2 Korintiyeku 5 - Mewar Alqawarang

¹ Jiwa chem wa zu̱n mbu̱ wa gu̱ɗa shekhɗekh nu̱ke chem kharan mban nang nu̱gha, nang ke man vaarem nu̱ke chem a boote si mbu̱ khar viti ɓaarem mbu̱ larji nang, Magham nu̱ ɗyinan ka shiki rafti yerem mbu̱ viɗi. Yang nu̱ke rafti nang ɗya nduk du̱nki ɓa, ka kha ba a nje aakochi ɓu̱ gu̱ɗa ɓa.

² Leendang chem a tlu̱rti, chem a kodli gwa mi maa khar mbu̱ viɗi nu̱ke ka ɗa lu̱pa rem si.

³ Mbu̱ wa lu̱pa rem nu̱ gha si, chem ɓu̱ kha sarem nggaran ɓa.

⁴ Sarchi nu̱ke chem kharan mbu̱ man var nu̱ larji nang, chem a tlu̱rti ku̱me chem damtaran. Nyem shim ku̱ shakh mi ndu̱ man var nu̱ larji nang ɓa, chem a shimkya ku̱ lu̱pa rem nu̱gha ndu̱ nu̱ viɗang, ma ku̱ ɗyi nu̱ke nu̱ka shi mu̱t ɓa ndang lu̱pa ɗyi nu̱ka mu̱tkyang nu̱ gha guma da.

⁵ Magham nu̱ ɗyinan daasaki pooni mbu̱mndi nu̱ke a ma ɗaatli nang, tu̱ vu̱r Jiimbi ɓaran yerem ma ku̱ wut za chem ku̱si ɓaran dong, ma bu ɗyi nu̱ke a ɓar gana fan.

⁶ Nang ke ɗyi nu̱ saki aakochi nyem ka tu̱k sawar aa nu̱m ɓa, chem wa zu̱n mbu̱ chem a mbu̱ man var nu̱ larji nang, chem ɓakh ndu̱ rafti ɓaarem nu̱ke a nje she Zhinkir gwaanji.

⁷ Jiwa chem a shikya khar maito, chem a shikya khar ɗyi nu̱ yiterem naki ɓa.

⁸ Chem wa maita shwat yang nga zu̱ran ye nu, chem wa shim ku̱ shakh mi ndu̱ man vaarem nang ma ku̱ kha mi gha su̱yen ndu̱ Zhinerem gwaanji mbu̱ viɗi.

⁹ Dukti nang, chem ma shim ku̱ tu̱k mu̱ndi ɓaarem, aa chem a mbu̱ larji nang aa chem a mbu̱ viɗi.

¹⁰ Jiwa wa ku̱s ku̱ ching mi nu̱ gume du̱ku̱l kumar ɓu̱ Masiya kap ɓaarem, ma ku̱ kuma rem. Aaki ka dlu̱ ɗye ɓi ɓaran ba wa nu̱ tlu̱naki sarchi nu̱ke a mbu̱ man var nu̱ larji nang, aa mbarkandi aa malkandi.

Tlu̱nar Somtar Chele ɓu̱ Nduk ndu̱ Magham

¹¹ Nu̱ke chem nu̱ sawar Magham, nang ke ɗyi nu̱ saki chem a me ɓaarem ma dut mi nduki ku̱ sawa nda tu̱k. Magham wa zu̱nderem kap, ngaa taman tun wa zu̱n ndu̱ nang mbu̱ memu̱na nu.

¹² Chem a khamkya ɗyinerem gume nu tu̱k ɓa, chem a shim ku̱ zu̱n nu ɗyi nu̱ saki wa shipa ku̱ shi nu wakhti nu̱ chem. Ma ku̱ ɗu̱ma nu tlogha zhamndi ɓu̱ nu̱ gwaari ɗyin ku nu̱ke a wakhti ndu̱ ɗyi nu̱ke a naran damku yang nu̱ damta ndu̱ ɗye shir ɓaanda ɓa.

¹³ Chem yirtan wa nu̱ke ɓeeni nduki a zu̱ranang ɓa; aa chem wa kha wa chem yirtan, chem a shiran ku̱me Magham. Mbu̱ yang wanang ɓa, chem shi ma mbaari ɓaanu.

¹⁴ Jiwa ndolar ɓu̱ Masiya rosaki rem tu̱ sa chem maita nu̱ ɗyine nduk da wa mu̱t ku̱me nduk kap, ku̱me nang aaki wa mu̱t tu̱k.

¹⁵ Yang nu̱ke mu̱t ku̱me nduki kap, ma ku̱ nduki nu̱ke a nje nu̱ nyifi, shi khar ɓaanda me ɗyin wor gana fan ɓa, yang ku̱ shikya khar ɓu̱ njif nu̱ mu̱tki ku̱me wora. Tu̱ ji ndu̱ chin ɓar mbe mu̱ti ku̱me wor tu̱k.

¹⁶ Ku̱me nang chem wa njig nggu̱t nduk mbu̱ manva wa nu̱ke nduk larji ka shiki, aa nu̱ke chem wa nggu̱t Masiya wanang zhu ɗau fara, yang gana chem ɓu̱ nggu̱ti nda nu̱ mbu̱ wanang tu̱k ɓa.

¹⁷ Jiwa mbu̱ nduk a mbe Masiya, ɗya mewar nduku, geema ɗyiku wa peeta, leendang aa nu̱m wa kha mewaran.

¹⁸ Ɗyiku nang kap Magham shiki, chin somtaki chele ɓaarem ndu̱ chin nu̱ ku̱nshe Masiya, tu̱ vu̱r dulbu tlu̱nar somtar yerem.

¹⁹ Nu̱ ɗyine Magham a somta chele ɓaarem ndu̱ nduki nu̱ mbu̱ larji nang nu̱ ku̱nshe Masiya. Nu̱ka shiga su̱ solar ɓaanda wa ɗya kudum nu̱ke a ɗyine wor ɓa. Magham wa vu̱r ɓalar somtar yerem.

²⁰ Ku̱me nang chem ke yiti Masiya she nduki, chem a khar wa Magham nu̱ ɗyinan kya ɓalar nu̱ ku̱nshe rem. Yang chem a khutonu mbu̱ dlu̱m Masiya, somta ma chele ɓaanu ndu̱ Magham.

²¹ Masiya nu̱ shi sola sar da ɓa, yang tu̱ Magham gaɓ ndu̱ chin ma sadke sola ku̱me chemi. Nang ke ɗyi nu̱ saki chem kha ma nu̱ jeembu she Magham mbe Masiya.