2 Korintiyeku 10 - Mewar Alqawarang

Bulus wa Lawa Ɗyinan ɗyine Tlu̱nar ɓaran

¹ Nga Bulus ndu̱ ɗyina, nga kya khutonu, nga nu̱ ka qaki nga “Nu̱ ɓu̱tokh ɗyin” mbu̱ nga su̱yen ndu̱ tunu, yang tang ka kha “Njif shanggu̱ɗangndi” ye nu mbu̱ nga nje su̱yen ndu̱ tun ɓa. Ku̱me katar ɗyin ndu̱ khar nduk tu̱tu̱kndi ɓu̱ Masiya,

² nga khutonu ku̱ sa nu nga tang kha gu̱rgu̱r ye nu sarchi nanga ɓa ki ɓa. Ku̱me nga zu̱n bai ngga ɓa ranna nduki nu̱ zu̱ki za chem a khar viti ɓaarem, wa nduki nu̱ larji.

³ Aa nu̱ke chem kharan mbu larji nang, nyem ka shi khar viti ɓaarem wa nduki nu̱ larji ɓa.

⁴ Jiwa ɗye dakhlar ku ɓaarem ɗya pooni ɓu̱ larji nang ɓa, zalale ɓu̱ Magham a nje si, chem wa ka shi boote si chem su̱bu̱r ɗye dakhlar ku malkandi ɓu̱ nu̱ zhangndiku ɓaarem nu̱ka kanggaki var wor si.

⁵ Chem wa ka ra aa nyi keele, chem gu̱ɗa aa nyi ɓalar nu̱ ka nggu̱tlki zu̱ndi Magham nu̱gha si, chem sa nduki tu̱ shi kwaari mbu̱ ghaari ghai ndu̱ mbu zu̱r ɓu̱ Masiya nu̱ke a shiran ku.

⁶ Chem daasaran ma ku̱ wu mi aa nyi nduk nu̱ zhangki mbu zu̱r ɓu̱ Masiya gha, mbu̱ tun wa maita za tun a mbu zu̱r ɓaranang shwat.

⁷ Nggu̱t ma ɗyi nu̱ke a nje ye dalang ɓa! Mbu̱ nduk a nje nu̱ tamanki za chin ɓu̱ Masiya, ku̱ njif nang kor tu̱k nu̱ ɗyine chem ɓu̱ Masiya tu̱k.

⁸ Ai nu̱ kha ma ɗye kawa mbu̱ ngaa tu̱kti ndu̱ ɗyina ku̱me zalale nu̱ Zhinkir gwaanji vu̱rki yerem ma ku̱ du̱n mi, yang ku̱ gu̱ɗa mi nun gha ɓa.

⁹ Ku̱ taman nu za nga shim sar sawa ye nu ndu̱ lagarkati nang ɓa.

¹⁰ Nduki a zu̱ran za, “Lagarkatiku ɓu̱ Bulus ɗya ɗyi sharkandi ndu̱ ɓalar du̱mbu̱rkandi ku kya mban, yang mbu̱ a su̱yen ndu̱ chem, ɓalar ɓaranang du̱mbu̱ran ɓa, yang nu̱ ka zu̱ ɗyi piikandi ɓa.”

¹¹ Ku̱ pooni nduki nang zu̱n nu̱ ɗyine ɗyi nyem bu̱laki mbu̱ lagarkati nyem ka ru̱kki ye nu mbu̱ chem a ye maa nggur nu̱ ngga yen ndu̱ ɗyi nu̱ke chem ka shiki mbu̱ chem a su̱yen ɓa.

¹² Ma nu̱m yerema? Ai, sar da chem ɓu̱ buu ɗyinerem ɓa, yang chem ɓu̱ kha da ndu̱ nduki nu̱ke a naran wa wor wa duk aaki ɓa. Nduki nu̱ka ku̱rki ɗyin wor ndu̱ yen, a buu ɗyin wora ndu̱ yen nggu̱bu̱ngan ku!

¹³ Yang chem ɓu̱ da ɗyinerem tu̱ peeta koɗokh nu̱ saki yerem ɓa, chem ka ching ye koɗokh tlu̱nar nu̱ Magham vu̱rki yerem, yang tun nang kap tun a mbu̱ dalang tlu̱nar ɓaarem.

¹⁴ Yang nu̱ke tun a mbu̱ dalang ɓaarem, yir ndu̱ Labar mbarkandi ɓu̱ Masiya nyem shiki ye nwang nyem peeta koɗokh ɓaarem ɓa, yang tu̱k nyem shi wakhti tu̱ peeta gha ɓa.

¹⁵ Nyem kuna vaarem nu̱ ɗyin tlu̱nar nu̱ nduki nggur shiki ɓa, yang chem a sa memu̱narem nu̱ ɗyine maito ɓaanu ka ki shaatari, tu̱ dalang tlu̱nar ɓaarem ki shaatar chele ɓaanu maɗyi.

¹⁶ Chem ka gwa chem wopa Labar Mbarkandang mbu̱ ghaiku nggur nu̱ke a guma ndu̱ tunu, waare laɓti dlu̱m ndu̱ tlu̱nar nu̱ njif nggur shiki mbu̱ dam ɓaran.

¹⁷ Yang ba wa nu̱ Bu̱lar ɓalar ɓu̱ Magham zu̱ki, “Nu̱ wakhti kap, ku̱ shi wakhti ɓaran ndu̱ Zhinkir gwaanji.”

¹⁸ Jiwa njif nu̱ makhtaki ɗyinan ka gwaki dlu̱r ɓa, ɗya njif nu̱ke Zhinkir gwaanji makhtaki nda.