1 Yokhana 3 - Mewar Alqawarang

Qusonggi ɓu̱ Magham

¹ Nggu̱t ma pooni ndolar maɗyikandi nu̱ Zhinkirang wutki yerem nu̱ka qaki rem za chem qusonggi ɓu̱ Magham, yang chem wanang shwat. Nduki nu̱ larji nu̱ zu̱nderem ku ɓa ku̱me nu̱ zu̱n nda ku ɓa.

² Raptaku nu̱ke nga ndolaran, leendang chem qusonggi ɓu̱ Magham. Nu̱ wut ɗyi nu̱ke chem ka khaki gana fan dong ɓa. Yang chem wa zu̱n nu̱ ɗyine mbu̱ Masiya a gaɓi chem ka kha wa chin, ku̱me chem ka na nda wa nu̱ke a si.

³ Kap njif nu̱ saki memu̱naran nu̱ ɗyine Masiya wa ka shi khar shakhshakhndi wa nu̱ke chin shakhshakh.

⁴ Nu̱ shir sola kap ɗya nu̱ zhangndi mbu bibiti. Wanang shwat, sola ɗya zhangndi mbu bibiti ɓu̱ Magham gha.

⁵ Tun wa zu̱n nu̱ ɗyine Yesu a ɓa ma ku̱ da nji solarku ɓaarem ɓara, yang sola nje mbe nda ɓa.

⁶ Ku̱me nang kap njif nu̱ke a khar mbe Masiya ɓu̱ zu̱m guma ndu̱ sola ɓa. Kap njif nu̱ zu̱mki guma ndu̱ sola, nu̱ na Yesu sar da ɓa, yang nu̱ zu̱n nda tu̱k sar da ɓa.

⁷ Tun qusonggi ɓang nu̱ke nga ndolaran, ku̱ aaki lamba nu ɓa. Nu̱ shir zhire ɗya nu̱ dambi ba wa nu̱ke Masiya ɗya nu̱ dambi.

⁸ Sheɗan ɗya nu̱ sola gumapaali, ku̱me nang kap njif nu̱ zu̱mki guma ndu̱ shir sola ɗya ɓu̱ Sheɗan. Ɗyi nu̱ saki tu̱ Yi ɓu̱ Magham a ɓa larji ma ku̱ su̱ya tlu̱nar ɓu̱ Sheɗan nu̱gha.

⁹ Kap njif nu̱ke ɗya yi ɓu̱ Magham ɓu̱ zu̱m guma ndu̱ sola ɓa, ku̱me ye pooni ɓu̱ Magham a nje mbe nda. Ɓu̱ ɗu̱ma zu̱m guma ndu̱ sola ɓa ku̱me wa kha ma yi ɓu̱ Magham.

¹⁰ Wonji ɗyi nu̱ saki chem zu̱n qusonggi ɓu̱ Magham ndu̱ qusonggi ɓu̱ Sheɗan. Kap njif nu̱ke nu̱ka shi ɗyi nu̱ke torop ɓa, ɗya yi ɓu̱ Magham ɓa, yang njif nu̱ke nu̱ ka ndola mu̱dlen ɓa, ɗya yi ɓu̱ Magham tu̱k zum ɓa.

Ndola ma Yen

¹¹ Nang ke ɓalar nun tu̱kki gumapaali: Wa shipa ku̱ ndola nu yen.

¹² Ku̱ kha nu wa Kayinu nu̱ gaɓki ma ɓu̱ Sheɗan tu̱ tlagha khachinang nu̱gha ɓa. Nu̱m saki tu̱ tlagha mu̱dlenang nu̱gha? Tlagha nda ku̱me tlu̱nar ɓaran maatlin, yang ɓu̱ khachinang mbari.

¹³ Tun nyeezaku, ku̱ shi nu lazham ɓa mbu̱ nduki nu̱ larji wa zhangndo nu.

¹⁴ Chem wa zu̱n nu̱ ɗyine chem wa peeta mu̱ti ma yir she nyifiri ku̱me chem a ndola nyeezerem. Njif nu̱ke nu̱ka ndola nyeezan ɓa, a mbu̱ bu̱n mu̱ti ma ɓar ye meeni.

¹⁵ Aa nyi nduk nu̱ zhangki mu̱dlen ɗya nu̱ tlaghar mu̱ɗi. Yang tun wa zu̱n nu̱ ɗyine nu̱ tlaghar mu̱ɗi a nje nu̱ke ka khaki ndu̱ nyifi nu̱ke nu̱ka shi woɗa ɓa mbe nda ɓa.

¹⁶ Wonji ɗyi nu̱ saki chem zu̱n nu̱m ke ndola, Yesu Masiya wa vu̱r nyifi ɓaran ku̱me chem. Wa shipa chem tu̱k vu̱r mi nyifi ɓaarem ku̱me nyeezerem.

¹⁷ Mbu̱ njif nu̱ke ɗyin me khar kha nda wa na mu̱dlen a mbu̱ song tu̱ yang zhang shaata nda gha, ndolar ɓu̱ Magham a nje mbe nda shoɗa?

¹⁸ Tun qusonggi ɓang nu̱ke nga ndolaran wut nu ndolar ɓaanu ve me ɗyenda ɓa, wut ma mbu̱ tlu̱nar ɓaanu ndu̱ shir zhire.

¹⁹ Nang ke njiv nyem zu̱nki nu̱ ɗyine chem nu̱ zhire, yang aa gume Magham memu̱narem da vaarem zu̱ran,

²⁰ aa ye sarchi nu̱ memu̱narem wutki za chem zopan. Chem wa zu̱n nu̱ ɗyine Magham wa duk memu̱narem yang wa zu̱n aa nu̱m tu̱k.

²¹ Raptaku nu̱ke nga ndolaran, mbu̱ memu̱narem nu̱ wut yerem za chem zopan ɓa, chem ka kha ndu̱ shokhku̱rokh memu̱na gume Magham.

²² Chem wa ka gwa ɗyi nyem khuɗki she nda kap, ku̱me chem a mbu zu̱r ɓaran, chem a shi ɗyi nu̱ke a shimndan.

²³ Nang ke ɗyi nu̱ Magham zu̱ki za shem chin ke ku̱ maita mi dlu̱m Yi ɓaran Yesu Masiya, chem ndola yen tu̱k wa nu̱ Masiya zu̱ki yerem.

²⁴ Kap nu̱ mbu zu̱r ɓaranku kharan mbe nda, chin kharan mbe wor tu̱k. Wonji ɗyi nu̱ saki chem zu̱n za shwat a nje kharan mbe rem, chem zu̱n nu̱ ku̱nshe Jiimbi nu̱ vu̱rki yerem.