1 Korintiyeku 16 - Mewar Alqawarang

Shaatar ye nu̱ Mbu Yesu ku

¹ Leendang, ɗyine ɗyi nun bu̱laki ya ɗyine ɓalar mu̱zhindi nu̱ke tun ka tabaki ma shaata nduki ɓu̱ Magham ku nu̱ke a Yakhudiya. Wa ku̱s ku̱ shi nu ba wa nang zu̱ki ye tabarku ɓu̱ nu̱ mbu Yesu ku nu̱ke a Galatiya ku̱ shi ku.

² Aa nyi fu̱ɗar nu̱ gumapaali mbu̱ qaandiku mut ndang, ku̱ aaki ki gwa ɗyi nggur mbe gwar ɓaran a vu̱rtan a du̱ngdan gha, njig nu kope nga ɓa kom tun ki tabaran ɓa.

³ Sarchi nanga ɓa ki kap, ngga ru̱k ndu̱ nduki nun maitaki wora, tang vu̱r lagarkati nu̱ vu̱rtiku nun shiki ye wora, tu̱ ɗu̱ si ku Urshalima.

⁴ Mbu̱ wa shi mbar ɗu̱ nga si tu̱k, chem ka ɗu̱ su̱yen.

Daasar Ɗye Var ma Yiri

⁵ Ngga ɗa ɓa she nu, qu̱rse nga baara dlar ghai Makidoniya, nu̱ke ngaa shim mbu nu̱ far ɗo.

⁶ Bai ngga shoɓ she nu koɗom kope zhurmaari wa peeta, ma ku̱ shaata nu nga ye maa nu̱ke nga yir si kap.

⁷ Nang shim a ɓa nga mbu̱ nga na nu tang peeta vara ɓa, nga sa memu̱nara ku̱ qan nga koɗom she nu, mbu̱ Zhinerem gwaanji wa tlogha ya.

⁸ Yang ngga ching gha Afisa ma yir fu̱ɗar Pentikos.

⁹ Ku̱me njiv tlu̱nar mbarkandi wa qu̱n ya fan maɗyi, aa nu̱ke nu̱ zhangndiku a nje khang.

¹⁰ Mbu̱ Timoti a ɓa, tun dlu̱ri nda ndu̱ khaanu rap, ku̱me ɗya nu̱ tlu̱nar ɓu̱ Zhinerem gwaanji ba wa nu̱ke nga shiran.

¹¹ Ku̱me nang ndu̱m nu nda ɓa, tun du̱ng nda ma ku̱ ɗa ɓa sha laya, ku̱me nga nggu̱t njiv ɓar ɓaran su̱yen ndu̱ nyeezerem ku.

¹² Chin mu̱dlerem Apolos yang, ngaa khuti nda maɗyi ku̱ ɗa ɓa she nu su̱yen ndu̱ ɓeeni nyeezeremkwang, yang nu̱ shim ɓar leendang dong ɓa. Ka ɗa ɓa sarchi nu̱ naki wa kha yenda.

Lauɗarsi Ɓalari

¹³ Kha ma daasaran, tun ching gha shaanggu̱ɗang mbu̱ maito ɓaanu, tun kha wang, ndu̱ du̱mbu̱r tu̱k.

¹⁴ Mbu̱ ɗyi nu̱ke tun a shiran kap, tun shir nda mbe ndola.

¹⁵ Yang, nyeezaku, tun wa zu̱n nu̱ ɗyine nduki nu̱ mbu̱ rafti ɓu̱ Fanus maitaki Yesu gumapaali mbu̱ maa Akaya guma da, wa vu̱r var wor tu̱k ye tlu̱nar ye nu̱ mbu Yesu ku.

¹⁶ Nga khutonu mbu ma zu̱r ɓu̱ nduki nang, tun vu̱r zhaaji tu̱k ye nduki nu̱ gontaki ɗyin wor ndu̱ wor mbu̱ tlu̱narang.

¹⁷ Nga tu̱k mu̱ndi ɓar ɓu̱ Fanus ndu̱ Fortunatus ndu̱ Akaikus, tu̱ ɗyen kha ya wa kap tun a ɓa ki sha.

¹⁸ Ku̱me wa mu̱n mba ndu̱ tun kap. Pooni nduki nang wa shipa ku̱ vu̱r nu zhaaji ye wora.

¹⁹ Tabar ɓu̱ nu̱ mbu Yesu ku nu̱ke a Asiya a qaandi ye nu. Akila ndu̱ Bu̱rsikila, ndu̱ nu̱ mbu Yesu ku nu̱ka tabaki nu̱ kaa ɓaran, a qaandi ye nu maɗyi mbu̱ dlu̱m Zhinerem gwaanji.

²⁰ Nyeezerem kap a qaandi ye nu. Tun shi qaandi ye yen ndu̱ khaapar wuti ndolar shakhshakhndi.

²¹ Nga Bulus, nga kya bu̱la qaandi nang ye nu ndu̱ khara.

²² Kap njif nu̱ke a shim Zhinerem gwaanji ɓa ku̱ Magham mi barke ɓaran. A ɓo, Zhinerem gwaanji.

²³ Ku̱ mu̱nkir ɓu̱ Zhinerem gwaanji Yesu kha gha su̱yen ndu̱ tunu.

²⁴ Nga ndola nu kap mbe Masiya Yesu.