2 Bitu̱rus 2 - Mewar Alqawarang

Annabi Wollo ndu̱ Maalu̱m Wollo ku

¹ Annabi kotameku a vi ku nu̱ mbu̱ nduki ɓu̱ Magham. Yang tu̱k, maalu̱mku nu̱ wollo ka ɗa vi chele ɓaanu. Ka ɗa ɓa ndu̱ shogar ku nggur mbu̱ tuka, tu̱ shi shogar wollo ye nduki ma su̱bu̱r wora. Ka zhang Zhinerem gwaanji nu̱ dliiki nyifi ɓaanda gha. Shir wanangang ka ɗa ɓa ndu̱ mu̱ti ɓaanda ɓu̱ shoɓ ɓa.

² Nduki khang ka mbu njiv ɗye kawar ɓaanda. Ku̱me nang ɓeeni nduki ka ndu̱m njiv zhire.

³ Ku̱me melakh ɓaanda, maalu̱mku nang ka shim ku̱ gwa tun ku ɗyinonu nu̱ ku̱nshe ɓalar wollo nu̱ gu̱nki ku. Yang dlar kumar mu̱ti nu̱ shiki ye wor mbu̱r fara ba a nja bu wora, yang su̱yar wor nu̱ gha nu̱ laada ɓa.

⁴ Aa nu̱ ru̱ktiku ɓu̱ Magham, sarchi nu̱ shiki zop ku zhu, nu̱ Magham njig wor ɓa, wa mbuk wor nu̱ mbu̱ giɗim ɓai. Tu̱ gu̱n wor nu̱gha mbu̱ geeku kirkandi nu̱ke maaran zhum. A bu fu̱ɗar kumari.

⁵ Yang tu̱k mbu̱ Magham nu̱ njig nduki nu̱ mbu̱ larji nu̱ shiki mu̱nar ku zhu ɓa. Tu̱ tlagha wor nu̱gha nu̱ ku̱nshe bu̱rbu̱r gwaanji ku̱me nu̱ mbu zu̱r ɓaranku ɓa. Tu̱ yang ɗana kya Nukhu nu̱ waazu dambi su̱yen ndu̱ nduki mut.

⁶ Mbu̱ke Magham wa su̱ya ghai Sodom ndu̱ Gomora tu̱ gaɓ nu̱ wor ma pu̱zhit, ma ku̱ wut ɗyi nu̱ke chin ka shiki ye nduki nu̱ke nu̱ zu̱n Magham ɓa.

⁷ Mbu̱ yang wa ɗana Lot tu̱k, chin nu̱ke ɗya nu̱ dambi, nu̱ke wa damta maɗyi ɗyine pooni ɗye shir malkandi ɓu̱ nduki nu̱ Sodom nu̱ke nu̱ka mbu wopa ku ɓa.

⁸ Njif nang ɗya nu̱ dambu, yang kharan chele ɓu̱ nduki nu̱ tlu̱nar ɗye shir malkandi. A na ɗye shir malkandi ɓaanda aa nyi fu̱ɗa, a tu̱k maatli ɓalar ɓaanda. Tu̱ memu̱naran ki su̱bu̱rti maɗyi ku̱me wa zhang mbu bibitang gha ku.

⁹ Mbu̱ yang ɗyiku nang wanang Magham wa zu̱n ɗyi nu̱ke chin ka shiki ma ɗana nu̱ sawar nda ku mbe buuriku ɓaanda. Magham wa zu̱n ɗyi nu̱ke chin ka shiki chin njig nu̱ mu̱narku mbu̱ bonye ɓaanda kope sarchi kumari.

¹⁰ Ɗya kumar gu̱rgu̱rndi ɗyine nduki nu̱ke a mbu shimndi malkandi ku nu̱ man va, kom ndu̱ nduki nu̱ke a ndu̱m nu̱ kwaaɗarku. Maalu̱mku nu̱ lambar nang, kawa ve wor ɓa! Ɗya nu̱ gwaari ɗyin ku. Nu̱ka tu̱k sawar ku̱ pu̱z nda jiimbiku nu̱ zhaaji nu̱ke a mbu̱ viɗi she Magham ɓa.

¹¹ Yang nu̱ ru̱ktiku ɓu̱ Magham ndu̱ ɗyin wora, nu̱ke wa duk maalu̱mku nang du̱mbu̱r ndu̱ zalale, yang kap ndu̱ nang nu̱ du̱ng zop ye wor ɓa yang nu̱ pu̱z wor gume Zhinkir gwaanji ɓa.

¹² Yang nduki nang, a ɓalar ndu̱mndi ku ve Magham ɗyine ɗyiku nu̱ke nu̱ zu̱n ku ɓa. A nje ku wa dlu gaariku nu̱ke khangkal ve wor ɓa, a mbukya ɗyi nu̱ke man var wor a shimndan ɗyenda. Kha wor ma ku̱ ku̱s wor tu̱ tlagha nu̱ gha. Ai, ka mu̱t ku ba wa no za ɗya dlu̱ gaari ku.

¹³ Yang ba wa nu̱ vu̱rki bonye ye ɓeeni nduki, ka vu̱r bonye ye wor ba wanang tu̱k. Wa da ku za zar ɗyiku ndu̱ tlu̱nar malkandi nu̱ke a shiran ku fu̱ɗar gangtlu̱rang ndang ɗya tu̱kti mu̱ndi. Khar ɓaanda nu̱ke a shiran chele ɓaanu ɗya ɗye kawa, ndu̱ ɗyi malkandi tu̱k. A zu̱mndi a zar su̱yen ndu̱ tunu, yang qu̱rsan tu̱ ka tlu̱na ɗyi nu̱ke a shimndan ku.

¹⁴ Aakochi a korkya laɓti nusu, nu̱ka nggum ku ndu̱ shir sola ɓa. A lamba nduki nu̱ke du̱mbu̱ran ku mbu̱ maito ɓaanda ɓa. Wa kha ku wang mbe melakh ɓaanda. Magham ka kuma pooni nduki nang shwat.

¹⁵ Wa njig njiv zhire ku, a mbu njiv ɓu̱ Balaam yi ɓu̱ Beyo. Njif nu̱ka ndolaki tlu̱nar malkandi ma gwa nji ɗye ɓiiran.

¹⁶ Yang wa gwa wuri ku̱me zop ɓaran, kha kooro, ɗye nggar nu̱ke nu̱ka shi ɓala ɓa, tu̱ yang shi ɓalar yenda ndu̱ su̱qur nduku, ma ku̱ nggu̱tl nji annabi nang tlu̱na me yirti nu̱ke a ma shiran.

¹⁷ Nu̱ lambar ku nang a shipa giɗim nu̱ ɗyiman njiiki. A khar ku wa tu̱tanggal nu̱ khu̱kheeti ka kooki ɓara. Magham wa daasa maa khar ye wor mbu̱ zhum maari chit su̱ɗu̱kndi.

¹⁸ Nduki nang wa ka shi ɓalar bamndiku nu̱ gwaari ɗyin a boote nu̱ shimndi ɓu̱ man va, tu̱ ka dut nduki nu̱ke nu̱ shoɓ ndu̱ lawar chele nduki galkandi nang ɓa.

¹⁹ A da alqawar gwar ɗyin ye nduki, yang wor ndu̱ vaanda ɗya maavi ɓu̱ ɗye shir malkandi ku. Ku̱me nduk a khar maavi ɓu̱ ɗyi nu̱ke a zalale ndu̱ chin.

²⁰ Mbu̱ nduk wa zu̱n nu̱ ɗyine Zhinerem gwaanji Yesu Masiya ke nu̱ ɗana rem, tu̱ lawa mbe ɗye shir malkandi nu̱ larji nu̱ka saki tu̱ nduk gal gha. Tu̱ yang gaɓ nu̱ mbu̱ pooni ɗye shir malkandi ku nang qu̱rsan, tu̱ ɗyen duk du̱mbu̱r ɓaran, khar viti ɓu̱ njif nang ka duk nu̱ gumapaali maatli maɗyi.

²¹ Tu̱ga pooni nduki nang nu̱ zu̱n njiv dambi ku sar da mbu̱ khar viti ɓaanda ɓa, ka duk ye wora. Yang wonji, qu̱rse wa zu̱n njivang ku, tu̱ yang gaɓ nu̱ gana ku tu̱ njig mburi zu̱r shakhshakhndi nu̱ vu̱rki ye wor nang.

²² Ai, ɗyi nu̱ shiki ku nang wa shi torop ndu̱ nggar mbu̱ ɓalar nu̱ zu̱ki za, “Yiɗi wa shi vu̱nakhti tu̱ yang gaɓ tu̱ ghu̱ɓ vu̱nakhtang ɓara.” Kom ndu̱ nggar mbu̱ ɓalar nu̱ zu̱ki za, “Alede nu̱ shiki wurti yenda wa gaɓ tu̱ bu̱mbu̱lan mbu̱ gu̱gu̱pang.”