2 Korintiyeku 12 - Mewar Alqawarang

Ɗyiku nu̱ Magham Wutki ye Bulus mbu̱ Nar Ɗyi Tukakandi

¹ Aa nu̱ke wuti me wakhti boota su̱ ɓa, yang ngga shi. Nga ma shikya ɓalar leendang ɗyine ɗyiku nu̱ke Zhinerem gwaanji Masiya Yesu wutki ya, wa nga na ɗyen mbu̱ zhine tu̱ yita qu̱n tu̱k tang na ɗyi tukakandi ku.

² Nga zu̱n njif nggurnu̱ daki nda ma yir mbu̱ viɗi nu̱ kunung nu̱ ku̱nshe zalale ɓu̱ Masiya, sonyi gwaanggu̱m vat meeni, da nda mbu̱ manva gom, mbu̱ manva ɓa gom, nang zu̱n ɓa, Magham ɗyenda zu̱nki.

³ Yang nga zu̱n ɗu̱ ndu̱ njif nang mbu̱ viɗ nu̱ kunung, aa mbu̱ man va, aa mbu̱ manva ɓa, nang zu̱n ɓa, Magham ɗyenda zu̱nki.

⁴ Tu̱ ɗu̱ ndu̱ chin mbu̱ viɗi tu̱ ɗa tu̱k ɓalarku nu̱ nggu̱tlki nduk zu̱ran gha, pooni ɓalar nu̱ke nduk ɓu̱ ɗu̱ma ɓalar ɗyinan ɓa.

⁵ Ngga shi wakhti ku̱me njif nang, yang ngam ɓu̱ shi ku̱me ɗyina ɓa, buka shi nga ɗyine ɗyiku nu̱ wutki song du̱mbu̱r ɓanga.

⁶ Aa nga dat shang wakhti, ngam ɓu̱ kha ma nggu̱bu̱ng ɓa, ku̱me ngga zu̱kya zhire. Yang ngam ɓu̱ shi wakhti ɓa, ku̱me nang shim ku̱ nduk da nga nu̱ mbu̱ ɗyi nggur nu̱ dukki ɗyi nu̱ naki vya tu̱ tu̱k sha ɓa.

⁷ Yang ma ku̱ shi nga wakhti ku̱me ɗyiku tukakandi rututundi nu̱ yita naki ɓa, tu̱ ɗa ru̱k ndu̱ khaati nggur nu̱ khaki wa njekhti kya zhokhti nga mbu̱ vara. Tu̱ ɗyen kha wa Sheɗan a ru̱kki nu̱ ru̱kti ɓaran ku̱ ki vu̱r bonye ya, ma ku̱ nggu̱tli nga gwaari ɗyin.

⁸ Tang khuɗ Magham sar kunung ma ku̱ da ɗyi nang ya ɓara,

⁹ tu̱ yang zu̱ ya za, “Mu̱nkir ɓang wa gama ro, ku̱me zalale ɓang ka kha nyeedlan mbu̱ tu̱ɓti ɓaaro.” Ku̱me nang ngga kasha tang shi wakhti ndu̱ tu̱ɓti ɓang nang ma ku̱ zalale ɓu̱ Masiya kha gha su̱yen ndu̱ nga.

¹⁰ Ku̱me nang nga kasha tu̱ɓti ɓang, ndu̱ gangndi dakhlar ndu̱ bonye ndu̱ kakanshi nu̱ke nduki a shiran ya ku̱me Masiya. Ku̱me nang khaki nu̱ song du̱mbu̱r nang ke maa nu̱ke ngga khaki ndu̱ du̱mbu̱ri.

Damtar ɓu̱ Bulus ndu̱ nu̱ Mbu Yesu ku nu̱ Korantiya

¹¹ Aa nu̱ke nga gaɓ ndu̱ ɗyina wa nggu̱bu̱ng, tun saki nga. Yang wa ku̱s tu̱ga tun wa makhta nga. Aa nga mbu̱ ɗyi nggur ɓa, “Pudeku rututundi” ɓaanu nang nu̱ dukti nga ndu̱ aa nu̱m ku ɓa.

¹² Ɗyiku nu̱ wutki puda ɗa ɗye lazhamku ndu̱ ɗye saiduku ndu̱ shir ɗyiku nu̱ke nduk nu̱ su̱n ndu̱ naran ɓa, chele ɓaanu nu̱ke nga shi tlu̱nar ɓang ndu̱ kanaɗyi. Ɗye lazhamku nang wa saida za nga pude nu̱ zhire.

¹³ Tun kata gume ɓeeni tabarku ɓu̱ nu̱ mbu Yesu ve nyi njiva? Kope nu̱ke nang kha ma shipit ye nu ɓa? Ndu̱m man vya ku̱me ɗyi nang shiki ye nu nang!

¹⁴ Ngaa daasa ɓar she nu nu̱ kunungan leendang. Ngam ɓu̱ sa taɗar nggur ye nu ɓa, ku̱me nga shimkya mu̱zhindi ɓaanu ɓa, nga shimkya tunu. Jiwa nu̱ shipa ku̱ qusongga da taɗar ɓu̱ zhin nda ɓa, shipa ku̱ zhin qusongga da taɗar ɓaanda.

¹⁵ Ngga kasha sagha ɗyin khara ɓar kap ndu̱ man vara mbu̱ tun ka gwa shaatar ku̱men. Tun ka kata ndolar ɓaanu ya ku̱me ngaa ndola nu maɗyi mu?

¹⁶ Tun wa zu̱n kaani nu̱ ɗyine nang kha ye nu ma shipit ɓa. Yang bai njif nggur ka taman za nga shikya me ghu̱rti ye nu ma ku̱ zu̱m nga ɗyinonu ndu̱ wollo.

¹⁷ Yang ɗa, nga shi boote ndu̱ da chele nduki nang ru̱kki nu̱ she nu tang shi batal ye nu mu?

¹⁸ Ngaa khuɗ Titus tu̱ ɗu̱ she nu, su̱yen ndu̱ mu̱dlerem nu̱ mbu Yesu ngguri. Titus wa shi batal ye nu mu? Nu̱ ɗyi nu̱ shiki ndu̱ ɗyi nu̱ ku̱rki nu̱ kha da ndu̱ ɗyi nu̱ke nga shiran ɓa goma?

¹⁹ Bai tun ka taman za chem a shibkya ɗyinerem gume nu. Wanang ɓa, chem a ɓalar wa nu̱ Masiya shimki zu̱ mi gume Magham. Nyeezaku, zu̱n ma nu̱ ɗyine aa chem shikya nu̱m, chem a shiran ma shaata nu.

²⁰ Nga sawa bai mbu̱ nga ɓa tang gwa tun wa mbu̱m tun kha zum ndu̱ ɗyi nang shimki nu si, tun yang gwa nga zum ndu̱ ɗyi nun shimki nga si tu̱k. Nga sawa gwa nu mbu̱ keele ndu̱ zhiri, ndu̱ memu̱nar malkandi ndu̱ ndolar ɗyin, ndu̱ pu̱zi nduki bam bam ndu̱ ndaane, ndu̱ dar ɗyin, ndu̱ rokhdlar maari.

²¹ Nga sawa Magham sarchi na nga gaɓki ka sa tang tu̱k kawa gume nu. Nga kawa ghoori nu̱ke ngga shiki ku̱me nduki khang nu̱ shiki zop zhu, yang nu̱ nggoɗ ku tu̱ njig tlu̱nar zop, ndu̱ zawar ndu̱ ɗyiku nu̱ shipaki nang ɓa.