1 Korintiyeku 2 - Mewar Alqawarang

Ɓalar ɗyine Yesu nu̱ Katlki nda gha

¹ Nyeezaku, sarchi nanga ɓa ki ma zu̱ ɗyi tukakandi nu̱ Magham zu̱ki yerem, nang shi boote ndu̱ ɓalar taɗakandi ndu̱ zu̱ndi khangndi nang shiki ɓa.

² Ku̱me nga da ye memu̱nara nu̱ ɗyine mbu̱ khar ɓang ndu̱ tunu kap, ngam ɓu̱ shoga ɗyi nggur ye nu ɓa kope ɓalar ɓu̱ Yesu Masiya, yang nu̱ shi wa katli nda gha nu̱ shikya ɓa.

³ Ye ɓar ɓang nu̱ gumapaali she nu du̱mbu̱r ɓang kata, vara a dlu̱rti ku̱me sawa,

⁴ yang kap ndu̱ nang, nang shi boote ndu̱ maghar ɓala nu̱ kaɗari ɓu̱ nu̱ mbu̱ shogar ndu̱ wopar labar mbarkandang ɓa. Nga njigkya zalale ɓu̱ Jiimbi shakhshakhndi tu̱ shi tlu̱nar ɓaran mbe shogar ndu̱ wopar labar mbarkandang,

⁵ ma ku̱ maito ɓaanu ching nu̱ ɗyine kaɗari ɓu̱ nduk ɓa, yang ku̱ khan ɗyine zalale ɓu̱ Magham ɗyenda.

Kaɗari ɓu̱ Magham

⁶ Kap ndu̱ nang, nga ka wopa ɓalar ndu̱ kaɗari ye nduki nu̱ gorki mbe maito ɓaanda. Nang ɗya pooni kaɗari ɓu̱ nduki nu̱ larji nang ɓa, ɗya pooni kaɗari ɓu̱ nduki nu̱ meeni ɓa, yang ɓu̱ nu̱ kwaaɗarku nu̱ke a ma su̱yar ku ɓa.

⁷ Nga zu̱kya kaɗari ɓu̱ Magham tukakandi, ɗyen tukaran zhu ɗau, nang ke kaɗari ɓu̱ Magham nu̱ daasaki ma vu̱r zhaaji yerem me ku̱ du̱ng larji.

⁸ Nduk a nje chele ɓu̱ nu̱ kwaaɗarku nu̱ larji kap nu̱ daki mbu̱ kaɗari nang ɓa, mbu̱ wa gwa mban ku, tu̱ga nu̱ katl Zhinkir gwaanji nu̱ zhaaji nu̱gha ɓa.

⁹ Yang a nje bu̱laran ba wanang nu̱ zu̱ki za, “Ɗyi nu̱ Magham daasaki ye nduki nu̱ke a ndola nda nang, ɗya ɗyi nu̱ke nduk a nje nu̱ naki sar da ɓa, yang nduk a nje nu̱ tu̱kki ɓa. Yang nduk a nje nu̱ korki ka shi tun wanang ɓa.”

¹⁰ Yang Magham wa wut ɗyiku nang yerem nu̱ ku̱nshe Jiimba. Ku̱me chin Jiimbyang ke nu̱ laɓ mbu̱ aa nu̱m, kap ndu̱ ɗyiku ɓu̱ Magham tukakandi nu̱ke dar mban shar.

¹¹ Woɗye ki ka zu̱nki kwaari nu̱ mbu memu̱na ndukwa, kope jiimbi njifang ɓa goma? Wanang tu̱k, nduk a nje nu̱ke ka zu̱nki kwaari ɓu̱ Magham ɓa, kope Jiimbi shakhshakhndi.

¹² Yang chem dlu̱kyang jiimbi nu̱ larji ɓa, chem dlu̱kyang Jiimbi na viki she Magham ma zu̱n mi vu̱rti ku nu̱ Magham shiki yerem koɗokhsi ɓa.

¹³ Ɗyiku nu̱ke chem a zu̱ran ye nu nang, nyem shi boote ndu̱ ɓalar nu̱ kaɗari nu̱ nduk shogaki yerem ɓa. Chem a shikya boote ndu̱ ɓalar nu̱ Jiimba shogaki yerem, chem a zu̱ zhire ɗyi nu̱ mbu Jiimba ye nduki nu̱ke a mbu̱ Jiimba.

¹⁴ Njif nu̱ke Jiimba kya zalale ndu̱ chin ɓa, ɓu̱ dlu̱ ɗyiku na viki she Jiimbi shakhshakhndi ɓa, ku̱me a na wa ɗya me nggu̱bu̱ng, yang ɓu̱ gwa mban tu̱k ɓa, ku̱me Jiimbyang ka saki tu̱ nduk gwa mban.

¹⁵ Njif nu̱ke Jiimbyang a zalale ndu̱ chin ka ɗu̱ma kuma aa nu̱m yang nduk a nje nu̱ke ka ɗu̱maki kuma nda ɓa.

¹⁶ Wa nu̱ lagarkatang zu̱ki, “Ki ka zu̱nki kwaari ɓu̱ Zhinkir gwaanja ki ka ɗu̱maki vu̱r sawari yenda?” Yang kwaari ɓaarem ɗya ɓu̱ Masiya.