1 Timoti 5 - Mewar Alqawarang

Shogar Khar ndu̱ Ku̱du̱wku, ndu̱ Nduk Kudaandiku, ndu̱ Maaviku

¹ Wu na geema nu̱ shokhna ɓa, to shi ɓalar yenda wa ɗya zhu nu̱ khaki ro. To shi ɓalar ye nyakhtlirku wa nyeezoro,

² geema nusuku wa mankirku, wonkharku wa nyeezoro, ndu̱ shakhshakh memu̱na maɗyi.

³ To ɗang ku̱du̱w nusuki nu̱ke nu̱ shaata kha wor ɓa mbari.

⁴ Mbu̱ yang qusonggya nje kha ku̱du̱wang, aa ɗya zhikankirku, ku̱ qusonggyang nggasi shoga tlu̱nar ghaari ghai ɓaanda nu̱ ku̱nshe nggu̱ti kheeti ɓaanda. Shir wanang ka sa ku̱du̱wang tu̱ gwa shaatar ku ba wa nu̱ shaataki wor guma fara. Magham wa ka tu̱k mu̱ndan maɗyi.

⁵ Ku̱du̱w nokhzi nu̱ke nduk kha nda ɓa yang nu̱ shaata kha nda ɓa, ka sa memu̱naran ye Magham, a khuti nda ndu̱ bararku virkir ndu̱ fu̱ɗari ma ku̱ gwa nji shaatari.

⁶ Yang ku̱du̱w nokhzi nu̱ke a khar tu̱kti mu̱ndi ɓaran, mu̱tan aa nu̱ke a nje khurma.

⁷ To zu̱ ɓalarku nangang ye wora ma ku̱ nduki na wor ma nu̱ zop ɓa.

⁸ Aaki nu̱ke nu̱ka ɗang kheeti ɓaran ɓa, nu̱ shi wa rafti ɓaran ɓa, njif nang wa keela maito nyin shiki tu̱ duk njif nu̱ke nu̱ maita ɓa maatli.

⁹ Ɓu̱ shiga nusu nu̱ mbu̱ ku̱du̱w ɓa kope sonyi ɓaran wa peeta ɗyin njong, yang wa shi khar mbarkandi ndu̱ zhimen nu̱ mu̱tkyang.

¹⁰ Wa kha zu̱ndan mbe tlu̱nar ɗyi mbarkandi, wa mola qusonggi ɓaran mbari, ndu̱ dlu̱r runggiku. Kom ndu̱ tlu̱nar shaata ye nu̱ mbu Yesu ku, ndu̱ shaata nduki nu̱ke a mbu̱ damtari, ndu̱ vu̱rti ɗyinan ma shi ɗyi mbarkandi ve aa nyi njiva.

¹¹ Yang sa na ku̱du̱w nusuki nu̱ke a mbu̱ du̱mbu̱r ɓaanda mbu̱ shigar nang ɓa, ku̱me sarchi nu̱ke shimndi ɗyi nu̱ mbu memu̱na wora dukki vu̱rti ɗyin wor ye Masiya ka shim ku̱ shi nda ɓu̱rti.

¹² Shir wanang ka sa tu̱ ɗa dut kumar ye ɗyin wora, ku̱me wa ku̱na nyel alqawar nu̱ daki ku gumapaalyang.

¹³ Qu̱rse nang, wa ka shoga khar bamndiku tu̱ ka baara maa ku a viri rafa rafa. Yang khar bamndang ɗyenda ɓa, wa ka shi ndaane ku, tu̱ ji fan tu̱ ɗu̱ fan a ɓalarku nu̱ke nu̱ shipa ɓa.

¹⁴ Nga shim tu̱ga ku̱ ku̱du̱w nusuku nu̱ke a mbu̱ du̱mbu̱r ɓaanda shi ɓu̱rti ku, tu̱ kha qusonggi, tu̱ nggu̱t rafti ɓaanda, ma ku̱ nu̱ zhangndi ɓaaremang gwa ɓalar malkandi nu̱ke ka shiki ɗyine rem ɓa.

¹⁵ Ku̱me ɓeenan ku wa mbu̱m a mbu Sheɗan ku ɗo.

¹⁶ Mbu̱ nokhzi nggur a nje nu̱ mbu Yesu nu̱ke ku̱du̱w nusuku a nje mbu̱ kheetiku ɓaanda, ku̱ nokhzi nang shaata wora, tu̱ da taɗar ɓaanda ɓar ɗyine tabar ɓu̱ nu̱ mbu Yesu ku. Shir wanang ka sa tu̱ tabar ɓu̱ nu̱ mbu Yesu kwang gwa zalale shaatar ku̱du̱w nusuku nu̱ke nu̱ shaata kha wor ɓa mbari.

¹⁷ Vu̱r ma gorkiri su̱yen nu̱ wuti kunari ye nduk kudaandiku nu̱ke a tlu̱nar mbu̱ tabar ɓu̱ nu̱ mbu Yesu ku mbari, nu̱ shi wa nduki nu̱ka wopaki ɓalar ndu̱ shogaran ɓar ɓa.

¹⁸ Bu̱lar ɓalar ɓu̱ Magham wa zu̱ za, “Sa na kutuk ye me dla sarchi nu̱ke a tlu̱na ɓa,” kom ndu̱ “Nu̱ tlu̱na wa shipa gwa ɗye ɓi ɓaran.”

¹⁹ Ku̱ tlogha na dar zhaano nu̱ ɗyine nduk gori nu̱ke a tlu̱nar mbu̱ Tabar ɓu̱ nu̱ mbu Yesu ɓa, kope ta gwa saiduku rap ma yir kunung.

²⁰ Yang nduki nu̱ shiki sola, to wu wor gume nduki, ma ku̱ ɓeenan tu̱k sawa.

²¹ Nga ɓalar nang yoro gume Magham ndu̱ Masiya Yesu ndu̱ nu̱ ru̱ktiku ɓu̱ Magham nu̱ datki, yang to mbu ɗyiku nang ndolar ɗyin su̱ ɓa, yang wut na ta shim njif nggur tu̱ duk njif nggur ɓa.

²² Shi na wakho daati dle gume ma sa khar barke nu̱ ɗyine nda ɓa, yang sa na va nu̱ mbu̱ solar ɓu̱ njif nggur ɓa, to bu vaaro to kha shakhshakh.

²³ Ki na za ɗyim bamndi ɗyenda ɓa, yang to ki za ɗyim anap koɗom ku̱me khaati mbi nu̱ke a damtaro ndu̱ va nu̱ka shiki khang khatang.

²⁴ Solar ɓu̱ ɓeeni nduki a ye dalangi, aaki wa zu̱ni me ku̱ kuma wora. Yang ɓu̱ ɓeeni ndukyang kaɗa vi ye dalang gana fan.

²⁵ Wanang tu̱k, tlu̱narku mbarkandi a ye dalangi, yang aa nu̱ke nduki shiki mbu̱ tuka nu̱ka shi tuka ɓa.