1 Tasalonikeku 5 - Mewar Alqawarang

Kha ma Daasaran ku̱me Ɓar ɓu̱ Zhinerem gwaanji

¹ Leendang, nyeezaku, ɗyine ɓalar sarchi ndu̱ fu̱ɗarku nu̱ke ɗyiku nang ka shiki nu̱ ku̱s ku̱ nduk bu̱la ye nu ɓa.

² Tun wa zu̱n nu ɗyine fu̱ɗar ɓu̱ Zhinkir gwaanji ka ɗa ɓa wa ɓar ɓu̱ nu̱ muuru chele virkiri.

³ Ye sarchi nu̱ke nduki a zu̱ran za, “Chem a khar mu̱nkandi memu̱narem qaandan.” Tu̱ mu̱ti ɓu̱tl nu̱ ve wora, ba wa nu̱ke khaati khar woi ka ku̱ski nu̱ ghu̱rɓandi nu̱ke a ma kha woi, yang ɓu̱ lawa ku mbe bonyang ɓa.

⁴ Ai, yang nyeezaku, ɓaanu tun a mbu̱ zhum maa ɓa, nu̱ke Fu̱ɗar nang ka ɗa ɓa ki ye nu wa nu̱ muuri.

⁵ Ku̱me kap ɓaanu tun qusonggi ɓu̱ yarang, ndu̱ ɓu̱ fu̱ɗa. Chem qusonggi ɓu̱ virkir ndu̱ zhum maa ɓa.

⁶ Ku̱me nang shi mi ɗyenir wa nu̱ke ɓeenanku a san ɓa, yang ku̱ shi mi khar ɓaarem daasaran mbe khar ku̱si ɗyin.

⁷ Jiwa nduki nu̱ke ka zhiki ɗyeni ka zhi ku virkiri, nu̱ kuyar ku tu̱k ka kuya ku virkiri.

⁸ Yang nu̱ke ɓaarem chem ɓu̱ fu̱ɗa, shi mi khar ku̱si ɗyin, chem sa lukti vi nu̱ maito ndu̱ ndolari. Tu̱ sar memu̱nar gwar ɗanari kha ma jere vi ɓaarem.

⁹ Jiwa Magham nu̱ shim ku̱ shokhnar ɓaran a ɓa nu̱ ɗyine rem ɓa, shimkya ku̱ gwa mi ɗanari nu̱ ku̱nshe Zhinerem gwaanji Yesu Masiya.

¹⁰ Wa mu̱t ku̱me chemi, ku̱me aa chem a nje ndu̱ nyifiri, aa chem wa zhi ɗyeniri, chem kha nu̱ su̱yen ndu̱ chin.

¹¹ Ku̱me nang pa ma du̱mbu̱r ye yen, tun ki du̱n yen, ba wa nu̱ke tun a shiran leendang.

Lauɗarsi Shogari ndu̱ Zoɓar qaandi

¹² Yang tu̱k nyeezaku, chem a khutonu tun vu̱r zhaaji ye nduki nu̱ke a bonye tlu̱nar chele ɓaanu, ndu̱ dlegumeku ɓaanu mbe Zhinerem gwaanji. Kom ndu̱ nduki nu̱ke a ɗu̱rtonu mbu̱ khar viti ɓaanu mbe njiv ɓu̱ Magham.

¹³ Tun khuɓ wor ndu̱ zhaaji maɗyi ndu̱ ndolar tu̱k ku̱me tlu̱nar nu̱ke a shiran kwang. Tun shi khar mu̱nkandi ndu̱ yen.

¹⁴ Chem a khutonu tu̱k, nyeezaku, wu ma nu̱ shimndi khar bam ku nang, tun pa du̱mbu̱r ye nduki nu̱ sawarku, tun shaata nduki nu̱ke khukhutan ku mbe maito, tun da kanaɗyi ndu̱ aaki.

¹⁵ Nggu̱t ma mbari ku̱ aaki dli gaɗa ye mu̱dlen ku̱me wa mu̱na nda ɓa, tun vu̱r vaanu ye shir mbarkir ye yen ndu̱ ɓeena nduki kap.

¹⁶ Tun kha ndu̱ ɓong memu̱na aakochi.

¹⁷ Tun ki barar laada su̱ ɓa.

¹⁸ Tun kuna Magham mbe aa nyi tunu, ku̱me nang ke shimndi ɓu̱ Magham ye nu mbe Masiya Yesu.

¹⁹ Datl nu me bu̱n Jiimbi shakhshakhndi mbe tlu̱nar ɓaran ɓa.

²⁰ Ku̱ ndu̱m nu zu̱r ɓu̱ Magham nu̱ ɗa ɓa ki ye nu ɓa.

²¹ Buu ma aa nu̱m dong, tun khuɓ ɗyi nu̱ke mbari.

²² Shakh ma ɗyinonu ndu̱ aa nyi ɗyi malkandi.

²³ Bu ku̱ Magham ndu̱ ɗyinan, chin nu̱ qaandi memu̱na, shibtonu nu̱ gha guma da. Bu ku̱ khutlo jiimbonu, ndu̱ nyifi ɓaanu, ndu̱ man vaanu kap, tun kha waare zop ye fu̱ɗar nu̱ke Zhinerem gwaanji Yesu Masiya ka ɗa gaɓki.

²⁴ Chin njif nu̱ qaki nwang ɗya nu̱ zhire, yang ka shi ɗyi nu̱ zu̱kyang.

²⁵ Nyeezaku, shi ma barar yerem.

²⁶ Tun shi qaandi ye nyeezerem kap ndu̱ pooni qaandi nu̱ ɗa viki mbe khaapar wuti ndolar shakhshakhndi.

²⁷ Nga khutonu mbu̱ dlu̱m Zhinerem gwaanji, tun karanta lagarkati nang ye nyeezerem kap ma ku̱ tu̱k ku.

²⁸ Ku̱ mu̱nkir ɓu̱ Zhinerem gwaanji Yesu Masiya kha gha su̱yen ndu̱ tunu.