1 Yokhana 5 - Mewar Alqawarang

Maitar Yi ɓu̱ Magham

¹ Kap njif nu̱ maitaki za Yesu chin ke Masiya, ɗya yi ɓu̱ Magham. Ai, njif nu̱ ndolaki Zhin woyang ka ndola woyang tu̱k.

² Ɗyi nu̱ke ka saki chem zu̱n nu̱ ɗyine chem a ndola qusonggi ɓu̱ Magham chin ke mbu̱ chem a ndola Magham, chem a shi ɗyi nu̱ zu̱ki yerem za shi mi.

³ Jiwa ndolar Magham chin ke, shir ɗyi nu̱ Magham zu̱ki za shem, yang ɗyi nu̱ka zu̱ki za shi myang shar ɓa,

⁴ jiwa aa nyi yi ɓu̱ Magham ka zu̱m loobo ɗyin larji. Maito ɓaarem mbe Masiya ke nu̱ sa rem chem ki ra wute nang.

⁵ Ki ka ɗu̱maki ra larjyang na? Kope njif nu̱ maitaki za Yesu ɗya Yi ɓu̱ Magham ɗyenda.

⁶ Nang ke njif na ɓa ki nu̱ ku̱nshe ɗyim ndu̱ tom chin ke Yesu Masiya. Nu̱ ɗa ɓa nu̱ ku̱nshe ɗyim ɗyenda ɓa, a ɓa nu̱ ku̱nshe ɗyim ndu̱ tom tu̱k. Yang ɗya Jiimbyang saidaki ku̱me Jiimbyang ke zhire.

⁷ Ɗyiku kunung a nje nu̱ke a saidaran za Yesu ɗya Yi ɓu̱ Magham.

⁸ [Ɗyiku nang, wor ke Jiimba, ndu̱ ɗyim ndu̱ tom, yang ɗyiku kunungndi nang me wor da ku.]

⁹ Mbu̱ nduki wa saida ɗyi nu̱ wor naki, chem wa ka maita ɗyi nu̱ zu̱ki ku. Yang saidu ɓu̱ Magham wa duk saidu nu̱ nduki shiki nu̱ du̱mbu̱ri, yang tu̱k wonji chin nu̱ ɗyinan shiki saidu ɓu̱ ɗyiku nang ɗyine Yi ɓaran.

¹⁰ Aaki maitaki Yi ɓu̱ Magham, saidu nu̱ ɗa viki she Magham nang a nje mbu̱ memu̱naran. Yang kap njif nu̱ke nu̱ maita Magham ɓa, wa gaɓ ndu̱ Magham ma nu̱ wollo, nu̱ke wa zhang maita saidu nu̱ Magham shiki ɗyine Yi ɓaran.

¹¹ Yang nang ke saidwang: Magham wa vu̱r nyifi yerem nu̱ke nu̱ka shi woɗa ɓa, yang nyifi nang a mbe Yi ɓaran.

¹² Njif nu̱ gwaki Woyang, wa gwa nyifiri. Yang njif nu̱ke nu̱ gwa Yi ɓu̱ Magham ɓa, nyifi nje kha nda ɓa.

Nyifi nu̱ke nu̱ka Shi Woɗa ɓa

¹³ Tun nun maitaki dlu̱m Yi ɓu̱ Magham, nga bu̱la ɗyiku nang ye nu kap ma ku̱ zu̱n nu nu̱ ɗyine tun wa gwa nyifi nu̱ke nu̱ka shi woɗa ɓa.

¹⁴ Nang ke shokhku̱rokh memu̱nar nu̱ke a khaarem nu̱ke chem ka napaki Magham si: wa ka tu̱kterem aakochi mbu̱ chem wa khuɗ ɗyi nu̱ke ɗya shimndi ɓaran.

¹⁵ Yang nu̱ke chem wa zu̱n za wa ka tu̱kterem aakochi mbu̱ chem wa khuɗ tun kha nda, chem wa zu̱n za chem ka gwa ɗyi nyem khuɗkyang.

¹⁶ Mbu̱ njif nggur wa na mu̱dlen a solar nu̱ke nu̱ khu̱l ye mu̱ti ɓa, ku̱ njif nang shi barar ye njif nu̱ke a solarang. Magham ka vu̱r nyifi ye nu̱ solar nang ku̱me barar nang. Nga ɓalar nang ye nduki nu̱ke solar ɓaanda nu̱ khu̱l ye mu̱ti ɓa, solar a nje nu̱ka khu̱lki ye mu̱ti, nang zu̱ nga za ku̱ nduk shi barar ye pooni nang ɓa.

¹⁷ Kap shir tlu̱nar malkandi ɗya sola, yang pooni solarku a nje nu̱ke nu̱ka khu̱l ye mu̱ti ɓa.

¹⁸ Chem wa zu̱n kap njif nu̱ke ɗya woi ɓu̱ Magham, nu̱ka zu̱m guma ndu̱ shir sola ɓa, ku̱me Yi ɓu̱ Magham a kangga nda, ma ku̱ Sheɗan su̱ɓa nda ɓa.

¹⁹ Chem wa zu̱n nu̱ ɗyine chem qusonggi ɓu̱ Magham, yang larji kap a mbu̱ khar Sheɗan.

²⁰ Chem wa zu̱n nu̱ ɗyine Yi ɓu̱ Magham a ɓa larji tu̱ vu̱r zu̱ndi yerem, ma zu̱n mi nda chin nu̱ke ɗya zhire. Yang tu̱k chem a mbe nda, chin nu̱ke ɗya zhire, kap nu̱ Yi ɓaran Yesu Masiya. Chin ke Maghamndi zhirekandi ndu̱ nyifi nu̱ke nu̱ka shi woɗa ɓa.

²¹ Tun qusonggi ɓang nu̱ke nga ndolaran, nga zu̱ran ye nu tun shakh ɗyinonu ndu̱ mu̱lu̱mku.