1 Korintiyeku 7 - Mewar Alqawarang

Zhamndi ɗyine Ɓu̱rti

¹ Yang tu̱k, ɗyine ɓalar nun bu̱laki ya, wa shi mbar ku̱ nduk kha waare ɓu̱rti.

² Yang ku̱me ku̱ nduk shi zawa ɓa, ku̱ aa nyi khusku kha ndu̱ nokhzan, tu̱ aa nyi nusu kha ndu̱ zhimen.

³ Ku̱ khuskyang shi ɗyi nu̱ ku̱ski ku̱ khusku shi ye nokhzan, tu̱ nokhzang shi wanang tu̱k ye zhimen.

⁴ Man var nokhzang ɗya ɓu̱ zhimen, wanang tu̱k man var khuskyang ɗya ɓu̱ nokhzan.

⁵ Ku̱ nduk da nggu̱tl mu̱dlen ɓa, buka mbu̱ke tun zu̱n gha zu̱zi ma ku̱ gwa nu sarchi tun shi barari. Yang tun a gaɓ nu̱ ve yen, ku̱ Sheɗan lamba nu ku̱me song ku̱si va ɓa.

⁶ Nang nga kya zu̱ran ye nu, ɗya ɗyi nu̱ Magham zu̱ki za zu̱ nga ye nu ɓa.

⁷ Nga shim tu̱ga ku̱ aaki kha wa nga, yang aaki nu̱ pooni vu̱rti nu̱ Magham shiki yenda, njif ngguri Magham wa vu̱r ɗyi nggur yenda, tu̱ vu̱r ɗyi nggur zum ye njif ngguri.

⁸ Ɓu̱ nduki nu̱ke nu̱ shi ɓu̱r ku ɓa ndu̱ ku̱du̱wku, nga na wa ka shi mbar ku̱ kha gha ku waare ɓu̱rti ba wa nu̱ke nga si.

⁹ Mbu̱ yang ɓu̱ ɗu̱ma ku̱s ɗyin wor ɓa, wa shipa ku̱ shi ɓu̱rti ku. Ku̱me ka duk nu̱ mbaari ku̱ shi ɓu̱rti ku ye ku̱ zawar ɓaanda duk du̱mbu̱r ɓaanda.

¹⁰ Ye nduki nu shiki ɓu̱rti, nga zu̱ran ye nu, yang nga kya zu̱ran ɓa, ɗya Zhinerem gwaanji, ku̱ nusu shakh ndu̱ zhimen ɓa.

¹¹ Yang mbu̱ wa shakh ndu̱ chin, ku̱ shi ɓu̱rti nggur ɓa, buka ku̱ gaɓ nu̱ she zhimen, yang tu̱k ku̱ khusku ngga nokhzan gha ɓa.

¹² Yang ye ɓeeni ndukyang, nga kya ɓalar nang, ɗya Zhinerem gwaanji zu̱ki ɓa. Mbu mu̱dlerem nu mbu Yesu nggur a nje nu̱ke nokhzan ɗya nu̱ mbu Yesu ɓa, yang wa tlogha za chin ka kha gha ndu̱ chin, ku̱ shakh ndu̱ chin ɓa.

¹³ Yang tu̱k mbu̱ zhimenki kha nokhzi ngguri nu̱ke ɗya nu̱ mbu Yesu ɓa, yang wa tlogha ku̱ kha nda gha su̱yen, ku̱ shakh ndu̱ chin ɓa.

¹⁴ Nga zu̱ wanangang, ku̱me zhimenkir nu̱ke nu̱ maita Yesu ɓa ndang wa kha shakhshakh, nu̱ ku̱nshe khar da ndu̱ nokhzan. Wanang tu̱k nokhzi nu̱ke nu̱ maita Yesu ɓa ndang wa kha shakhshakh, nu̱ ku̱nshe khar da ndu̱ zhimen. Mbu wanang ɓa tu̱ga qusonggi ɓaanu ka kha zopan, yang leendang wa kha shakhshakh ku.

¹⁵ Yang mbu̱ njif nu̱ke ɗya nu̱ mbu Yesu ɓa ndang a shim shakh nji ndu̱ nu̱ mbu Yeswang, ku̱ shakh ku. Mbu̱ ɗyen wa ku̱s wanang, zop ve khuskyang ndu̱ nokhzi nu̱ke ɗya nu̱ mbu Yeswang ɓa. Magham wa qarem ma ku̱ shi mi khar mu̱ndi ndu̱ yen.

¹⁶ Nusu, ki zu̱nki bai to ka ɗana zhimera na? Yang tu̱k khusku, ki zu̱nki bai to ka ɗana nokhzorang na?

Khar nu̱ Zhinerem gwaanji Shimki Shemi

¹⁷ Yang aa kikimndi, ku̱ aaki shi pooni khar viti nu̱ke Zhinerem gwaanji vu̱rki yenda. Nang ke ɗyi nu̱ke nga shim shoga nga ye tabar ɓu̱ nu̱ mbu Yesu ku kap.

¹⁸ Njif nu̱ qaki nda tu̱ gwa wa dla san nu̱gha, ku̱ shim kha nji waare dlarsi ɓa. Yang tu̱k njif nu̱ke Magham qaki nda tu̱ gwa nda nu̱ dla san ɓa, ku̱ laɓ ku̱ dla san yenda nu̱ gha ɓa.

¹⁹ Dlarsi ndu̱ song dlarsi ɗya aa nu̱m ɓa, khutlo ɓalar ɓu̱ Magham chin ke torop.

²⁰ Ku̱ aaki kha ba wa nu̱ke a si sarchi nu̱ Magham qaki nda.

²¹ Mbu̱ ta khar maava sarchi nu̱ Magham qaki ro damtana ɓa. Yang mbu̱ to ka ɗu̱ma dli ɗyinoro, to shi.

²² Mbu̱ nduk ɗya maava, tu̱ yang Zhinerem gwaanji qa nda, she Zhinkir gwaanji ɗyinan dliiran, yang tu̱k mbu̱ nduk ɗya maava ɓa, tu̱ yang Zhinerem gwaanji qa nda, wa kha ma maavi ɓu̱ Masiya.

²³ Magham masa nu masa nu̱ zhaaji, tu̱ ɓi, ku̱me nang ku̱ kha nu ma maaviku ɓu̱ nduki ɓa.

²⁴ Nyeezaku, aa nduk ɗya nu̱m sarchi nu̱ qaki nda, ku̱ kha wanang su̱yen ndu̱ Magham.

²⁵ Ɗyine ɓalar ɓu̱ wonkharku nu̱ke nu̱ shi ɓu̱rti ku ɓa, Zhinkir gwaanji nu̱ zu̱ tun ya ɗyinan ɓa, yang ɓala khara ye nar ɓanga nu̱ke tun wa maita nga mbe ɗaanar ɓu̱ Zhinkir gwaanji.

²⁶ Nga na wa ka duk mbaari ku̱ kha nu vaanu gha wa nu̱ke tun a si ku̱me chem wa nggaasi viri nu̱ mbu̱ bonye.

²⁷ Mbu̱ ta shi ɓu̱rti, ku̱ ngga na nokhzor gha ɓa, mbu̱ no shi ɓu̱rti dong ɓa, shi na ɓu̱r ɓa.

²⁸ Yang mbu̱ ta woɗa ta shi ɓu̱rti, no shi sola ɓa, yang mbu̱ wonkha wa shi ɓu̱rti, nu̱ shi sola ɓa. Yang kap ndu̱ nang nduki nu̱ shiki ɓu̱rti ka za bonyeku ku̱me khubti rafti ɓaanda, chin saki nga shim yeta nga nang ye nu.

²⁹ Nyeezaku, ɗyi nu̱ke nga zu̱ranang chin ke sarchi nu̱ daasakyang wa shi bing woɗari. Ji ɗyin leendang ku̱ nduki nu̱ shiki ɓu̱rti kha wa nu̱ shi ɓu̱rti ku ɓa.

³⁰ Tu̱ nduki nu̱ke a mbu̱ su̱bu̱rti mbi kha wa mbu wor su̱bu̱rtan ɓa. Nduki nu̱ke a mbu̱ kashar ku kha wa a kasha ku ɓa, tu̱ nu̱ masar ɗyiku kha wa ɗya ɓaanda ɓa.

³¹ Nu̱ boote ndu̱ ɗyin larji ku̱ sa memu̱na wor nu̱ ɗyinan ɓa, ku̱me larji ka woɗa ɗo.

³² Nang shim ku̱ damta nu ɓa. Njif nu̱ke nu̱ shi ɓu̱r ɓa wa ka damta ndu̱ ɗyi ɓu̱ Zhinkir gwaanji maɗyi, a shim ku̱ Zhinkir gwaanji tu̱k mu̱ndi ɓaran

³³ Yang njif nu̱ shiki ɓu̱rti damtakya ndu̱ ɗyin larji, ma ku̱ nokhzan tu̱k mu̱ndi.

³⁴ Memu̱naran shakhtan ɗo. Yang nokhzi nu̱ke nu̱ shi ɓu̱r ɓa, ndu̱ wonkhar nu̱ke nu̱ shi zum ɓa wa ka damta ndu̱ ɗyi ɓu̱ Zhinerem gwaanji maɗyi ma ku̱ kha nji shakhshakh varan ndu̱ jiimban. Nokhzi nu̱ shiki ɓu̱rti wa ka damta ndu̱ ɗyiku nu̱ larji, ma ku̱ zhimen tu̱k mu̱ndi ɓaran.

³⁵ Nga zu̱ ɗyiku nang ma ku̱ kha ye nu ndu̱ boota, nga shikya ranna nu ɓa, nga shim ku̱ kha nu mbari, tun ghar ghai ye Magham waare damtar nggur nu̱ke ka nggu̱tlki nu.

³⁶ Yang mbu̱ nduk wa shi alqawar ɓu̱rti ye nokhzi ngguri nu̱ khu̱lki ku̱ shi ɓu̱rti, tu̱ na za chin a shikya ɗyi nu̱ke nu̱ shipa ɓa yenda. Yang a shim nda maɗyi, shipa ku̱ kha wanang, mbu̱ ɗyen wanang, wa shipa ku̱ shi ɓu̱rti ku, ɗya zop ɓa.

³⁷ Yang njif nu̱ naki ɗyi nyin daki ye memu̱naranang torop, ɗyen nu̱ kha yenda wa ɗyi nu̱ ku̱ski ku̱ shi nji ɓa, yang ka ɗu̱ma ku̱s ɗyinan, tu̱ yang da ye memu̱naran za chin ɓu̱r nda ɓa, wa shi torop tu̱k.

³⁸ [Ku̱me nang njif nu̱ ɓu̱rki nokhzi nu̱ shiki alqawar ndu̱ chin, wa shi torop. Njif nu̱ke nu̱ ɓu̱r nda ɓa wa duk shi ɗyi mbarkandi.]

³⁹ Nusu ɓu̱ shakh ndu̱ zhimen ɓa mbu̱ a nje ndu̱ nyifiri, mbu̱ yang wa mu̱ɗi, ka ɓu̱r njif nu̱ke a shimndan, yang ku̱ kha ɗya njif nu̱ke a mbu̱ Zhinkir gwaanji.

⁴⁰ Yang ye nar ɓanga, ka duk tu̱kti mu̱ndi mbu̱ wa kha varan gha wanang. Nga naran Jiimbi shakhshakhndi a nje mbya.