2 Korintiyeku 3 - Mewar Alqawarang

Nu̱ Tlu̱narku nu̱ Mewar Alqawarang

¹ Ɗa, chem a ma kuna kya ɗyinerem tu̱k mu? Yang wa ku̱s ku̱ laɓ mi lagarkati nu̱ke ka saidaki rem ye nu mu, yang chem ka zhamndonu ma ku̱ bu̱la nu pooni lagarkatang yerem mu?

² Ai, tun ndu̱ ɗyinonu tun ke lagarkati ɓaarem, nu̱ke a nje bu̱laran mbu̱ memu̱nanu: ma ku̱ aaki na tu̱ nggu̱t mban.

³ Tun wut nu̱ ɗyine tun ke lagarkati nu̱ ɗa viki she Masiya, nu̱ke tlu̱nar ɓaarem saki tun kha wanang. Yang lagarkati nang nu̱ bu̱la ndu̱ ɗye bu̱la ɓa, bu̱la ndu̱ Jiimbi shakhshakhndi nu̱ nyifi. Nu̱ bu̱lan ɗyine ndogdi nu̱ka shiki bu̱lar nu̱ ɗyinan ɓa, yang bu̱lan mbu̱ memu̱na nduki.

⁴ Chem zu̱ nang ku̱me chem wa zu̱n nu̱ ɗyine shwat ɗyen wanang she Magham nu̱ ku̱nshe Masiya.

⁵ Tun a nje nu̱ wutki za maghar ɓaarem saki chem shi tlu̱nar nang ɓa. Maghar ɓaarem a vi she Magham.

⁶ Nang ke ɗyi nu̱ saki chem kha ma nu̱ tlu̱nar ku ɓu̱ mewar alqawarang, nu̱ ku̱nshe bibitiku nu̱ bu̱lakyang ɓa, yang nu̱ ku̱nshe Jiimba. Chin bibiti bu̱lakandi nang chin ke nu̱ ɓar ndu̱ mu̱ti, yang Jiimbyang ke nu̱ vu̱r nyifiri.

⁷ Mbu̱ yang shogar na viki she Musa nu̱ bu̱laki nu̱ ɗyin ɗye bu̱lar ndogdang a ɓa ndu̱ zhaaji ɓu̱ Magham, nu̱ke nduki nu̱ Israila nu̱ ɗu̱ma nggu̱t mbu̱ yiti Musa ɓa. Ku̱me zhaaji ni, aa nu̱ke zhaaji nang wa ka nggorya.

⁸ Yang ɓu̱ zhaaji nu̱ ɗa viki nu̱ ku̱nshe tlu̱nar ɓu̱ Jiimba ɗa, khang ɓu̱ zhaaji ni ka kha kikimndana?

⁹ Mbu̱ ɗyi nu̱ ɗa ɓa ki ndu̱ mu̱ti wa kha ndu̱ zhaaji, yang ɗyi nu̱ ɗa ɓa ki ndu̱ tlu̱nar dambi ɓu̱ Magham ɗa, ai, ka dukti nda ndu̱ zhaaji maɗyi!

¹⁰ Mbu̱ chem wa nggu̱t chele ɓu̱ geema alqawarang ndu̱ mewar alqawarang, chem ka na chin geema alqawarang zhaaji si wudle mewar alqawarang ɓa.

¹¹ Mbu̱ ɗyi nu̱ke ka nggoryaki wa kha ndu̱ zhaaji, chin nu̱ke nu̱ka shi nggorya ɓa nda ɗa ka kha kikimndana?

¹² Pooni sar memu̱nar nang saki chem a sawa aa nu̱m ɓa.

¹³ Nyem kha wa Musa ɓa, chin nu̱ lu̱paki mbu̱ yitan nu̱gha ndu̱ ɗye lu̱pari, ma ku̱ Israileku na woɗar ɓu̱ zhaaji nu̱ka nggoryakyang ɓa.

¹⁴ Yang memu̱na wor kaaku̱ɗakh, ku̱me ma ɓar ye meeni ɗyi nggur a nje nu̱ka nggu̱tlki wor nar zhire nu̱ke a nje mbu̱ bu̱lar geema alqawarang sarchi nu̱ke a nggu̱tan ku. Nang wa wut nu̱ ɗyine ma ɓar ye meeni nu̱ ghar ɗyi nu̱ lu̱paki mbu̱ yitanang ɓar ɓa, ku̱me Masiya ɗyenda ka gharki lu̱parang ɓara.

¹⁵ Ɗye lu̱par nang wa ka nggu̱tl memu̱na wor dar mbu̱ ɗyiku sarchi nu̱ke a nggu̱t mbu̱ bu̱lar lagarkati ɓu̱ Musang ma ɓar ye meeni.

¹⁶ Yang ka ghar ɗye lu̱par nang ɓara mbu̱ nduk wa gaɓ nu̱ she Zhinkir gwaanji.

¹⁷ Zhinkir gwaanji ke Jiimba. Yang ye maa nu̱ke Jiimbi ɓu̱ Zhinkir gwaanji a nje, dli ɗyin a nje.

¹⁸ Chem nu̱ke mbu̱ yiterem lu̱paran ɓa, chem a wutkya yarang ɓu̱ zhaaji ɓu̱ Zhinkir gwaanji wa ɗye nari, a mbu̱mderem ma ku̱ shipa mi nda. Mbu̱mndi nu̱ke a shiran yerem nang ba a shaatar mbu̱ zhaaji na viki she Zhinkir gwaanji, nu̱ke ɗya Jiimba.