu̱ njif nu̱ke ɗya nu̱ mbu Yesu ɓa?

¹⁶ Rafti ɓu̱ Magham ka kha da ndu̱ maa konom mu? Chem ke rafti ɓu̱ Magham nu̱ nyifiri. Ba wa nu̱ Magham zu̱ki, “Ngga kha su̱yen ndu̱ wora, tang baara chele ɓaanda, Ngga kha ma Maghamndi ɓaanda, wor ka kha ma nduki ɓanga.”

¹⁷ “Ku̱me nang shakh ma ɗyinonu nu̱ nduki nu̱ke ɗya nu̱ mbu Zhinerem gwaanji ku ɓa, tun shakh ɗyinonu ndu̱ wora Zhinkir gwaanji zu̱ki. Ku̱ su̱ɓa nu ɗyi nu̱ke zopan ɓa, ngga dlu̱ronu ku̱men.”

¹⁸ “Ngga kha ma zhinonu, tun yang tun ka kha ma qusonggi ɓanga ye nusu ndu̱ ye khusku, Zhinkir gwaanji nu̱ zalale aa nu̱m kap zu̱ki wanang.”