1 Korintiyeku 12 - Mewar Alqawarang

Vu̱rtiku ɓu̱ Jiimbi ɓu̱ Magham

¹ Yang leendang, nyeezaku, ɗyine ɓalar vu̱rtiku ɓu̱ Jiimbi shakhshakhndi, nang shim ku̱ kha nu mbu̱ zhum ɓa.

² Tun wa zu̱n nu̱ ɗyine sarchi nu̱ke nun kha ma nu̱ mbu Yesu dong ɓa, wa lamba nu tun ki ghar ghai ye mu̱lu̱mku nu̱ke nyifi ve wor ɓa.

³ Ku̱me nang nga shim zu̱n nu nu̱ ɗyine, nduk a nje nu̱ke Jiimbi shakhshakhndi a mbu ndu̱ chin nu̱ke ka zu̱ki za, “Wa mi pontori ɓu̱ Yesu! Ɓa.” Yang nduk a nje tu̱k nu̱ke ka zu̱ki za, “Yesu ɗya Zhinerem gwaanji” ɓa, kope Jiimbi shakhshakhndi a mbu ndu̱ chin.

⁴ Nang ɗo, vu̱rtiku a nje zum zum, yang chin Jiimbyang ɗyenda kya vu̱rtan.

⁵ Njiv shir tlu̱narku a nje zum zum, yang chem a shiran ba ye Zhinkir gwaanji dandi nang.

⁶ Tlu̱narku a nje tu̱k zum zum, yang Zhinkir gwaanji ɗyenda ke nu̱ vu̱r maghar shiran ye aaki.

⁷ Magham wa shi vu̱rti nu̱ wutki khar ɓu̱ Jiimbi shakhshakhndi mbe aa nyi nduku, ma ku̱ aaki gwa boote ni.

⁸ Njif nggur wa gwa vu̱rti nu̱ke ɓalar ɓaran aakochi nyeedlan ndu̱ kaɗari, nu̱ ku̱nshe Jiimbi shakhshakhndi, tu̱ njif nggur gwa ɓalar nu̱ke nyeedlan ndu̱ zu̱ndi nu̱ ku̱nshe chin Jiimbi dandi nang.

⁹ Njif nggur gwakya vu̱rti nu maito nu̱ ku̱nshe Jiimbi nang, tu̱ njif nggur gwa vu̱rti nu̱ shaanar nu̱ khaatiku nu̱ ku̱nshe Jiimbyang.

¹⁰ Ɓu̱ njif nggur gwakya vu̱rti nu̱ shir ɗye lazhamku, ɓu̱ njif nggur ɗya zu̱r ɓalar nu̱ Magham zu̱ki yenda ku̱ ze nduki. Yang ɓu̱ njif nggur ka zu̱nkya pooni jiimbiku zum zum, njif nggur ɓaran ɗya maghar me ghiindiku zum zum, njif nggur yang ka ɗu̱ma zu̱ mbu̱ ɗyi nu̱ke ta zu̱ran ndu̱ me ghiindikwang.

¹¹ Ɗyiku nang kap ɗya Jiimbi nang ɗyenda kya shiran, chin shakki ye aaki wa nu̱ shimki.

Kap Ɓaarem Chem me barku ɓu̱ Man var da

¹² Ba wa nu̱ke man var nduk kaada, yang me barku a nje khang, aa nu̱ke me barkwang khang, yang ɗya man var da. Masiya ba wanang tu̱k.

¹³ Ku̱me shi baptismyang yerem kap mbu̱ Jiimbi da ndu̱ man var da, aa to Yakhude nduku, aa to Khelene, aa to maava, aa to ye ghai, kap ɓaarem chem za mbu̱ Jiimbi dandi nang.

¹⁴ Me bar da kya ve man var nduk ɓa, ɗya me bar khang.

¹⁵ Mbu̱ tu̱ga saari nduk ka zu̱ za, “Nu̱ke nga khar ɓa, nga me bar ɓu̱ man var nduk ɓa.” Ai nang ɓu̱ nggooti nda nu̱ gha tu̱ kha ma ɗyi nggur zum ndu̱ me bar ɓu̱ manva ɓa.

¹⁶ Wanang tu̱k mbu̱ dlu̱mndi nduk ka zu̱ za, “Nu̱ke nga yiti ɓa, nga me ba ɓa.” Nang ɓu̱ nggu̱tli nda khar ma me bar ɓu̱ nduk ɓa.

¹⁷ Yang ɓa, mbu̱ tu̱ga man var nduk kap ɗya yiti, chem ka tu̱k ɓala mu? Mbu̱ man var nduk kap ɗya dlu̱m, chem ka tu̱k zhi tun ndu̱ nu̱ma?

¹⁸ Yang wonji Magham wa shi aa nyi me bar ɓu̱ nduku ba wa nu̱ shimki.

¹⁹ Mbu̱ me bar da kya nje, nu̱ kha ma manva ɓa!

²⁰ Me bar khang khaki ma man var nduku.

²¹ Sar da yiti nduk ɓu̱ ze khar nduk za, “Tun nu̱ ba nga ndu̱ to ɓa,” Yang ɗyin nduk ɓu̱ ze saari nduk za, “Tun nu̱ ba nga ndu̱ to zu̱m ɓa ɓa.”

²² Ye nang, tu̱ kha nu̱ke chem ɓu̱ ɗu̱ma shi aa nu̱m waare me barku ɓu̱ manva nu̱ke chem a naran wa boote ɓaanda kata nang ɓa.

²³ Chem wa ka vu̱r zhaaji maɗyikandi ye me barku nu̱ke chem a naran wa zhaaji ɓaanda kata yang ɓu̱ me barku nu̱ke chem a naran wa zhaaji ve wor ɓa chem a ɗoona wora.

²⁴ Nyem ka shi ɗyi nggur gu̱rgu̱rndi ye me barku ɓaarem nu̱ke chem a naran wa duk mbaari she rem ɓa. Magham shi nu̱ gha wanang, tu̱ gaɓ ndu̱ me barku ɓaarem nu̱ke chem a na wa boote ɓaanda kata tu̱ kha ndu̱ zhaaji maɗyi,

²⁵ ma ku̱ me barkwang keela yen ɓa, yang ku̱ nggu̱t yen ku wayen.

²⁶ Nang ke ɗyi nu̱ saki mbu̱ me bar da wa ruɓa, tu̱ me barkwang kap tu̱k khaatan, yang mbu̱ wa makhta da, tu̱ kasha ku su̱yen.

²⁷ Yang zu̱n ma, tun nang kap tun ke man var Masiya, yang aa nyi da chele ɓaanu ɗya me bar ɓaran.

²⁸ Mbu̱ tabar ɓu̱ nu̱ mbu Yesu, gumapaali Magham wa vu̱r pudeku, nu̱ rapan annabiku, nu̱ kunungan tu̱ vu̱r maalu̱mku. Tu̱ vu̱r nu̱ shir ɗye lazham ku, ndu̱ nu̱ shaanar khaatiku, ndu̱ shaatar nduki, ndu̱ nu̱ kwaaɗarku, ndu̱ nu̱ ɓalar ndu̱ me ghiindiku zum zum.

²⁹ Yang ɗa, kap ɓaanda ke pudeku mu? Kap ɓaanda ke annabiku mu? Kap ɓaanda ke maalu̱mku mu? Kap ɓaanda ke nu̱ shir ɗye lazhamku mu?

³⁰ Kap ɓaanda ke nu̱ vu̱rti nu̱ shaanar khaatiku mu? Kap ɓaanda ke nu̱ zu̱r me ghiindiku zum zum mu? Yang kap ɓaanda ke nu̱ zu̱ mbu ɗyi nu̱ke a zu̱ran mbu̱ me ghiindikwang mu?

³¹ Kasha ma vu̱rtiku nu̱ dukki ndu̱ gwaari. Yang ngga ɓa wut njiv nu̱ dukki mbaari ye nu.