1 Korintiyeku 13 - Mewar Alqawarang

Ndola

¹ Aa ngga ɗu̱ma ɓalar ndu̱ me ghaiku ɓu̱ nduki ndu̱ ɓu̱ nu̱ ru̱ktiku ɓu̱ Magham, yang nga nu̱ ndola ɓa, nga shipakya gonggulong nu̱ke a quri, ndu̱ dlu̱rti nu̱ qur maɗyi.

² Aa nga ka zu̱ ɓalar ɓu̱ Magham, tang zu̱n ɗyi tukakandi kap, tang shi zu̱ndi ɗyine tun kap, aa maito ɓang maɗyi wa nu̱m gom, nu̱ke ngga ɗu̱ma ɓu̱t dlengku, yang za nga nu̱ ndola ɓa, nga aa nu̱m ɓa.

³ Aa nga vu̱r ɗyin me khara ɓar kap ye nu̱ nungndiku, tang vu̱r vara ku̱ va nu̱ gha, mbu̱ nga nu̱ ndola ɓa, kap ɗyiku nang nu̱ boota nga ndu̱ aa nu̱m ɓa.

⁴ Ndola ɗya kaɗanyi, ndola ɗya mbarki. Ndola nu̱ka shi zhiri ɓa, nu̱ka wut za chin ɗyi nggur ɓa, nu̱ka shi gwaari ɗyin ɓa.

⁵ Nu̱ka shi nggarva ɓa, nu̱ka wut shimndi ɗyin ɓa, nu̱ka shi ndolar ɗyin ɓa, nu̱ka shi wakho shokhna ɓa, yang nu̱ka khuɓ tun nu̱ mbu̱ memu̱naran zum ɓa.

⁶ Ndola wa zhang yen ndu̱ tlu̱nar malkandi, yang wa ka kasha mbu̱ nduk wa shi zhire.

⁷ Ndola wa ka bu ɗyin, wa ka shi maito aakochi, wa ka shi sar memu̱na, nu̱ka shi nggum ɓa.

⁸ Ndola nu̱ ka shi woɗa ɓa. (Ma nu̱ke zu̱r ɓalar ɓu̱ Magham ye nduki a si ka tu̱ɓi,) ma nu̱ke me ghiindiku a si ka woɗa, ma nu̱ke zu̱ndi a si ka peeta.

⁹ Shwat zu̱ndi ɓaarem shel ɓa, zu̱r ɓalar ɓu̱ Magham ye nduki nyem ka shiki shel ɓa.

¹⁰ Yang sarchi nu̱ke shelndang a ɓa ki, nu̱ke shel ɓa ndang ka su̱ya ɓara.

¹¹ Sarchi nu̱ke nga woi koɗomma, ngga shikya ɓalar ɓu̱ woi, tang shi kwaari me woi, tang shi konyi wa ɓu̱ woi. Yang ba nang gorki tang njig me woyang.

¹² Aa nu̱ke leendang chem a na shipar ɗyikwang wa mbu̱ ɗye nar nu̱ke vu̱lu̱ng vu̱lu̱ng, yang ye fu̱ɗaran chem ka na yiti ndu̱ yiti. Leendang zu̱ndi ɓanga shel ɓa, yang ye fu̱ɗar nang ngga zu̱n maɗyi ba wa nu̱ Magham zu̱nki nga.

¹³ Yang leendang ɗyiku kunungndi nang a nje shwat, wor ke: Maito, sar memu̱nari, ndu̱ ndola, yang chele ɗyi kunungndi nang, ndola dukki gwaari.