2 Korintiyeku 1 - Mewar Alqawarang

Zoɓar Qaandi

¹ Lagarkati nang, a vi she Bulus pude ɓu̱ Masiya Yesu mbu̱ barke ɓu̱ Magham, ndu̱ mu̱dlerem Timoti. Ma yir she tabar ɓu̱ nu̱ mbu Magham nu̱ke a Koranti, kom ndu̱ daatiku ɓu̱ Magham nu̱ke a mbu̱ maa Akaya kap.

² Ku̱ mu̱nkir ndu̱ qaandi memu̱nar na viki she Magham Zhinerem ndu̱ Yesu Masiya kha gha su̱yen ndu̱ tunu.

Magham ɗya nu̱ Du̱ngndi Memu̱na

³ Ku̱ zhaaji kha Magham Zhinki, chin nu̱ke ɗya Zhin Zhinerem gwaanji Yesu Masiya, Zhinkir nu̱ka tu̱kki zhiyaye maɗyi, chin Maghamndi nu̱ka du̱ngki memu̱narem!

⁴ Magham wa ka du̱ng memu̱narem mbu̱ bonye ɓaarem kap, ma ku̱ du̱ng mi memu̱na nduki tu̱k mbu̱ aa nyi pooni bonye, nu̱ ku̱nshe du̱ngdi memu̱nar nyem gwaki she Maghamang.

⁵ Ba wa nu̱ke chem a za pooni bonye nu̱ Masiya zaki, wanang tu̱k nu̱ ku̱nshe Masiya chem ka gwa du̱ngdi memu̱nar gwaanji she Magham.

⁶ Aa nu̱ke chem a za bonye, ai, chem a zaran ma ku̱ kha ma ɗye du̱ngdi memu̱na ye nu tu̱ pa du̱mbu̱r ye nu mbe khar viti ɓaanu mbu̱ jiimba. Mbu̱ chem wa gwa du̱ngdi memu̱nari, tun wa gwa tu̱k ma ku̱ gwa nu̱ du̱mbu̱r gu̱ndi memu̱na nu̱ ɗyine bonye nu̱ke chem nu̱ ɗyinerem chem a zaran.

⁷ Sar da nyem tu̱k sawar ɗyi nu̱ke a ɗaatli ndu̱ tun ɓa, ku̱me chem wa zu̱n nu̱ke tun a zakya pooni bonye nu̱ke chem a zaranang, tun ka gwa du̱ngdi memu̱nar nu̱ke chem a gwaranang tu̱k.

⁸ Nyeezaku, chem a shim zu̱n nu pooni bonye nyem zaki mbu̱ dlar ghai Asiya, chem wa za bonye maɗyikandi nu̱ke nyem taman za chem ka shi nyifi ɓa.

⁹ Tu̱ ɗyen kha yerem wa dlakya kumar mu̱ti yerem. Yang ɗyi nang ɗal ndu̱ chem wanang ku̱me maita mi ɗyinerem ɓa yang maita mi kya Magham, chin nu̱ka jiiki ndu̱ mu̱tiku.

¹⁰ Nu̱ke Magham wa lawa rem me mu̱ti malkandi nang, chem wa maita ka ɗana rem tu̱k. Chem dlaran ve nda ma ku̱ ɗana rem tu̱k.

¹¹ Wa nu̱ke tun a shaata rem ndu̱ barari. Nduki khang ka kuna Magham ku̱me chem, ndu̱ ku̱me barke nu̱ke chem ka gwaki nu̱ ku̱nshe tloghar su̱ barar ɓu̱ ndukiku khang.

Bulus wa Laada Yir nu̱ke a ma Shiran

¹² Leendang nang ke wakhti ɓaarem, memu̱narem wa wuɗ yerem nu̱ ɗyine chem wa shi khar mbarkandi mbu̱ larji nang, nu̱ shi wa khar shakhshakhndi nyem shiki su̱yen ndu̱ tun ɓa, nu̱ pooni zhire na viki she Magham. Nyem shi nang nu̱ ku̱nshe kaɗari ɓu̱ nduk ɓa, kope nu̱ ku̱nshe mu̱nkir ɓu̱ Magham.

¹³ Nyem bu̱la ɗyi nu̱ke tun ɓu̱ ɗu̱ma mbu mban tun ku̱na da mban ɓa. Ngaa sa memu̱nara nu̱ ɗyine tun ka da mban kap, wa nu̱ke tun daki mbu̱ ɓeenan.

¹⁴ Ba wa nu̱ke tun dakya mbu̱ tun koɗomma, tun ka ɓa da mbu̱ tun kap. Tun ka shi wakhti ndu̱ chem ba wa nu̱ke chem ka ɓa shiki wakhti ndu̱ tunu, sarchi nu̱ke Zhinerem gwaanji Yesu ka ɗa gaɓki.

¹⁵ Nga zu̱n ndu̱ nang chin saki tang shim a ɓa nga ɗau fara, ma ku̱ gwa nu barke ɓar ɓang sar rap.

¹⁶ Nga daasa ma yir she nu ve njiv ɓang ma yir Makidoniya, ngga ɓa ɗa dla nu̱ ɗyinonu tu̱k mbu̱ nga gaɓti, ma ku̱ gwa nga shaata she nu ma yir dlar ghai Yakhudiya.

¹⁷ Tun taman za nang zu̱n ɗyi nu̱ke nga shiran sarchi nang daasaki yirang de? Tun taman za nga shi mbu̱ manva mbu̱ ɗyi nang daasakyang, nu̱ke mya ka shiki rap rap, mbu̱ nga zu̱ nga za, “E” tang ɓa gaɓ nga za, “O'o” mu?

¹⁸ Ba wa nu̱ke Magham ɗya nu̱ zhire, ɓalar nyem zu̱ki ye nu ba wanang tu̱k, nyem ka zu̱ “E” ndu̱ “O'o” ɓa.

¹⁹ Jiwa Yi ɓu̱ Magham Yesu Masiya, nu̱ke nga ndu̱ Sila ndu̱ Timoti shiki waazu ɓaran ye nu, ai ɗya, “E” ndu̱ “O'o” ɓa, mbe nda ɗya “E” aakochi.

²⁰ Jiwa Magham nyel alqawar nu̱ shiki nu̱ ku̱nshe nda. Nang ke ɗyi nu̱ saki nu̱ ku̱nshe Masiya Yesu chem a zu̱ran za “Amin” ma gor dlu̱m Magham.

²¹ Shwat Magham wutki yerem su̱yen ndu̱ tun guma da, za chem chingndan shanggu̱ɗang mbe Masiya. Chin datki rem.

²² Wa sa ɗyi nu̱ saidaki za chem ɓaran nu̱ ɗyinerem, tu̱ sa Jiimbi ɓaran nu̱ mbu̱ memu̱narem mu̱nki. Ma ku̱ wut chem ku̱si ɓaran dong ma ku̱ wut ɗyi nu̱ke a ɓar gana fan.

²³ Magham ke saidu ɓanga nu̱ ɗyine nang gaɓ nu̱ Koranti ɓa ku̱me nang shim shaata nga bonye ye nu ɓa.

²⁴ Chem a shimkya wut zalale ɗyine maito ɓaanu ɓa, chem a shikya tlu̱nar su̱yen, ma ku̱ kasha nu, ku̱me tun chingndan ndu̱ du̱mbu̱r mbu̱ maito ɓaanu.