2 Bitu̱rus 1 - Mewar Alqawarang

Zoɓar Qaandi

¹ A vi she Siman Biturus, maavi ndu̱ pude ɓu̱ Yesu Masiya, ma yir she nduki nu̱ gwaki maito nu̱ zhaaji ba wa nyem gwaki, nu̱ ku̱nshe dambi ɓu̱ Maghamndi ɓaarem ndu̱ Nu̱ Ɗanar rem Yesu Masiya.

² Bu ku̱ Magham shaata mu̱nkir ndu̱ qaandi memu̱nar maɗyikandi ye nu mbe zu̱ndi Magham ndu̱ Yesu Zhinerem gwaanji.

Khar nu̱ Shipaki nu̱ Mbu Masiya

³ Magham mbu̱ zalale ɓaran wa vu̱r ɗyi nu̱ke chem a gangndan kap ma shi mi pooni khar viti ɓu̱ nduki nu̱ sawar Magham nu̱ ku̱nshe zu̱n ndu̱ nda. Chin qaki rem mbe pooni zhaaji ndu̱ dambi ɓaran.

⁴ Nu̱ Ku̱nshe ɗyiku nang wa vu̱r alqawarku ɓaran gwaanji ku nu̱ zhaaji, ma ku̱ gwa nu me Maghamndi ɓaran nu̱ ku̱nshe ɗyiku nang, tun lawa mbe mu̱narku nu̱ke a larji nu̱ke shimndi ɗyiku malkandi ka ɓa ki si.

⁵ Ku̱me nang, tun shi ɗyi nu̱ke tun ka ɗu̱maki shiran kap ma shaata mbarkir nu̱ ɗyine maito ɓaanu. Tun shaata zu̱ndi ɗyiku ɓu̱ Magham nu̱ ɗyine mbarkir ɓaanu.

⁶ Ɗyine zu̱ndi ɗyiku ɓu̱ Magham tun shaata ku̱si ɗyini. Tun shaata gu̱ndi memu̱nar nu̱ ɗyine ku̱si ɗyinang. Tun shaata sawar Magham nu̱ ɗyine gu̱ndi memu̱narang.

⁷ Nu̱ ɗyine sawar Magham tun shaata mbarkir ye yen. Ɗyine mbarkirang tun shaata ndola.

⁸ Mbu tun wa gwa pooni ɗyiku nang khang mbu̱ khar viti ɓaanu, tun ɓu̱ kha tu̱ɓtan ɓa yang tun ka vu̱r boota mbe zu̱ndi Zhinerem gwaanji Yesu Masiya nun shiki.

⁹ Yang njif nu̱ mbu̱ɗki ɗyiku nang, nu̱ka na maa mbar ɓa ba wa no za puguman. Wa mona ndu̱ shiɓti nda nu̱ shiki nu̱ gha mbe solar ɓaran ɗau fara.

¹⁰ Ku̱me nang, nyeezaku, shaata ma kasha wutan nu̱ ɗyine Magham wa qa nu tu̱ daato nu. Mbu̱ tun wa shi wanang tun ɓu̱ nggu̱ɗ sar da ɓa.

¹¹ Shir wanang ka sa tun gwa gaɗar mbarkandi ma viri nu̱ mbu̱ kwaaɗar ɓu̱ Zhinerem gwaanji nu̱ke nu̱ka shi woɗa ɓa ndu̱ nu̱ Nu̱ Ɗanar rem Yesu Masiya.

¹² Ku̱me nang, ngga ki kor ɗyiku nang ye nu, aa nu̱ke tun wa zu̱ni, tun wa kha du̱mbu̱ran maɗyi mbu̱ ɓalar zhire nun dlu̱ki.

¹³ Ye nar ɓanga, wa shi torop, mbu̱ nga nje ndu̱ nyifiri, ki nga kwaaran ye nu,

¹⁴ nu̱ke nga zu̱n nu̱ ɗyine qaandiku ɓang wa shi bing woɗar mbu̱ larji nang, ba wa nu̱ Yesu Masiya wutki ya ye dalangi.

¹⁵ Ku̱me nang ngga shi ɗyi nu̱ke ngga ɗu̱maki shiran kap ma ku̱ khuɓ nu ɗyiku nang mbu̱ memu̱na nu aakochi aa nga njig larji nang.

Nu̱ Nar Zhaaji ɓu̱ Masiya ku̱

¹⁶ Ai, sarchi nyem zu̱ki labar wuti zalale ndu̱ ɓar ɓu̱ Zhinerem gwaanji Yesu Masiya ye nu chem a zu̱kya shinjiku ye nu nu̱ nduki dlaki mbu̱ ghu̱rti ɓaanda ɓa. Chem wa na zhaaji ɓaran ndu̱ yiterem.

¹⁷ Jiwa wa dlu̱ gorkir ndu̱ zhaaji she Magham Zhinki sarchi nu̱ Magham Nu̱ Zhaaji Nu̱ Dukki aa nu̱m gwaari zu̱ki yenda za, “Nang Yi ɓanga nga ndola nda; Memu̱nara mu̱n ndu̱ chin maɗyi.”

¹⁸ Chem wa tu̱k su̱qur nu̱ ɗa viki viɗi nang nu̱ke chem a su̱yen ndu̱ chin ɗyine dleng shakhshakhndang.

¹⁹ Ɗyiku nang wa kha torop ndu̱ ɓalar ɓu̱ annabiku. Wa shi mbar ku̱ gaɓ nu ndu̱ khangkal ɓaanu nu̱ ɗyin ɓalar nang ma ku̱ kha wa ɓai nu̱ke a vu̱r yarang mbu̱ zhum maari kope sarchi nu̱ke maa ɗatlki. Sarchi nu̱ yarang ɓu̱ pazar ɗatli maa viki ye nu mbu̱ memu̱na nu.

²⁰ Yang guma ndu̱ aa nu̱m, wa shipa zu̱n nu nu̱ ɗyine, ɓalarku ɓu̱ annabiku nu̱ke a nje mbu̱ bu̱lar Ɓalar ɓu̱ Magham, a vi mbe shaandi ko ghu̱rti ɓaanda ɓa.

²¹ Jiwa ɓalar nu̱ annabiku zu̱ki nu̱ ɗa vi mbe shaandi ɓu̱ nduk sar da ɓa. Jiimbi shakhshakhndi ke nu̱ viri nu̱ mbu̱ memu̱na wora tu̱ sa wor ku̱ zu̱ ɗyiku nu̱ dlu̱ki ku she Magham.