1 Timoti 2 - Mewar Alqawarang

Shogar ɗyine Ghaari ghai ye Magham

¹ Gumapaali, nga pa du̱mbu̱r ye nu ma ku̱ shi nu, khuti ndu̱ barari, tun a barar ku̱me nduki ndu̱ kunar ye Magham ku̱me ɗyi nu̱ shiki ye aa nyi nduku.

² Tun shi wanang tu̱k ye kujiku ndu̱ nu̱ kwaaɗarku kap, ma ku̱ gwa mi khar mu̱ndi ndu̱ qaandi memu̱nar mbu̱ sawar Magham maɗyikandi ndu̱ khar viti shakhshakhndi ve aa nyi njiva.

³ Ɗyi nang mbari, ku̱me Magham nu̱ Ɗanar ɓaarem wa ka tu̱k mu̱ndan maɗyi,

⁴ chin nu̱ke a shim ku̱ aaki gwa ɗanari, tu̱ zu̱n zhire tu̱k.

⁵ Jiwa Magham kaada, nduk kaada tu̱k ke nu̱ chingndi nu̱ chele ɓu̱ nduk ndu̱ Magham, nang ke khuski nang Masiya Yesu.

⁶ Chin vu̱rki nyifi ɓaran ma dli ɗyin nduki kap. Nang ke saidu nu̱ Magham vu̱rki ye larji mbu̱ sarchi ni.

⁷ Nang ke ɗyi nu̱ saki tu̱ daati nga tang kha ma pude ndu̱ nu̱ wopar ɓalarang. Nga ke maalu̱m nu̱ shogar ye kap nduki nu̱ke ɗya Yakhudeku ɓa mbu̱ maito zhirekandi. Ɗyi nu̱ke nga zu̱ran nang ke zhire ni, kotama nje mban ɓa.

⁸ Nga shim aakochi ku̱ khuzuku aa fu̱n ghar khar wor shakhshakhndi nu̱ viɗi a bararku waare shokhnar ndu̱ keele.

⁹ Wanang tu̱k, nga shim ku̱ nusuku shi viri nu̱ shipaki, tu̱ sa ɗye sarku nu̱ shipaki, ku̱ shi khang sar ɗyiku ye dlebtiku ɓa, ndu̱ sar ɗye ginarwe, ndu̱ ndogdiku nu̱ zhaaji, ndu̱ ɗye sarku nu̱ me mu̱zhindi ɓa.

¹⁰ Me ɓu̱ nang, ku̱ tlu̱nakya ɗyi mbarkandi ku ba wa nu̱ shipaki nusuku nu̱ sawar Magham.

¹¹ Ku̱ nusu dlu̱ shogar mbe khar tu̱tu̱k ndu̱ vu̱rti zhaaji maɗyikandi.

¹² Nang vu̱r zalale ye nusu ku̱ shoga ɓar ɓa, yang ku̱ nusu kha ndu̱ zalale ɗyine khusku ɓa; ku̱ kha tu̱tu̱k.

¹³ Ku̱me du̱ngkya Adamu gumapaali kom tu̱ shi Khawa.

¹⁴ Nu̱ lamba Adamu ɓa, lambakya nokhzang tu̱ kha ma nu̱ sola.

¹⁵ Yang kap ndu̱ nang ka ɗana nusuku nu̱ ku̱nshe khar qusongga, mbu̱ wa zu̱m guma mbu̱ maito ndu̱ ndola ndu̱ khar shakhshakhndi, ndu̱ ku̱si ɗyin.