1 Yokhana 2 - Mewar Alqawarang

Masiya ke nu̱ Shaatarem

¹ Qusonggi ɓang nu̱ke nga ndolaran, nga bu̱lar nang ye nu ma ku̱ shi nu sola ɓa. Mbu̱ yang njif nggur wa shi sola, nu̱ shaatar a nje khaarem nu̱ke ka chingki yerem gume Zhinkirang, chin ke, Yesu Masiya, Nu̱ Dambyang.

² Chin ke sadke yaapar solar ɓaarem yerem, yang ɓaarem ɗyenda ɓa, ndu̱ solarku ɓu̱ larji gumada.

³ Mbu̱ chem wa mbu zu̱r ɓu̱ Magham, nang ka wut nu̱ ɗyine chem wa zu̱n nda.

⁴ Kap njif nu̱ zu̱ki za, “Nga zu̱n Magham,” yang nu̱ka mbu zu̱r ɓu̱ Magham ɓa, njif nang ɗya nu̱ wollo, yang zhire nje mbe nda ɓa.

⁵ Yang njif nu̱ mbuki ɓalar ɓu̱ Magham, zhire ndolar ɓu̱ Magham wa kha nyeedlan mbe nda. Shir wanang ka sa chem zu̱n chem kharan mbe nda.

⁶ Kap njif nu̱ zu̱ki za chin a khar mbe Magham, wa ku̱s ku̱ shi yir wa nu̱ Masiya Yesu shiki.

Mewar Bibiti

⁷ Tun raptaku nu̱ke nga ndolaran, nga bu̱lar nang ma vu̱r nga bibiti nggur ye nu ɓa. Ai, ɗya ba bibiti nu̱ zhu nu̱ vu̱rki ye nu gumapaali. Yang bibiti nu̱ zhu nang ɗya ba bibiti nun woɗaki tu̱ktan.

⁸ Yang kap ndu̱ nang nga bu̱lakyang bibiti mewakandi ye nu. Nduk ka na zhire nang nu̱ mbe nda ndu̱ tunu, ku̱me zhum maari a peetari, yarang zhirekandi wa nggaasi wuti.

⁹ Njif nu̱ zu̱ki za chin a mbu̱ yarang, yang a zhang mu̱dlen, a mbu̱ zhum ma ɓar meeni.

¹⁰ Yang kap njif nu̱ke a ndola mu̱dlen, kharan mbu̱ yarang, tun a nje nu̱ke ka jiiki saran ɓa.

¹¹ Njif nu̱ke a zhang mu̱dlen kharan mbu̱ zhumi, yang a yir mbu̱ zhum tu̱k, nu̱ zu̱n ye maa nu̱ke chin a yir su̱ ɓa, ku̱me zhum maarang wa sa nda tu̱ kha puguman.

¹² Qusonggi ɓang nu̱ke nga ndolaran, nga bu̱laran ye nu, ku̱me wa yaapa solarku ɓaanu ye nu barke ɓu̱ dlu̱m Yesu.

¹³ Tun zhinkirku, nga bu̱laran ye nu ku̱me tun wa zu̱n chin nu̱ke a nje ji vu̱ nggarsan. Tun nyakhtlirku, nga bu̱laran ye nu ku̱me tun wa zu̱m loobo ɗyine Nu̱ mu̱nar nang. Tun qusongga, nga bu̱laran ye nu ku̱me tun wa zu̱n Zhinkirang.

¹⁴ Tun zhinkirku, nga bu̱laran ye nu ku̱me tun wa zu̱n chin nu̱ke a nje gumapaali. Tun nyakhtlirku, nga bu̱laran ye nu ku̱me tun du̱mbu̱ran, yang ɓalar ɓu̱ Magham a nje kharan mbu̱ memu̱na nu, tun wa ra Nu̱ mu̱nar nang.

¹⁵ Ndola nu larji ɓa, yang aa nyi ɗyi nu̱ke a mban zum ɓa. Kap njif nu̱ke a ndola larji, ndolar Zhinkirang a nje mbe nda ɓa.

¹⁶ Jiwa kap ɗyiku nu̱ke a larji, shir ɗyi nu̱ke man vaarem a shimndan, ndu̱ ɗyi nu̱ke yiterem naki tu̱ melakh ɗyen, ndu̱ wakhti ndu̱ ɗyi nyem gwaki. Ɗyiku nang nu̱ ɗa vi she Magham ɓa, a vi she larji.

¹⁷ Chin larji ndu̱ ɗye melakhku malkandi nu̱ke a mban a peetar ku, yang njif nu̱ke a shi ɗyi nu̱ke Magham a shimndan, ka gwa nyifi nu̱ke nu̱ka shi woɗa ɓa.

Duti Dlu̱mndi ɗyine Ɓar ɓu̱ nu̱ Zhangndi Masiya

¹⁸ Tun qusonggi ɓanga, nang ke lauɗar su̱ qaandi virkirku. Ba wa nun tu̱kki za, nu̱ zhangndi Masiya a nje a ɓari, yang aa leendang nu̱ zhangndi Masiya ku khang a ɓa. Nang ke ɗyi nu̱ saki chem zu̱n za chem a mbu̱ lauɗar su̱ qaandiku.

¹⁹ Vi ɓar chele ɓaarem ku ku̱me zhireni ɗya ɓaarem ku ɓa. Meeni mbu̱ za ɗya ɓaarem ku tu̱ga wa kha gha ku su̱yen ndu̱ chemi, Yang yir vaandang wa wut nu̱ ɗyine ɗya ɓaarem ku ɓa.

²⁰ Yang ɓaanu, Njif shakhshakhndi nang wa pu ɗyinonu nu̱gha. Ku̱me nang kap ɓaanu tun wa zu̱n zhire.

²¹ Nang bu̱la ye nu ku̱me nun zu̱n zhire ɓa ɓa, nga bu̱la ku̱me tun wa zu̱n zhire. Tun wa zu̱n nu̱ ɗyine zhire nu̱ka kha ma wollo ɓa.

²² Ki ke nu̱ wollo? Ɗya njif nu̱ kelaki za Yesu ke Masiya. Njif nu̱ kelaki Zhinkirang ndu̱ Woyang, nang ke nu̱ zhangndi Masiya.

²³ Nduk a nje ka zhangki Woyang, tu̱ gwa Zhinkirang ɓa. Yang kap njif nu̱ dlu̱ki Woyang, wa dlu̱ Zhinkirang tu̱k.

²⁴ Zu̱m ma guma ndu̱ mbu shogar nun tu̱kki ji vu̱ nggarsan. Mbu̱ shogar nun dlu̱ki gumapaali a nje memu̱na nu, tun ka khan mbe Woyang ndu̱ Zhinkirang tu̱k.

²⁵ Nang ke alqawar nu̱ Woyang shiki yerem, chin ke nyifi nu̱ke nu̱ka shi woɗa ɓa.

²⁶ Nga bu̱la ɗyikunang ye nu nu̱ ɗyine nduki nu̱ke a shim lamba nu ma gal nu gha.

²⁷ Yang ɓaanu Masiya wa vu̱r Jiimbi shakhshakhndi nu̱ mbe nu, ku̱me nang tun a gang maalu̱m nggur zumndi ma ku̱ shoga ye nu ɓa. Jiimbi nu̱ vu̱rkyang ka shoga aa nu̱m ndu̱ aa nu̱m ye nu, yang shogar ɓaranang ɗya zhire, nu̱ka shi wollo ɓa. Ku̱me nang zu̱m ma guma ndu̱ khar mbe Yesu ba wa nu̱ Jiimbyang shogaki ye nu.

²⁸ Leendang, tun qusonggi ɓang nu̱ke nga ndolaran zu̱m ma guma ndu̱ khar mbe Masiya, ku̱me fu̱ɗa ɓar ɓaran chem ɓu̱ tu̱k kawa ɓa chem ka kha ndu̱ shokhku̱rokh memu̱na gume nda.

²⁹ Mbu̱ tun wa zu̱n nu̱ ɗyine Chin ɗya nu̱ dambi, tun ka zu̱n shwat nu̱ ɗyine njif nu̱ka shiki ɗyi nu̱ke torop ɗya yi ɓu̱ Magham.