2 Korintiyeku 13 - Mewar Alqawarang

Lauɗarsi Duti Dlu̱mndi ɓu̱ Bulus

¹ Yir ɓang nu̱ke nga ma shiran nang, ke yir ɓang she nu nu̱ kunungan. “Wa ku̱s ku̱ gwa saiduku rap ma yir kunung me ku̱ ɓala kha ma zhire shwat” Ba wa nu̱ Bu̱lar ɓalar ɓu̱ Magham zu̱ki.

² Sarchi nang ɗu̱ki she nu nu̱ rapan, nga wu nduki nu̱ shiki solarku ndu̱ nduki kap ku̱ njig solar ku. Yang leendang nu̱ke nga nje su̱yen ndu̱ tun ɓa, nga maata wuri nang shikyang. Mbu̱ nga gaɓi nduk nu̱ke shiki solar guma nu̱ nduk nu̱ke ɓu̱ shi gana fan ngam ɓu̱ njig aaki ɓa.

³ Yang ma nu̱ke tun a shim zu̱n nu nu̱ ɗyine Masiya a ɓalar nu̱ ku̱nsha, tun ka na nu̱ ve nang, Masiya nu̱ kha tu̱ɓtan mbe nu ɓa, me ɓu̱ nang, wa wut zalale ɓaran mbe nu.

⁴ Aa nu̱ke kaatli nda gha mbe katar du̱mbu̱r, tu̱ yang kha ndu̱ nyifiri nu̱ ku̱nshe zalale ɓu̱ Magham. Aa chem nang, du̱mbu̱r ɓaarem kata mbe nda, wanang tu̱k nu̱ ku̱nshe zalale ɓu̱ Magham, chem kha nu̱ nyifiri su̱yen ndu̱ chin ma ɗana nu.

⁵ Buu ma ɗyinonu ma zu̱n nu mbu̱ tun a mbu Masiya Yesu mbe zhire; tun ki buu ɗyinonu. Alapa nun zu̱n za Masiya a nje mbe nu ɓa goma? A nje shwat, mbu̱ nun nggu̱ɗ mbu̱ buuri nang ɓa.

⁶ Nga sa memu̱nara tun ka zu̱n nu̱ ɗyine nyem nggu̱ɗ mbu̱ buuri nang ɓa.

⁷ Chem a khuɗ Magham ku̱ shi nu ɗyi malkandi ɓa, yang tun shi ɗyi mbarkandi, aa nu̱ke nduki ka na wa chem ku̱na ku̱na.

⁸ Jiwa chem ɓu̱ shi ɗyi nggur nu̱ zhangndi zhire ɓa, chem ka gu̱n kya si zhire.

⁹ Chem wa ka kasha mbu̱ du̱mbu̱r ɓaarem kata, yang ɓaanu tun du̱mbu̱ran. Chem a barar ku̱ kha nu nyeedlan tu̱k.

¹⁰ Nang ke ɗyi nu̱ saki tang bu̱la ɗyiku nang ye nu sarchi nu̱ke nga nje su̱yen ndu̱ tun ɓa. Ku̱me mbu̱ nga ɓa, ku̱ sa nu nga tang ranna nu ndu̱ zalale nu̱ Zhinkir gwaanji vu̱rki ya ɓa, ɗya zalale nu̱ke ka du̱nki nu, ɗya nu̱ gu̱ɗa nun gha ɓa.

Lauɗarsi Qaandi

¹¹ Ye lauɗar san, nyeezaku, kope fu̱ɗa ngguri. Shi ma tun kha nyeedlan, tu̱k ma khuti ɓanga, kha ma ma tun da tun shi khar mu̱nkandi ndu̱ yen. Nang ka saki tu̱ Maghamndi nu̱ ndola kha gha su̱yen ndu̱ tunu.

¹² Shi ma qaandi ye yen ndu̱ khaapar wuti ndolar shakhshakhndi.

¹³ Nu̱ mbu Yesu ku kap a qaandi ye nu ku.

¹⁴ Bu ku̱ mu̱nkir ɓu̱ Zhinerem gwaanji Yesu Masiya, ndu̱ ndolar ɓu̱ Magham, ndu̱ khar mu̱nkandi ɓu̱ Jiimbi shakhshakhndi, kha gha su̱yen ndu̱ tun kap.