1 Timoti 4 - Mewar Alqawarang

Wuri nu̱ ɗyine Maalu̱mku nu̱ Shogar Galkandi

¹ Nang ɗo, Jiimbyang wa wut ye dalangi za ye lauɗar su̱ qaandi virkirku ɓeeni nduki ka njig maita ɗyi nyem maitaki, tu̱ mbu jiimbiku nu̱ lambari ndu̱ shogar ɓu̱ khu̱kheetiku.

² Pooni shogarku nang kaɗa vi she nu̱ lambarku nu̱ mu̱nar bamndi nu̱ke konyi mbarkandi ɓaanda mu̱tan, wa no za va nu̱ gha ndu̱ vi nu̱ke ɓai a si.

³ Pooni nduki nang wa ka nggu̱tl ndukiku shir ɓu̱rti ndu̱ zu̱mndi ɓeeni ɗye zu̱mndiku, yang Magham shiki ɗye zu̱mndiku nang ma ku̱ nduki nu̱ maitaki tu̱ zu̱n zhire ku tu̱ dlu̱ ku ndu̱ kuna.

⁴ Ai ɗyi nu̱ Magham du̱ngki kap mbari yang tun a nje nu̱ke nduk ka zhangki ɓa mbu̱ nduk wa dlu̱ ndu̱ kuna,

⁵ ku̱me wa kha shakhshakh nu̱ ku̱nshe ɓalar ɓu̱ Magham ndu̱ barari.

Nu̱ Tlu̱nar Mbarkandi ɓu̱ Masiya Yesu

⁶ Mbu̱ ta wut ɗyiku nang ye nyeezerem to ka kha ma nu̱ tlu̱nar mbarkandi ɓu̱ Masiya Yesu, nu̱ gorki mbu̱ ɓalar maito nang ndu̱ shogar mbarkandi nu̱ke ta khutloran ma ɓar meeni.

⁷ Shi ɓakh ndu̱ shinjiku bamndi nu̱ke boota su̱ ɓa yang zu̱ndi Magham a nje mban ɓa. Me ɓu̱ nang to khutlo vaaro to kha ndu̱ pooni khar viti nu̱ke Magham a shimndan.

⁸ Ɗakhti mbu̱ va boota su̱ koɗom, yang khar viti nu̱ke Magham a shimndan boota su̱ ve aa nyi njiva, ku̱me wa shi alqawar barke ye nduk mbu̱ khar viti ɓaarem fan larji ndu̱ fu̱ɗar wuri.

⁹ Ɓalar nang ɗya ndooga shwat: wa ku̱s ku̱ nduk dlu̱ri nda guma da.

¹⁰ (Chem a bonye ndu̱ wute), ku̱me chem a sa memu̱narem ye Magham nu̱ nyifiri chin nu̱ke ɗya nu̱ ɗanar aaki, yang nu̱ shi wa nduki nu̱ maitaki ɓa.

¹¹ To wopa, to shoga ɗyiku nang ye nduki.

¹² Njig na tu̱ njif nggur ndu̱mndor ku̱me to woi ɓa, yang to kha ma ɗye shoga chele ɓu̱ nu̱ mbu Yesu ku, mbe ɓala, ndu̱ khar viti ɓaaro, ndu̱ wuti ndola, ndu̱ maito, ndu̱ khar viti shakhshakhndi.

¹³ To ki karanta Bu̱lar ɓalar ɓu̱ Magham ye nduki, ta wopa ɓalarang ndu̱ shogaran ɓara kope nga gaɓi.

¹⁴ Ku̱ njig na vu̱rti nu̱ke a mbe ro no gwaki nu̱ ku̱nshe ɗyi nu̱ Magham zu̱ki sarchi nu̱ nduk kudaandikwang saki khar barke yorang ɓa.

¹⁵ To ku̱s ɗyiku nang maɗyi, to vu̱r va kap ye wora, ma ku̱ aaki na zu̱mndi gume ɓaaro.

¹⁶ To ku̱r vaaro ndu̱ shogar nu̱ke ta shiran. Gu̱n soro to zu̱m guma ndu̱ ɗyiku nang, ku̱me mbu̱ ta shi wanang, to ka ɗana vaaro ndu̱ nduki nu̱ke a gwa dlu̱mdi wor yoro.