1 Tasalonikeku 3 - Mewar Alqawarang

¹ Ku̱me nang nyem ku̱naki gu̱n memu̱narem, chem na wa shi mbar ku̱ njigterem me ɗyinerem nu̱ Atina.

² Chem wa ru̱k Timoti khaterem, nu̱ke a tlu̱nar ndu̱ chem mbu̱ tlu̱nar ɓu̱ Magham nu̱ wopar Labar mbarkandi ɓu̱ Masiya. Ma ku̱ pa du̱mbu̱r ye nu, tu̱ vu̱r shokhku̱rokh me bu̱n ye nu mbe maito ɓaanu,

³ ma ku̱ bonye nang sa njif nggur tu̱ kha damtaran ɓa. Ai, tun ndu̱ ɗyinonu tun wa zu̱n za nang ke ɗyi nu̱ saki tu̱ daasa remi ye wora.

⁴ Jiwa sarchi nu̱ke chem a su̱yen ndu̱ tunu chem wa za zu̱ran ye nu, nyem za chem ka za bonye. Tu̱ yang ɗyen kha wanang, ba wa nun zu̱nki.

⁵ Nang ke ɗyi nu̱ saki nang kanaɗa ɓa, tang ru̱k ma tu̱k nga labar maito ɓaanu. Nga sawa ku̱ nu̱ lambar nang, chin Sheɗan lamba nu, ku̱ tlu̱nar ɓaarem kha bam ɓa.

Labar nu̱ Par Du̱mbu̱r nu̱ Ɗa gaɓki kha Timoti

⁶ Yang wonji Timoti a gaɓ nu̱ she rem ndu̱ labar mu̱nkandi ɗyine maito ɓaanu ndu̱ ndolar ɓaanu. Wa ze rem tu̱k za tun a kwaari mbarkandi ɗyine rem tu̱k aakochi, tun a kasha ku̱ na nu rem ba wa nu̱ke chem a kasha ku̱ na mi nu tu̱k.

⁷ Ku̱me nang, nyeezaku, mbu̱ bonye ɓaarem ndu̱ palase nyem zaki chem wa gwa du̱mbu̱r mbu̱ memu̱na rem ku̱me maito ɓaanu.

⁸ Yang leendang chem a nyifi shwat, ma nu̱ke tun a nje chingndan gha shanggu̱ɗang mbe Zhinkir gwaanji.

⁹ Chem ka shikya nyi pooni kuna ye Magham ku̱me pooni kashar nyem shiki gume Maghamndi ɓaarem ku̱me tuna?

¹⁰ Chem wa vu̱r vaarem ye barar virkir ndu̱ fu̱ɗari ku̱me gwa mi chem na nu yiti ndu̱ yiti, ma nyel mi ɗyi nu̱ kataki mbu̱ maito ɓaanu.

¹¹ Bu ku̱ Maghamndi ɓaarem ndu̱ Zhinerem nu̱ vaaran, ndu̱ Zhinerem gwaanji Yesu, daasa njiv ɓar ɓaarem she nu yerem.

¹² Bu ku̱ Zhinkir gwaanji sa tun shaata tun boosa mbe ndolar yen ndu̱ ndolar nduki kap, ba wa nyem ndolaki nu.

¹³ Bu ku̱ Magham vu̱r shokhku̱rokh memu̱nar ye nu tun kha waare zop, shakhshakh gume nda nu̱ke chin ke Zhinerem, ye fu̱ɗar nu̱ke Zhinerem gwaanji Yesu ka ɗa gaɓki su̱yen ndu̱ nduki ɓaran shakhshakhndi ku.