1 Tasalonikeku 1 - Mewar Alqawarang

Zoɓar Qaandi

¹ Lagarkati nang a vi she Bulus, ndu̱ Sila, ndu̱ Timoti. Ma yir she tabar ɓu̱ nu̱ mbu Yesu ku nu̱ke a Tasalonika, nu̱ maitaki Magham Zhinki ndu̱ Zhinerem gwaanji Yesu Masiya. Bu ku̱ mu̱nkir ndu̱ qaandi memu̱nar ɓu̱ Magham kha gha su̱yen ndu̱ tunu.

² Anyi sarchi chem a kuna Magham ku̱me tunu, kom ndu̱ barar ye nu aakochi.

³ Chem a kor tlu̱nar maito ɓaanu gume Maghamndi ɓaarem, ndu̱ Zhinkir ɓaarem, ndu̱ wute nu̱ke tun a san ku̱me ndola. Kom ndu̱ sar memu̱nar mbe kanaɗyi ku̱me sar memu̱nar nun shiki ɗyine Zhinerem gwaanji Yesu Masiya aakochi.

⁴ Tun nyeezerem nu̱ke Magham a ndolaran, chem wa zu̱n nu̱ ɗyine Magham wa daato nu,

⁵ ku̱me Labar mbarkandi nyem a ɓa ki su̱ ye nu. Nu̱ ɗa ɓa ye nu mbe ɓala ɗyenda ɓa, aa ɓa ye nu ndu̱ zalala, ndu̱ Jiimbi shakhshakhndi ndu̱ zhire nyelkandi shwat. Tun wa zu̱n pooni khar nyem shiki chele ɓaanu ma ku̱ gwa nu boote ni.

⁶ Yang tun wa da ɗyin sarerem, ndu̱ ɓu̱ Zhinkir gwaanji, tun wa dlu̱ ɓalar ɓu̱ Magham ndu̱ kashar nu̱ke Jiimbi shakhshakhndi ka saki ye nduku, aa nu̱ke tun wa za bonye maɗyi.

⁷ Shir wanang tu̱ sa nu tun kha ma ɗye shoga she nu̱ mbu Yesu ku nu̱ mbu̱ ghai Makidoniya ndu̱ Akaya.

⁸ Ku̱me ɓalar ɓu̱ Zhinkir gwaanji wa ɗu̱ aa fu̱n ku̱me tunu, nu̱ ɗu̱ mbu̱ ghai Makidoniya ndu̱ Akaya ɗyenda ɓa, nduki kap wa zu̱n maito ɓaanu mbe Magham, aa nyem zu̱ aa nu̱m nu̱ ɗyinan ɓa.

⁹ Ku̱me nduki kya zu̱ labar pooni dlu̱r nun shiki yerem, ndu̱ shakhti ɗyinonu nun shiki ndu̱ mu̱lu̱mku, tun gaɓ nu̱ she Magham. Ma ku̱ ghar nu ghai ye Maghamndi zhirekandi nu̱ nyifiri,

¹⁰ tun bu ɓar ɓu̱ Yi ɓaran nu̱ke a ɓar mbu̱ viɗi. Magham wa ji ndu̱ Yi ɓaran ɓar mbe mu̱ti, chin ke, Yesu nu̱ke a ma lawa rem ɓar mbe shokhnar nu̱ke a ɓar nang.