1 Tasalonikeku 4 - Mewar Alqawarang

Pooni Khar Viti nu̱ke Magham a Shimndan

¹ Ye lauɗar san nyeezaku, chem wa shoga pooni khar viti nu̱ke Magham a shimndan ye nu, ba wa nu̱ke tun a khar ɓaanu. Leendang chem a qari su̱yen ndu̱ khuti ye nu mbe Zhinerem gwaanji Yesu tun shaata nu̱ si maɗyi.

² Jiwa tun wa zu̱n shogar nyem shiki ye nu ba wa nu̱ Zhinerem gwaanji Yesu vu̱rki zalale yerem ku̱ shoga mi.

³ Nang ke shimndi ɓu̱ Magham, tun kha shibtan, tun shakh ɗyinonu ndu̱ ɗye su̱bu̱rti vaanu.

⁴ Ɗya shimndi ɓu̱ Magham ku̱ aaki zu̱n njiv nu̱ke chin ka khaki ɗyinan ku̱san mbe shakhshakh ndu̱ zhaaji,

⁵ yang ku̱ kha nu ndu̱ shimndi zawa wa nu̱ke ku̱rjiku ka shiki ɓa, ku̱me nu̱ zu̱n Magham ku ɓa.

⁶ Ku̱ aaki taɓa mbu̱ mu̱dlen ɓa yang ku̱ wut me ghu̱rti ye mu̱dlen mbe ɗyinang ɓa, ku̱me Magham ka kuma pooni ɗyiku nang ɗo, ba wa nyem zu̱ki ye nu gumapaali, chem dut dlu̱mndo nang tu̱k.

⁷ Nu̱ Magham qa rem ma ku̱ kha mi ma nu̱ zopku ɓa, qa rem ma ku̱ kha mi shakhshakh.

⁸ Ku̱me nang aaki zhangki mbu shogar nang gha, zhangkya nduk ɓa, zhangkya Magham, chin nu̱ka vu̱rki Jiimbi ɓaran shakhshakhndi yenwang.

⁹ Ɗyine ɓalar ndolar yen wa khachinkirku, nu̱ ku̱s ku̱ bu̱lami ɗyen ye nu ɓa, ku̱me tun ndu̱ ɗyinonu Magham wa shoga ye nu za ku̱ ndola nu yen.

¹⁰ Yang ye zhire ni tun a ndola nyeezerem nu̱ke a mbu̱ dlar ghai Makidoniya. Yang tu̱k ba chem a khutonu, nyeezerem, shaatama nu̱ si maɗyi.

¹¹ Sa ma ye memu̱nanu ma ku̱ shi nu khar sheɗakandi, tun vu̱r vaanu nu̱ ve tlu̱nar nu̱ke a gume nu ɗyenda, tun a tlu̱nar ndu̱ khanu ba wa nyem zu̱ki za shi nu.

¹² Shir wanang ka sa tun kha ndu̱ zhaaji gume nduki nu̱ke ɗya nu̱ mbu Yesu ku ɓa, tun ɓu̱ kha ma shipit ye aaki zum ɓa.

Gaɓti ɓu̱ Zhinerem gwaanji

¹³ Yang nyeezaku, nang shim ku̱ kha nu waare zu̱ndi ɗyine nduki nu̱ zhiki ɗyenir ɓa, ku̱ memu̱na nu su̱bu̱r ku̱me wa mu̱t ku ɓa wa nduki nu̱ke ɗye sar memu̱na nje kha wor ɓa nda ɓa.

¹⁴ Ma nu̱ke chem wa maita nu̱ ɗyine Yesu wa mu̱ɗi, tu̱ ji ɓar mbe mu̱tang, wanang tu̱k mbe Yesu, Magham ka ɗa gaɓ ndu̱ nduki nu̱ shiki ɗyeniri, su̱yen ndu̱ Yesu.

¹⁵ Chem a zu̱ran ye nu tu̱k ba wa nu̱ ɓalar ɓu̱ Zhinkir gwaanji zu̱ki. Chem nu̱ke ka ɓa gwaki rem ndu̱ nyifiri sarchi nu̱ke Zhinerem gwaanji ka ɗa gaɓki, chem ɓu̱ kaya nduki nu̱ mu̱tki jiiri ɓar mbe ɗyenirang sar da ɓa.

¹⁶ Jiwa Zhinerem gwaanji ndu̱ ɗyinan ka ɗa zhur viɗi, ndu̱ qar maɗyikandi, ndu̱ su̱qur gorkir ɓu̱ nu̱ ru̱ktiku ɓu̱ Magham, ndu̱ piiri domndi ɓu̱ Magham. Nduki nu̱ mu̱tki mbe Masiya, ka nggaki su̱ jiiri gumapaali.

¹⁷ Kom chem nu̱ke chem a nje ndu̱ nyifiri ye sarchi ni, ka da rem su̱yen ndu̱ wor mbu̱ ku̱zapti, ma ku̱ gama mi ndu̱ Zhinerem gwaanji mu̱na viɗi mbu̱ khu̱kheeti. Chem ka kha gha su̱yen ndu̱ Zhinerem gwaanji koɗokhsi ɓa.

¹⁸ Ku̱me nang tun pa du̱mbu̱r ye yen ndu̱ ɓalar nang.