1 Korintiyeku 6 - Mewar Alqawarang

Ku̱ nu̱ Mbu Yesu Da Zhaano ɓu̱ Yen ɓa

¹ Mbu damta nje chele ɓu̱ nu mbu Yesu nggur ndu̱ mu̱dlen, ka da zhaano ɓu̱ mu̱dlenang nu̱ gume kumar ma ku̱ nduki nu̱ke ɗya nu̱ mbu Yesu ku ɓa kuma chele ɓaanda ye ku̱ ɗu̱ gume nu̱ mbu Yesu ku mu?

² Alapa nun zu̱n za nduki ɓu̱ Magham ka kumaki larji ɓa goma? Yang mbu̱ke tun ka kumaki larji, tun ɓu̱ ɗu̱ma kuma ɗyi pichichindiku nang ɓa?

³ Nun zu̱n za chem ka ɓa kumaki nu̱ ru̱ktiku ɓu̱ Magham ɓa goma? Yang mbu̱ chem ka kumaki wora, chem ka ku̱na kuma ɗyiku nu̱ke a ɗaatli mbu̱ larji nang mu?

⁴ Yang nu̱m saki tun ki da zhaano ɓu̱ yen nu̱ gume nduki nu̱ke tabar ɓu̱ nu̱ mbu Yesu nu̱ da wor ma ɗyi nggur ɓa nda na?

⁵ Nga zu̱ nang ma ku̱ tu̱k nu kawa, yang alapa aa da nu̱ kaɗari nje chele ɓaanu nu̱ke ka ɗu̱maki somta nu mbu̱ ɗyi nggur wa vi nu̱ chele ɓu̱ nu̱ mbu Yesu ndu̱ mu̱dlen ɓa?

⁶ Yang me ɓu̱ nang, tu̱ nu̱ mbu Yesu ka da zhaano ɓu̱ mu̱dlen nu̱ gume kumari she nduki nu̱ke ɗya nu̱ mbu Yesu ku ɓa!

⁷ Ai dar zhaano ɓu̱ yen nun ka shiki nang a wutkya tu̱ɓti ɓaanu. Ye nang kuzhom kanaɗa nu aa shikya batal ye nu de? Tun ɓu̱ kanaɗa aa nduk zu̱mkya ɗyi ɓaanu ɓar ɓa goma?

⁸ Yang wonji tun nu vaanu tun a batal, tun a zu̱m ɗyi ɓu̱ nduki ɓara, yang ɗyiku nang tun a shiran aa ye nyeezonu nu̱ mbu Yesu!

⁹ Nun zu̱n za nu̱ mu̱narku ɓu̱ vi nu̱ mbu̱ kwaaɗar ɓu̱ Magham ku ɓa goma? Ku̱ nduk lamba nu ɓa ku̱me nu̱ zawar mbu̱ khu̱rti ku a nje, ndu̱ nu̱ ghaari ghai ye mu̱lu̱mku. Kom ndu̱ nu̱ ɓu̱rti ku nu̱ke a zawarku, ndu̱ khuzuku nu̱ nduki ka qanki ndu̱ wora, ndu̱ khuzuku nu̱ka qanki ndu̱ yen kom ndu̱ nusuku nu̱ka qanki ndu̱ yen.

¹⁰ Nu̱ muuri ku, ndu̱ nu̱ khape ku, ndu̱ nu̱ me kuyar ku, ndu̱ nu̱ gu̱ndi virkir ku, ndu̱ nu̱ batal ku nu̱ke ka viki nu̱ mbu̱ kwaaɗar ɓu̱ Magham ɓa.

¹¹ Ɓeeni nduki chele ɓaanu wa shi ɗyiku nang zhu, yang leendang wa waka nun konggol. Wa sa nun mbu̱ khar Magham. Tun wa kha ma nduki nu̱ke zopan ɓa she Magham mbu̱ dlu̱m Zhinerem gwaanji Yesu Masiya, ndu̱ Jiimbi shakhshakhndi ɓaarem.

Ku̱ Ɗyi nu̱ke tun a Shiran ndu̱ Man Vaanu Vu̱r Zhaaji ye Magham

¹² Yang njif nggur ka zu̱ za, “Wa vu̱r zalale ya ku̱ shi nga aa nu̱m”, i ɗo, yang aa nu̱m ka khaki ndu̱ boota yor ɓa. Aa nu̱ke wa vu̱r zalale ku̱ shi na aa nu̱m, ngam ɓu̱ kha ma maavi ɓu̱ aa nu̱m ɓa.

¹³ Yang ɓeenan ka zu̱ tu̱k za, “Shi ɗye zu̱mi ku̱me maa mbu, shi maa mbu tu̱k ku̱me ɗye zu̱mi,” yang ɗo, Magham ka ɓa su̱ya wor nu̱gha kap. Nu̱ shi manva ma zawa ɓa, shir nda ku̱me Zhinerem gwaanji, man varang ɗya ɓu̱ Zhinerem gwaanji.

¹⁴ Ba wa nu̱ Magham jiiki ndu̱ Zhinerem gwaanji ɓar mbe mu̱ti, ka ji ndu̱ chem wanang tu̱k nu̱ ku̱nshe zalale ɓaran.

¹⁵ Alapa nun zu̱n za man vaanu ɗya me bar ɓu̱ Masiya ɓa goma? Alambu̱ram! Ngam ɓu̱ gaɓ ndu̱ me bar ɓu̱ Masiya tu̱ kha ma ɓu̱ man mu̱nggu̱l ɓa.

¹⁶ Nun zu̱n za aaki gontaki varan ndu̱ man mu̱nggu̱l wa kha ma man var da ku ɓa goma? Ai, a nje bu̱laran za, “Wor rapndang ka kha ma man var da ku.”

¹⁷ Yang njif nu gontaki ɗyinan ndu̱ Zhinerem gwaanji wa kha ma jiimbi da ku ɗo.

¹⁸ Ɗa ma tlu̱nar zop! Solar nu̱ke nduk ka shiki kap ɓu̱ su̱ɓa man varan ɓa, yang njif nu̱ shiki zop wa su̱bu̱r man varan nu̱gha.

¹⁹ Nun zu̱n za man vaanu ɗya rafti ɓu̱ Jiimbi shakhshakhndi nu̱ke a mbe nu nun dlu̱ki she nda ɓa goma? Tun ɓu̱ shi zalale ndu̱ vaanu ɓa.

²⁰ Magham masa nu masa, tu̱ ɓi. Ku̱me nang vu̱r ma zhaaji ye Magham ndu̱ man vaanu.