2 Korintiyeku 4 - Mewar Alqawarang

Gu̱nar mbu̱ Kayang nu̱ Du̱nki ndu̱ Daɓa

¹ Nu̱ke ɗaanar ɓu̱ Magham saki tu̱ vu̱r tlu̱nar nang yerem, me bu̱nerem ɓu̱ datl ɓa.

² Yang nyem dambu̱r ɓalar ɓu̱ Magham nu̱ gha ɓa. Nyem ka lamba aaki ɓa, yang nyem ka shi kotame ndu̱ ɓalar ɓu̱ Magham ɓa. Chem a zu̱kya ba zhire ye dalangi. Aaki ka saida zhire ɓaarem gume Magham mbu̱ memu̱naran.

³ Mbu̱ Labar mbarkandi nu̱ke chem a woparan nang wa kha tukaran, kha tukaran ye nduki nu̱ke a ɗyin njiv su̱yari.

⁴ Nu̱ maita ku ɓa, ku̱me Sheɗan nu̱ kwaaɗar larji nang wa sa memu̱na wor tu̱ kha zhum. Wa nggu̱tl wor ku̱ na yarang nu̱ke a wuti ye wor nang, yarang nu̱ke a viri she Labar mbarkandi nu̱ zhaaji ɓu̱ Masiya, nu̱ke chin ke shipar ɓu̱ Magham.

⁵ Chem a shikya waazu ɓu̱ ɗyinerem ɓa, chem a shikya waazu ɓu̱ Yesu Masiya, nu̱ ɗyine chin ke Zhinkir gwaanji, chem a khar wa maaviku ɓaanu ku̱me Yesu.

⁶ Jiwa Magham nu̱ zu̱ki za, “Ku̱ yarang shi mbu̱ zhum maari,” chin saki yarang ɓaran ku̱ shi mbu̱ memu̱narem, ma ku̱ shi yarang ye nduki ku̱ zu̱n ku za nduk ka na zhaaji ɓu̱ Magham nu̱ ku̱nshe Masiya.

⁷ Kap ndu̱ nang, chem nu̱ke gu̱nar nu̱ jiimbi nang a nje mbe rem, chem a khar ba wa kayang nu̱ du̱nki ndu̱ daɓa. Chem kha wanang ma ku̱ wut mi za Magham ke nu̱ zalale aa nu̱m kap, yang tun khaarem mban ɓa.

⁸ A damta remi ku ve aa nyi njiva, yang kap ndu̱ nang nu̱ ɗu̱ma datl me bu̱nerem chem ku̱na shi tlu̱nar nang ɓa. Fu̱ɗa ngguri memu̱narem wa ka kha rap rap, yang nyem fet memu̱narem ɓar ɗyinan ɓa.

⁹ Wa ka vu̱r bonye yerem, yang sar da nu̱ Magham nggarem gha ɓa. Wa ghwaterem nu̱ yaghai, yang nyem mu̱ɗ ɓa.

¹⁰ Chem a me mu̱ti aakochi ba wa nu̱ shiki ye Yesu, ma ku̱ wut khar viti ɓu̱ Yesu nu̱ mbu̱ man vaarem nu̱ka mu̱tki nang.

¹¹ Khar nu̱ke chem a shiran mbu̱ larji nang, chem a me mu̱ti ku̱me Yesu, ma ku̱ na khar viti ɓu̱ Yesu mbu̱ man vaarem nu̱ka mu̱tki nang.

¹² Nang ke ɗyi nu̱ saki chem a me mu̱ti ma ku̱ gwa nu nyifiri.

¹³ Bu̱lar ɓalar ɓu̱ Magham wa zu̱ za, “Nga shi ɓalar nang ku̱me nga maita.” Chem a zu̱ran tu̱k ndu̱ jiimbi maito da, nu̱ ɗyine chem a ɓalar nang ku̱me chem wa maita.

¹⁴ Jiwa chem wa zu̱n nu̱ ɗyine Magham nu̱ jiiki ndu̱ Zhinerem gwaanji Yesu ɓar mbe mu̱ti, ka ji ndu̱ chem ɓar su̱yen ndu̱ Yesu, tu̱ ɗa ɓa ndu̱ chem gume nda su̱yen ndu̱ tunu.

¹⁵ Ɗyiku nang shi kap ma ku̱ gwa nu boote ni, ma ku̱ nduki khang na mu̱nkir ɓu̱ Magham tu̱ kuna nda, tu̱ gwa zhaaji.

Khar Viti mbe Maito

¹⁶ Nang ke ɗyi nu̱ saki nyem fet memu̱narem ɓar ɓa. Aa nu̱ke man vaarem nang a su̱bu̱rti, jiimberem a khar mewa aa nyi sarchi.

¹⁷ Jiwa bonye koɗommandi nu̱ke chem a zaran nang ɓu̱ shoɓ ɓa, yang ka vu̱r zhaaji khangndi yerem koɗokh si ɓa.

¹⁸ Ku̱me nyem sa yiterem nu̱ ɗyine ɗyi nu̱ke nduki a naran ndu̱ ye yiti wor ɓa, chem a sa kya yiterem nu̱ ɗyine ɗyi nu̱ke nu̱ka shi na ɓa. Ku̱me ɗyi nu̱ke nduki a naranang, ka woɗa ɗau, yang ɗyi nu̱ke nu̱ka shi na ɓa ndang nu̱ka shi woɗa ɓa.