2 Korintiyeku 11 - Mewar Alqawarang

Bulus ndu̱ Maalu̱m Wollo ku

¹ Nga shim ku̱ shi nu kaɗanyi ndu̱ nga aa nga shikya me nggu̱bu̱ng. Ku̱gam tun shi kaɗanyi!

² Nga zhiri ɓaanu ndu̱ pooni zhiri ndolar nu̱ke Magham a shiran ye nu. Ku̱me nang nga da alqawar ɓu̱rtonu ɓar ye Masiya, yang nga shim ku̱ kha nu shibtan, ma ku̱ vu̱r nga nu yenda ba wa njif nu̱ke a vu̱r wonkhar nu̱ke ɗyinan ku̱san ye zhimen.

³ Yang nga sawa ku̱ su̱tang shi ghu̱rti ye nu tu̱ lamba nu wa nu̱ lambaki Khawa, tu̱ kwaari ɓaanu su̱bu̱r tun ku̱na vu̱r ɗyinonu guma da ye Masiya ma ku̱ kha nu ma nu̱ song zhire mbe nda ɓa.

⁴ Jiwa tun wa ka maita nduki nu̱ ka ɓa ki she nu ɗau ɗau. Tun wa maita shogar nu̱ shiki ye nu ɗyine Yesu, aa nu̱ke wa ngga yen ndu̱ chin nyem shiki waazu ɓaran ye nwang. Tun wa maita Jiimbi nu̱ shiki alqawaran ye nu, aa nu̱ke ɗya Jiimbi shakhshakhndi nun dlu̱kyang ɓa. Tun wa dlu̱ labar mbarkandi nu̱ ɗa ɓa ki si ye nu, aa nu̱ke wa ngga yen ndu̱ Labar mbarkandi nyem zu̱ki ye nwang.

⁵ Nang taman za nduki nun ka qaki wor za “pudeku rututundi” nang wa dukti nga ndu̱ aa nu̱m ɓa.

⁶ Bai nang magha ɓala wa wor ɓa, yang nga shi zu̱ndi. Chem wa wut nang ye nu ve aa nyi njiva.

⁷ Yang nga shi zop nang wopaki Labar Mbarkandang ye nu mu̱nki, tang wut katar ɗyin ma ku̱ kha nu ndu̱ zhaaji mu?

⁸ Nga dlu̱ mu̱zhindi she tabar ɓu̱ nu mbu Yesu ku ngguri, yang wa nu̱ batal tang shi boote si mbe tlu̱nar ye nu

⁹ Nga mbu̱ song sarchi nu̱ke nga su̱yen ndu̱ tunu, yang nang shim kha nga ma taɗa ye nu ɓa. Nyeezerem nu mbu Yesu ku nu̱ke a Makidoniya a ɓa ki ndu̱ ɗyi nu̱ke nga gangndan ya. Nang kha ma shipiti ye nu sarchi naandang ɓa, yang ngga zu̱m guma ndu̱ shiran wanang.

¹⁰ Zhire ɓu̱ Masiya nu̱ke a mbya saki tang zu̱ nga za nduk a nje mbu̱ dlar ghai Akaya nu̱ke ka nggu̱tlki nga yakhdar nang ɓa.

¹¹ Yang nga shikya zhangndo nu nang zu̱ki wanangang mu? Magham wa zu̱n nga ndola nu.

¹² Ngga zu̱m guma ndu̱ zhangndi shaatar mu̱zhindi nu̱ke tun a vu̱rtan ya, ma nggu̱tl nga “Nu̱ qar vaanda pudeku” ma ku̱ gwa njiv wakhti ku, tu̱ zu̱ za tlu̱nar ɓaanda wayen ndu̱ ɓaarem ɓa.

¹³ Pooni nduki nang ɗya pude zhirekandi ku ɓa, ɗya nu̱ tlu̱nar wollo ku. Tu̱ ka mbu̱m vaanda wa wor pudeku ɓu̱ Masiya.

¹⁴ Yang ɗya ɗye lazham ɓa, ku̱me Sheɗan nu̱ varan wa ka mbu̱m tu̱ kha wa nu̱ ru̱kti ɓu̱ Magham yarangndi.

¹⁵ Ku̱me nang ɓu̱ kha ma ɗye lazham mbu̱ maaviku ɓaran wa mbu̱m vaanda tu̱ kha wa nu̱ tlu̱nar dambi ku ɓa. Ka gwa ɗye ɓi nu̱ khaki torop ndu̱ tlu̱nar ɓaanda ve lauɗar san.

Bonye ɓu̱ Bulus mbu̱ Tlu̱nar ɓaran

¹⁶ Ngaa maataran tu̱k nu̱ ɗyine ku̱ nduk taman za nga nggu̱bu̱ngan ɓa. Mbu̱ yang tun taman wanang, da ma wa nga nggu̱bu̱nganang ma ku̱ gwa nga ɗye wakhti koɗom.

¹⁷ Ɓalar nu̱ke ngaa zu̱ran nang ngaa zu̱kya ɗyi nu̱ Magham zu̱ki ya ɓa. Wakhti nu̱ke nga san nang nga shiran wa nggu̱bu̱ng.

¹⁸ Yang nu̱ke nduki a nje nu̱ka shiki wakhti wa nu̱ke nduki nu̱ larji ka shiki, bu shi nga wanang tu̱k.

¹⁹ Ɓaanu tun ghu̱rtan maɗyi, nu̱ke tun a kaɗanyi ndu̱ nggu̱bu̱ngku mbu̱ kasha!

²⁰ Jiwa mbu̱ nduk wa gaɓ ndu̱ tun ma maaviku ɓaran, tun wa ka kanaɗa, tun wa ka shi wanang aa nduk lawakya tun ɓar kha nu, aa shikya batal ye nu, aa wutkya ndolar ɗyin ye nu, aa ɓu̱tlonu.

²¹ Nga tu̱k kawar zu̱ran za chem wa wut tu̱ɓti ɓaarem nu̱ke nyem shi wanang ye nu ɓa! Yang mbu̱ njif nggur a wakhti ku̱me ɗyi ngguri, ngga ɗu̱ma ɓu̱tl memu̱nara tang shi wanang. Nga ɓalar nang wa nggu̱bu̱ng!

²² Mbu̱ a tamandan ku za wor Yakhudeku, nga wanang tu̱k. Mbu̱ wor qusa Israila, nga wanang tu̱k. Mbu̱ wor zhikankirku ɓu̱ Yibram, nga wanang tu̱k ba.

²³ Mbu̱ wor nu̱ tlu̱narku ɓu̱ Masiya, nga duk wor mbe nang! (Nga ɓalar nang wa nga yirtan!) Ai, nga duk wor tlu̱nar maɗyi, nga gwa gu̱ndi sar khang, wa dlabti nga ku sar khang, sar khang nga me mu̱ti.

²⁴ Sar qurmun tabar dlegumeku ɓu̱ Yakhudeku a kurpi ya ɗyin kunung qu̱m mu̱dlam.

²⁵ Nu̱ tlu̱narku ɓu̱ Romeku shi kurpi ya sar kunung. Wa mbukti nga ndu̱ ndogdiku sar da. Du̱mbu̱l ɗyim wa mberi, nga mban sar kunung. Nga piɗi tang qani mbu̱ gaawu gwaanji sarchi ngguri, kom ta nga ɗal dam.

²⁶ Mbu̱ khang yirku nang shiki nga me mu̱ti mbu̱ gaawuku, ndu̱ me mu̱ti mbu̱ khar nu̱ yetarku, ndu̱ me mu̱ti mbu̱ khar mu̱dla Yakhudeku, ndu̱ me mu̱ti mbu̱ khar nduki nu̱ke ɗya Yakhudeku ɓa. Sar khang nga me mu̱ti mbu̱ ghai gwaanjiku, ndu̱ me mu̱ti mbu̱ gureku, ndu̱ me mu̱ti mbu̱ gaawu gwaanji, ndu̱ me mu̱ti mbu̱ khar nduki nu̱ kotaki ku za wor nyeezerem.

²⁷ Nga shi tlu̱nar tang za bonye, mbe song ɗyeniri, ndu̱ meeri, ndu̱ khuzhumndi. Nga kha waare ɗye zu̱mndi sar khang, tang za mbiti, ndu̱ song ɗye sar nu̱ke ngga saki.

²⁸ Yang qu̱rse ɓeeni ɗyiku zum zum, nga damtaran ndu̱ ɗyi nu̱ke tabarku ɓu̱ nu̱ mbu Yesu a mban.

²⁹ Mbu̱ nduk wa ku̱na shir tunu, tang ka tu̱k wa nga ku̱naki. Yang mbu̱ wa sa njif nggur tu̱ shi zop, tu̱ memu̱nara ka su̱bu̱r maɗyi.

³⁰ Mbu̱ tu̱ga ngga shi khamndi ɗyin, ngga kham ɗyina ɗyin ɗyiku nu̱ wutki katar ɓanga.

³¹ Magham nu̱ke chin ke Zhin Zhinerem gwaanji Masiya Yesu. Nu̱ke barke a ve dlu̱man koɗokhsi ɓa! Wa zu̱n nga shikya wollo ɓa.

³² Sarchi nu̱ke nga mbu̱ ghai Damaskus, nggomne nu̱ke a mbu̱ bu̱n kuji Aretas wa yeta me vi garuk ghayang nu̱gha ma ku̱s nji nga.

³³ Tu̱ yang a zhur ndu̱ nga mbu̱ kang ndu̱ zoori ve wundu garuk ghayang tang lawa me kharan.