1 Yokhana 1 - Mewar Alqawarang

Ɓalar nu̱ka Vu̱rki Nyifiri

¹ Chem a shikya ɓalar ye nu ɗyine njif nu̱ke a nje gumapaali, nyem tu̱kki, chem na ndu̱ yiterem, chem nggu̱ti nda chem su̱ɓa ndu̱ khaarem. Chem a shikya bu̱lar ye nu ɗyine Ɓalar nu̱ vu̱rti Nyifiri.

² Yang wa wut nyifi nang yerem, chem wa na nda. Chem a saidakya nda chem a zu̱ran ye nu nu̱ ɗyine chin ke nu̱ nyifiri nu̱ke nu̱ka shi woɗa ɓa. A nje su̱yen ndu̱ Zhinkirang mbu̱r fara, yang tu̱ wut varan yerem.

³ Chem a zu̱kya ɗyi nyem tu̱kki, chem na ye nu, ku̱me chem a shim ku̱ kha mi su̱yen. Yang khar ɓaaremang su̱yen ndu̱ Magham Zhinki, ndu̱ Yi ɓaran Yesu Masiya.

⁴ Yang chem a bu̱lar nang ma ku̱ kashar ɓaarem kha nyeedlan.

Yir mbu̱ Yarangi

⁵ Nang ke ɓalar nyem tu̱kki she nda chem zu̱ ye nu, Magham ɗya yarang, zhum maa nje mbe nda sar da ɓa.

⁶ Ku̱me nang mbu̱ chem wa zu̱ za chem a khar su̱yen ndu̱ Magham, yang chem zu̱m guma ndu̱ khar mbu̱ zhumi, chem a shikya wollo, nyem mbu zhire ɓa.

⁷ Yang mbu chem a yir ɓaarem mbu̱ yarang ba wa nu̱ke Magham a mbu̱ yarang, chem a khar ndu̱ yen ɗo. Tom ɓu̱ Yesu Yi ɓaran a shibterem nu̱gha mbe aa nyi sola.

⁸ Mbu̱ chem wa zu̱ nyem za sola ve rem ɓa, chem a lambakya ɗyinerem, yang zhire mbe rem ɓa.

⁹ Yang mbu̱ chem wa zu̱ solarku ɓaarem ye Magham, ai, ɗya nu̱ nyedli alqawar, nu̱ shir zhire, ka yaapa solar ɓaarem yerem, tu̱ shibterem nu̱gha mbe song dambi ɓaarem kap.

¹⁰ Mbu̱ chem wa zu̱ nyem za nyem shi sola ɓa, chem wa gaɓ ndu̱ chin ma nu̱ wollo, yang ɓalar ɓaran a nje mbu̱ memu̱narem ɓa.