1 Timoti 3 - Mewar Alqawarang

Ɗyiku nu̱ Shipaki Dle gume ɓu̱ nu̱ Mbu Yesu ku

¹ Ɓalar nang ɗya ndooga shwat: kap njif nu̱ shimki ku̱ kha nji ma dle guma a shimkya ɗyi nu̱ke zhaaji si maɗyi.

² Ku̱ dle guma kha waare zop gume nduki, nokhzan da, ku̱ kha ɗya njif nu̱ke varan buran, ɗyinan ku̱san, nduk mbarkandi, nu̱ dlu̱r runggiku, njif nu̱ke ka ɗu̱maki shogar ye nduki maɗyi.

³ Ku̱ kha ma njif nu̱ke nu̱ka za ɗyema ɓa, yang nu̱ lu̱kshi ɓa nu̱ ɗu̱bar memu̱na, njif nu̱ke varan buran nu̱ka shim keele ɓa, yang nu̱ vu̱r varan ye ndolar mu̱zhin ɓa.

⁴ Wa ku̱s ku̱ ɗu̱ma khuɓ rafti ɓaran mbari, tu̱ qusonggi ɓaran kha ma nu̱ mburi su̱quran a vu̱r gorkir yenda ve aa nyi njiva.

⁵ (Ku̱me mbu̱ nduk nu̱ ɗu̱ma khuɓ rafti ɓaran ɓa, ɗa ka ɗu̱ma khuɓ Tabar ɓu̱ nduki ɓu̱ Magham kikimndana?)

⁶ Ku̱ kha ma njif nu̱ dlu̱ki Yesu mewa ɓa, mbu̱ wanang ɓa bai gwaari ɗyin ka sa nda tu̱ gwa kumar nu̱ shiki ye Sheɗan.

⁷ Wa Ku̱s ku̱ dle guma kha ndu̱ saidu mbarkandi gume nduki nu̱ke ɗya nu̱ mbu Yesu ku ɓa, ku̱me ku̱ shi ɗye kawa tu̱ nggu̱ɗ nu̱ mbu̱ shaanggir ɓu̱ Sheɗan ɓa.

⁸ Wanang tu̱k, wa ku̱s ku̱ nu̱ shaatar ɓu̱ dle gume ɓu̱ Tabar ɓu̱ nu̱ mbu Yesu kha ma nduki nu̱ke nduki a na zhaaji ɓaanda. Ku̱ kha ma nu̱ zhire, ku̱ kha ma nu̱ khang zar ɗyema ɓa yang nu̱ka shi batal ma gwa nji mu̱zhin ɓa.

⁹ Wa ku̱s ku̱ khuɓ zhire du̱mbu̱rkandi na viki ye dalang mbu̱ maito nang ndu̱ konyi mbarkandi.

¹⁰ Wa ku̱s ku̱ buu nu̱ tlu̱narku nang dong, mbu̱ nu̱ gwa zop mbe wor ɓa, kom tu̱ ku̱s tlu̱nar ku.

¹¹ Ku̱ nusuki ɓaanda tu̱k kha ndu̱ zhaaji, ku̱ kha ma nu̱ gu̱ndi virki ku ɓa, ku̱ ku̱s vaanda tu̱ shi zhire mbe ɗyi nu̱ke a shiran ku kap.

¹² Wa ku̱s ku̱ nu̱ shaatar nu̱ tlu̱nar ku nu̱ mbu̱ tabar ɓu̱ nu̱ mbu Yesu kha ma nu̱ nokhzi da, ku̱ khuɓ rafti ɓaran ndu̱ qusonggi ɓaran maɗyi.

¹³ Nduki nu̱ shiki tlu̱nar mbarkandi mbu̱ tabar ɓu̱ nu̱ mbu Yesu wa ka gwa dlu̱m mbarkandi tu̱ ka vu̱r du̱mbu̱r ye wor tu̱ shi ɓalar maitar Masiya Yesu nu̱ wor shiki sawa su̱ ɓa.

Ɗyi Tukakandi nu̱ mbu̱ Maito nyem Shiki.

¹⁴ Nga bu̱la ɓalarku nang yoro, aa nu̱ke nga sa memu̱nara nu̱ ɗyine ngga ɗa ɓa ɓu̱ shoɓ ɓa.

¹⁵ Mbu̱ yang wa khubti nga nu̱ gha ku, wa shipa ku̱ zu̱n na ɗyi nu̱ shipaki ku̱ nduki shi mbu̱ rafti ɓu̱ Magham. Nu̱ke nang ke tabar ɓu̱ nduki ɓu̱ Magham nu̱ nyifiri, yang chin ke zaure ndu̱ dlu̱dlarsi zhire tu̱k.

¹⁶ Keele su̱ ɓa, ɗyi tukakandi nu̱ mbu̱ ghaari ghai ɓaarem gor maɗyi: Wa wut varan mbu̱ man va, Jiimbyang wa wut za chin nu̱ zhire. Tu̱ nu̱ ru̱ktiku ɓu̱ Magham na nda, tu̱ wopa nda ye nduki nu̱ larji, tu̱ nduki maita nda mbu̱ larji kap, tu̱ da nda ma yir viɗi mbu̱ zhaaji.