2 Bitu̱rus 3 - Mewar Alqawarang

Alqawar gaɓti ɓu̱ Yesu

¹ Raptaku nu̱ke nga ndolaran, leendang nang ke lagarkati ɓang nu̱ rap nang ru̱kki ye nu. Yang mbu̱ lagarkati ɓang ku rapndi nang nga bu̱la ɗyiku nu̱ke ka saki nu tun mbu Magham ndu̱ memu̱nar da.

² Nga shim ku̱ kor nu ɗyiku nu̱ke annabiku shakhshakhndi nu̱ zhu zu̱ki, kom ndu̱ ɓalar nu̱ Zhinerem gwaanji ndu̱ nu̱ ɗana rem zu̱ki mbu̱ me pudeku nu̱ ɗa ru̱kki nu̱ she nu.

³ Gumapaali, zu̱n ma nu̱ ɗyine, ye lauɗar su̱ qaandi virkirku nduki nu̱ ɓalar ndu̱mndi ku ka ɗa vi a ɓalar ndu̱mndi ku. A mbu ɗyiku malkandi nu̱ wor shimki.

⁴ Ka zu̱ ku za, “Shwat, Yesu nu̱ shi alqawar za chin ka ɗa gaɓ ɓa goma? Yang, a fu̱n nda? Zhikanerem ku wa njig larji nang ku zhu ɗau, yang tun a nje nu̱ paataki ma nu̱ shiki larji ɓa.”

⁵ Nu̱ ɓalarku nang yang, a shiran ku kharki wa zhang nggu̱t maa viɗi ndu̱ maa vu̱ghai nu̱ke a nje, yang Magham shiki zhu tang nu̱ ku̱nshe ɓalar ɓaran. Shi maa vu̱ghayang ndu̱ ɗyim, nu̱ ku̱nshe ɗyim.

⁶ Yang ɗyim ku nang tu̱k su̱yaki larji naandang, ye sarchi nu̱ bu̱rbu̱r gwaanji nang a ɓa ki tu̱ zu̱m du̱mbu̱r ɓaran.

⁷ Nu̱ ku̱nshe ɓalar ɓu̱ Magham tu̱k, maa viɗi ndu̱ maa vu̱ghai nu̱ke chem a naran leendangang, a bu ku su̱ya wor ɓar ndu̱ ɓai. Magham njig nang ma ɓar ye sarchi nu̱ke a ma kuma nu̱ song sawar nda, tu̱ su̱ya wor nu̱gha.

⁸ Yang tun raptaku nu̱ke nga ndolaran, tun da nu̱ke nang shim ku̱ mona nu ɓa, chin ke qaandi da she Zhinkir gwaanji a khar wa sonyi du̱pu, yang sonyi du̱pu a khar wa qaandi da.

⁹ Ɓeeni nduki a zu̱ran za Zhinkir gwaanji a ku̱ɗa ku̱ɗa ndu̱ alqawar nu̱ shiki. Yang ɗyen wanang ɓa, a shikya kaɗanyi ndu̱ tunu nu̱ shim ku̱ aaki su̱ya ɓa, a shim ku̱ aaki nggoɗi.

¹⁰ Yang Fu̱ɗar ɓu̱ Zhinkir gwaanji ka ɗa ɓa wa ɓar ɓu̱ nu̱ muuru. Maa viɗi ka su̱ya ndu̱ su̱qur du̱mbu̱rkandi. Ɗyi nu̱ shiki maa viɗi ndu̱ maa vu̱ghai si ka va nu̱ gha ndu̱ ɓai, Larji ndu̱ ɗyi nu̱ke a mban kap ka su̱ya ku.

¹¹ Yang nu̱ke ka ɓa su̱ya ɗyiku nang nu̱gha kap wanang, shipa ku̱ khar ɓaanu kha kikimndana? Shi ma khar viti shakhshakhndi, tun vu̱r vaanu ye sawar Magham mbe aa nu̱m.

¹² Tun shi khar ɓaanu tun a kasha ɓar ɓu̱ fu̱ɗar ɓu̱ Magham. Tun shim ku̱ fu̱ɗar nang a ɓa ɗau, nang ke, fu̱ɗar nu̱ke maa viɗi ka ɓa vaki mbu̱ ɓai. Ɗyiku nu̱ shiki mu̱na viɗi ndu̱ maa vu̱ghai sang, ka yela ku tu̱ su̱ya mbu̱ ɓaiyang.

¹³ Yang wa nu̱ Magham shiki alqawaran chem a bu kya mewar maa viɗi ndu̱ mewar maa vu̱ghai, maa nu̱ke dambi a nje aakochi.

¹⁴ Ku̱me nang, raptaku nu̱ke nga ndolaran, nu̱ke tun a bu ɓar ɓu̱ fu̱ɗarang, tun shi ɗyi nu̱ke tun ka ɗu̱maki shiran kap tun shi khar ɓaanu gume Magham waare chiɓi ndu̱ beeko zop ngguri. Tun shi khar ɓaanu gume nda mbu̱ qaandi memu̱na.

¹⁵ Kor ma nu̱ ɗyine ɗyi nu̱ saki tu̱ Zhinkir gwaanji ki kaɗanyi chin ke a shim ku̱ nduki gwa ɗanari. Ba wa nu̱ Bulus mu̱dlerem nu̱ke chem a ndolaran bu̱laki ye nu wa nu̱ Magham vu̱rki kaɗari ni yenda.

¹⁶ Wa ka shi ɓalar ɗyine pooni ɗyiku nang aakochi mbu̱ lagarkatiku ɓaran. Mbu̱ lagarkatiku ɓaranang yang ɓeeni ɗyiku a nje nu̱ke shar ku̱ nduk da mban. Nang ke ɗyiku nu̱ke nduki nu̱ song zu̱ndi ku, nu̱ke maito ɓaanda khukhutan, a mbu̱m mbu̱ ɓalarang nu̱gha ku, ba wa nu̱ka shiki ku ye ɓeeni bu̱lar Ɓalar ɓu̱ Magham ku. Ai, nduki nang a dut mu̱ti ye ɗyin wora.

¹⁷ Ku̱me nang, tun raptaku nu̱ke nga ndolaran, nu̱ke tun wa woɗa da mbu̱ ɗyiku nang, ku̱r ma vaanu ndu̱ pooni nduki nu̱ njigki mbu Magham nang. Ku̱ shogar wollo ɓaanda da khangkal ɓaanu ɓar tun nggu̱ɗi tun njig ye maa nu̱ke tun a si ɓa.

¹⁸ Me ɓu̱ nang, tun ki gwaari mbe mu̱nkir ndu̱ zu̱ndi Zhinerem gwaanji Yesu Masiya Nu̱ Ɗana rem, tun gwa shaatar mbe zu̱ndi nda aa nyi sarchi. Ku̱ zhaaji kha nda leendang nu̱ aakochi koɗokhsi ɓa. Amin.