1 Korintiyeku 9 - Mewar Alqawarang

Khalandi ɓu̱ Puda

¹ Woɗye zalala nje khara de? Nga pude ɓu̱ Yesu tu̱k ɓa goma? Nang na Yesu Zhinerem gwaanji ndu̱ yita de? Tun nang kap tun maita Yesu nu̱ ku̱n sha ɓa goma?

² Ai, aa ɓeeni nduki nu̱ maita za nga pude ɓu̱ Yesu ɓa, tun ka maita shwat! Khar viti ɓaanu mbe Zhinerem gwaanji ɗya saidu nu̱ wutki za nga pude ɓu̱ Yesu.

³ Mbu̱ nduki wa zham mya ngga lawa ɗyina ndu̱ nang.

⁴ Woɗye ɗa, zalala nje khaarem ma ku̱ vu̱r zu̱mndi ndu̱ zar yerem de?

⁵ Alapa zalale nje khaarem ma ku̱ aaki ɓu̱r nokhzi da chele ɓu̱ nu̱ mbu Yesu ku chem ki yirku nang su̱yen, ba wa nu̱ ɓeeni pudeku, ndu̱ khachinkirku ɓu̱ Yesu, kom ndu̱ Kefas shiki ku ɓa?

⁶ Yang ɗa, nga ndu̱ Barnaba ɗyenda ku̱ski ku̱ zu̱m mi ndu̱ ɗyinerem mu?

⁷ Nyi soja ke nu̱ da taɗar ɗye zu̱mndi ɓarana? Ki ka ghutki dam anap ɓaran yang za ɓu̱ nji yen ɓa? Nyi nu̱ khutlo ka khutloki shapir ɓaran yang za ɓu̱ za wuɗyini ɓa?

⁸ Ɗyi nu̱ke nga ɓalar ɗyinan nang ɗya zu̱r ɓu̱ nduk ɗyenda mu? Nu̱ Bibiti ɓu̱ Musa zu̱ wanang de?

⁹ A nje bu̱laran mbu̱ Bibiti ɓu̱ Musa za, “Sa nu kutuk ye me dle ghuɗi mbu̱ a yin tlu̱na ɓa.” Yang Magham damta ndu̱ dla ɗyenda mu?

¹⁰ Shi ɓalar nang ku̱me chem ɓa goma? Shi ku̱me chem shwat, ku̱me wa shipa ku̱ nu̱ ghuti ndu̱ nu̱ ɗu̱khti sa memu̱na wor nu̱ ɗyine ɗyi nu̱ke ka gwaki ku mbu̱ boote damang.

¹¹ Nu̱ke chem wa kaɓ pooni nu̱ke ɗya ɓu̱ jiimba nu̱ mbu̱ memu̱na nu, ka kha nggamaala mbu̱ chem wa gwa ɗyin me kha nu mu?

¹² Mbu̱ zalale shir tun wanang a nje kha nduki ngguri, ai, chem wa duk wor zalale nang. Yang kap ndu̱ nang nyem shi tlu̱na ndu̱ zalale nang ɓa, chem wa gu̱n memu̱na mi nu̱ aa nu̱m ma ku̱ nggu̱tli mi tlu̱nar Labar mbarkandi ɓu̱ Masiya Yesu ɓa.

¹³ Nun zu̱n za nduki nu̱ka shiki tlu̱nar mbu̱ rafti ɓu̱ Magham ka gwa ɗye zu̱mndi ɓaanda ye maaran de? Nu̱ tlu̱nar ɗyin du̱ku̱lang ka gwa me ɓaran mbu̱ sadke nu̱ du̱ngki nu̱ ɗyin du̱ku̱lang.

¹⁴ Wanang tu̱k, Zhinkir gwaanji wa zu̱ za nu̱ tlu̱nar Labar Mbarkandang ku̱ gwa ɗye khar viti ɓaanda nu̱ ku̱nshe tlu̱nar ɓaanda.

¹⁵ Yang aa da nang shi boote ndu̱ zalaleku nang ɓa, yang nga bu̱la ɗyiku nang ye nu ma ku̱ shi nu poonan ya ɓa. Ai, kuzhom mu̱t nga ye ku̱ mya za nu̱ke ngam ɓu̱ ɗu̱ma wakhti ɗyine ɗyiku nang ɓa.

¹⁶ Tlu̱nar wopar Labar Mbarkandang ɓu̱ sa nga tang ki makhta ɗyina ɓa, ku̱me wa ku̱s ku̱ shi nga tlu̱nar nang, ngga kha ma ɗye zhiyaye mbu̱ nang wopa Labar Mbarkandang ɓa.

¹⁷ Mbu̱ nga shiran ku̱me shimndi ɓanga, tu̱ga wa ku̱s ku̱ ɓiiri nga. Yang nu̱ke nga shiran ku̱me shimndi ɓang ɓa, wa kha ma tlu̱nar ɓanga.

¹⁸ Yang nu̱m ke ɗye ɓiiri ɓanga? Ɗye ɓiiri ɓanga chin ke, mbu̱ nga wopa Labar Mbarkandang, tang shir nda bam. Nang ka shi boote ndu̱ zalale nu̱ke a khara kap mbu̱ tlu̱nar wopar Labar Mbarkandang ɓa.

¹⁹ Aa nu̱ke nga maavi ɓu̱ aaki ɓa, nga gaɓ ndu̱ ɗyina ma maavi ɓu̱ aaki, ma a dut nga nduki khang mbu̱ ngga ɗu̱ma.

²⁰ Mbu̱ nga she Yakhudeku, tang gaɓ ndu̱ ɗyina wa Yakhudeku ma dut nga wora. She nduki nu̱ka shiki boote ndu̱ Bibitikwang, tang gaɓ wa njif nu̱ke Bibitang a zalale ɗyine nda (aa nu̱ke zalala kha Bibit ɗyina ɓa), ma a dut nga nduki nu̱ke bibitang a zalale ɗyine wora.

²¹ She nduki nu̱ke Bibiti a zalale ndu̱ wor ɓa, tang kha wa nduki nu̱ke Bibiti a zalale ndu̱ wor ɓa. (Nang nu̱ wut za bibiti ɓu̱ Magham nggur a nje nu̱ke a zalale nu̱ nga ɓa ɓa, auwo, bibiti ɓu̱ Masiya a zalale ndu̱ nga). Ma a dut nga nduki nu̱ke bibitang a zalale ndu̱ wora.

²² She nduki nu̱ke maito ɓaanda kata, tang kha wa nga wanang ma a dut nga wora, Nga kha ma aa nyi tun she ndukiku zum zum ma ɗana nga ɓeenan a kikimndi.

²³ Nga shi ɗyiku nang ku̱me Labar Mbarkandang, ma gwa nga me ɓang mbu̱ barke ni.

²⁴ Tun wa zu̱n mbu̱ nduki a palam ɗari, chele ɓu̱ nu̱ ɗar kwang, aakya wuta ku̱ peeta nji mu̱dlen, yang nduk kaada ka gwaki ɗye ɓiirang ɓa goma? Ki ma pooni ɗar nu̱ke ka saki tun gwa ɗye ɓiirang ɗo.

²⁵ Nu̱ palam ku wa ka daasa vaanda nu̱ gha, a shi ɗyiku nang ma gwa ɗye ɓiiri nu̱ka su̱bu̱rki, yang ɗye ɓiiri ɓaaremang nu̱ka shi su̱bu̱r ɓa.

²⁶ Ku̱me nang, ɗar nu̱ke nga shiran nang, nga shikya ɗar bamndi ɓa, yang nga ghwatkya khu̱khet ɓa.

²⁷ Nga ru̱k vara, tang gaɓ ndu̱ chin ma maava, ku̱me ku̱ ɓa mbukti nga gha qu̱rse nga wopa Labar Mbarkandang ye nduki ɓa.