1 Yokhana 4 - Mewar Alqawarang

Buu ma Jiimbiku

¹ Raptaku nu̱ke nga ndolaran, ku̱ maita nu aa nyi jiimba ɓa, buu ma jiimbiku dong tun na mbu̱ a vi she Magham. Jiwa annabi kotameku wa vi ku nu̱ aa fu̱n mbu̱ larji.

² Wonji ma ɗyi nu̱ke tun ka zu̱nki Jiimbi ɓu̱ Magham nu̱ si, aa nyi jiimba nu̱ saidaki za Yesu Masiya a ɓa mbu̱ man va, a vi she Magham.

³ Yang kap jiimbi nu̱ke nu̱ saida nang ɗyine Yesu ɓa, jiimbi nang a vi she Magham ɓa. Nang ɗya jiimbi ɓu̱ nu̱ zhangndi Masiya nun tu̱kki za a nje a ɓarang, aa leendang a woɗa ɓar mbu̱ larji.

⁴ Tun qusonggi ɓang nu̱ke nga ndolaran, tun a vi she Magham, tun wa ra annabi nu̱ lambar ku nang, ku̱me Jiimbi ɓu̱ Magham nu̱ke a mbe nu wa duk jiimbi nu̱ke a mbe nduki nu̱ke a mbu̱ larji nang.

⁵ Ɗya ɓu̱ larji ku, ku̱me nang kap ɗyi nu̱ke a zu̱ran ku ɗya ɗyin larji, yang larji a tu̱k wora.

⁶ Chem a vi she Magham. Nduki nu̱ zu̱nki Magham wa ka tu̱kterem ku, yang nduki nu̱ke nu̱ zu̱n Magham ɓa, nu̱ka tu̱kterem ku ɓa. Chem ka zu̱n njif nu̱ke a su̱yen ndu̱ Jiimbi zhire ndu̱ njif nu̱ke a su̱yen ndu̱ jiimbi wollo ve nang.

Ndolar ɓu̱ Magham ndu̱ Ɓaarem

⁷ Raptaku nu̱ke nga ndolaran, ndola mi yen ku̱me ndola ka vi she Magham. Kap njif nu̱ka wutki ndola ɗya yi ɓu̱ Magham, wa zu̱n Magham tu̱k.

⁸ Kap njif nu̱ke nu̱ka wut ndola ɓa, nu̱ zu̱n Magham sar da ɓa, ku̱me Magham ɗya ndola.

⁹ Magham wut ndolar ɓaran yerem ve nang, wa ru̱k Yi ɓaran ɗyendandi tu̱ ɗa ɓa mbu̱ larji ma ku̱ gwa mi nyifiri nu̱ ku̱nshe nda.

¹⁰ Wonji ma ndolar zhirekandi, chem ndolaki Magham ɓa, chin ndolaki rem, tu̱ ɗa ru̱k Yi ɓaran ma ku̱ kha ma sadke yaapar solar ɓaarem.

¹¹ Raptaku nu̱ke nga ndolaran, nu̱ke Magham wa ndola rem wanang, wa ku̱s ndola mi yen tu̱k.

¹² Nduk a nje nu̱ naki Magham sar da ɓa, yang mbu̱ chem a ndola yen, Magham a nje kharan mbe rem ɗo, ndolar ɓaran nang wa kha nyeedlan mbe rem.

¹³ Chem wa zu̱n za chem kharan mbe nda, chin a mbe rem tu̱k, ku̱me Jiimban nu̱ vu̱rki yerem.

¹⁴ Chem wa nggu̱ɗi, chem saida tu̱k nu̱ ɗyine Zhinkirang wa ru̱k Yi ɓaran tu̱ kha ma Nu̱ Ɗanar larji.

¹⁵ Kap njif nu̱ tloghaki za Yesu ɗya Yi ɓu̱ Magham, a mbe Magham, Magham a mbe nda.

¹⁶ Yang chem nu̱ ɗyine rem chem wa zu̱ni chem dla vaarem nu̱ ve ndolar ɓu̱ Magham nu̱ke a shiran yerem. Magham ɗya ndola, njif nu̱ke a wut ndola kharan mbe Magham, Magham a nje kharan mbe nda.

¹⁷ Nu̱ ku̱nshe nang ndola wa kha nyeedlan mbe rem ma ku̱ kha mi ndu̱ shokhku̱rokh memu̱na fu̱ɗar nu̱ke Magham a ma kuma rem. Jiwa ba wa nu̱ke Masiya si, chem wanang tu̱k mbu̱ larji nang.

¹⁸ Sawa nje mbu̱ ndola ɓa, ku̱me ndolar nyelkandi wa ka komba sawa, yang vu̱rti bonye ye nduk mbu̱ wa shi zop wa ka sa nduk tu̱ tu̱k sawa. Nang wa wut nu̱ ɗyine njif nu̱ tu̱kki sawa ndolar ɓaran nyeedlan ɓa.

¹⁹ Chem a wut ndola ku̱me Magham nggaki su̱ wut ndola yerem.

²⁰ Yang mbu̱ njif nggur wa zu̱ za, “Nga ndola Magham,” yang a zhang mu̱dlen, njif nang a shikya wollo. Ku̱me kap njif nu̱ke nu̱ka ndola mu̱dlen nu̱ke a naran ɓa, ɓu̱ ɗu̱ma ndola Magham nu̱ke sar da nyin na nda ɓa nda ɓa.

²¹ Yang Masiya wa vu̱r bibiti yerem za: Kap njif nu̱ke a ndola Magham, wa ku̱s ku̱ ndola mu̱dlen tu̱k.