1 Korintiyeku 4 - Mewar Alqawarang

Pudeku ɓu̱ Yesu

¹ Wa shipa ku̱ kwaari ɓaanu khan ɗyine chem ɗya nu̱ tlu̱narku ɓu̱ Masiya, yang Magham wa vu̱r du̱ngdi ɗyiku tukakandi ɓaran yerem.

² Yang wa ku̱s ku̱ njif nu̱ dlu̱ki du̱ngndi tunu ku̱ shi zhire ye zhin nu̱ rafa.

³ Ɓang nang damta ndu̱ aa tunu aa aaki ku̱ kuma nga viɗ ɗyine nar ɓu̱ nduk ɓa, aa nga nang kuma ɗyin vara ɓa.

⁴ Nang zu̱n mbu̱ nga sola ɗyi nggur ɓa, yang tu̱k, nang nu̱ sa tang kha shibtan ɓa. Zhinkir gwaanji ka kumaki nang.

⁵ Ku̱me nang ku̱ kuma nu nduk me ku̱ sarchi ni shi dong ɓa, bu ma ɓar ɓu̱ Zhinerem gwaanji nu̱ke ka lauɗaki su̱ kumar aa nu̱m. Chin ka wutki ɗyiku nu̱ke a nje tukaran mbu̱ zhumi, tu̱ fet ɗyi nu̱ nduki ku̱rki mbu̱ memu̱na wor ye dalangi. Nang ke sarchi nu̱ke aaki ka gwaki makhtar she Magham wa nu̱ shipaki.

⁶ Nang ɗo, nyeezaku, nga shi boote ndu̱ Apolos ndu̱ nga ma buu ɗyiku nang ye nu, tun shoga ye mbu̱ ɓalar nu̱ zu̱ki za, “Peeta nu ɗyi nu̱ke a nje bu̱laran ɓu̱ Bibitang ɓa.” Ku̱ nduk vu̱r zhaaji ye nduk da tu̱ duk da ɓa.

⁷ Ki zu̱ki yor za ta duk mu̱dlwang na? Nu̱m kya kha nu̱ke Magham vu̱rki yoro vu̱r vu̱r ɓa? Yang mbu̱ wanang nu̱m saki ta me wakhti wa no za to gwa bam ɓa?

⁸ Nang tun wa woɗa gwa ɗyi nun shimki kap ɗo! Tun wa kha ma nu̱ gu̱narku! Tun wa zu̱m kuji, yang ɓaarem chem a mbu̱ aa nu̱m ɓa! Mbu̱ tu̱ga tun kuji yel, tu̱ga chem ka shi kwaaɗarang su̱yen ndu̱ tunu!

⁹ Ye nar ɓanga, chem pudeku chem ke gaɓtan gana mbe aa nu̱m, chem wa shipa nduki nu̱ dlaki kumar tlaghar mu̱ti ye wora ve dalangi. Chem wa kha ma ɗyi nu̱ke larji nang kap, ndu̱ nu̱ ru̱ktiku ɓu̱ Magham, nu̱ nduki saki yiti ye wora.

¹⁰ Chem wa kha ma nggu̱bu̱ngku ku̱me Masiya, yang ɓaanu tun ghu̱rtan mbe Masiya! Chem khukhutan, yang ɓaanu tun shokhku̱rokh! Nduki a na zhaaji ɓaanu, yang ɓaarem a vu̱rkya bonye yerem!

¹¹ Ma ɓar meeni chem a tu̱k meeri ndu̱ khuzhumndi, chem a sakya ngguzur ku̱me ɗye sa kha rem ɓa, chem a za dlabti, aa rafa kha rem ɓa.

¹² Chem a bonye tlu̱nar ndu̱ khaarem. Mbu̱ nduk wa mi barke ɓaarem chem sa barke ye nu̱ zhin men, mbu̱ wa vu̱r bonye yerem chem gu̱n memu̱narem.

¹³ Mbu̱ nduk wa pu̱zerem, chem zu̱ mbarkandi yenda. Chem wa kha wa chem ke yin ku̱rdi ɓu̱ larji nang, aaki wa ndu̱mderem, leendang nang ke ɗyi nu̱ke a san ku.

¹⁴ Nang bu̱la ɗyi nang ye nu ma ku̱ tu̱k nu kawa ɓa, nga bu̱la ma wu nga nu wa nu̱ke zhinki ka wuki qusonggi ɓaran nu̱ke a ndolaran.

¹⁵ Aa maalu̱mku a nje kha nu̱ khang mbe Masiya nu̱ke khangan wa khu̱l aru, ai zhinki kha nu khang ɓa. Nga khaki ma zhinkir ɓaanu mbe Masiya Yesu nu̱ke nga ɓa ki ndu̱ Labar Mbarkandang ye nu.

¹⁶ Nga khutonu mbu ma ɗyi nu̱ke nga shiran.

¹⁷ Yang nga ru̱k Timoti woi nu̱ke nga ndola nda nu̱ she nu ku̱men, ɗya nu̱ shir zhire mbe Zhinerem gwaanji. Ka kor ɗyi nu̱ke nga shiran ye nu mbe mbu Masiya Yesu nu̱ke nga shiran, ba wa nang ka shogaki ɓar ye tabar ɓu̱ nu̱ mbu Yesu ku aa fu̱n.

¹⁸ Yang ɓeeni nduki chele ɓaanu wa taman ku za ngam ɓu̱ ɗa ɓa she nu ɓa, nang ke ɗyi nu̱ saki tu̱ki gwaari ɗyin ku.

¹⁹ Yang mbu̱ Zhinkir gwaanji wa shi njivan ya, ngga ɗa ɓa she nu ɓu̱ shoɓ ɓa, kom ngga ɓa laɓ mbu̱ ɓalar nu̱ ni gwaari ɗyin ku nang zu̱ki, kom ndu̱ nyi zalale kya kha wora.

²⁰ Ku̱me kwaaɗar ɓu̱ Magham ɗya maghar ɓala ɓa ɗo, ɗya zalale nu̱ke a nje si.

²¹ Yang ɗa, tun datkya nyiya, a ɓa nga ndu̱ kurpi me khara mu, yang a ɓa nga ndu̱ ɓalar ɓu̱tokhndi mbe ndola mu?