1 Korintiyeku 10 - Mewar Alqawarang

Shogar mbe Labar ɓu̱ Israila

¹ Nyeezaku, nga shim kor nu ɗyine zhikaneremku wa shi yir ku su̱ ku̱zapti, tu̱ dla gaawu gwaanji vyangndang nu̱ dam.

² Wa shi baptisme ye wor mbu̱ ku̱zapti ndu̱ gaawu gwaanjang tu̱ kha ma nu̱ mbu Musa ku.

³ Wor nang kap wa zu̱m ɗye zu̱mndi nu̱ jiimbi,

⁴ tu̱ wor kap tu̱k za ɗyim nu̱ jiimbi nang. Ku̱me wa za ɗyim na viki ve dleng nu̱ jiimbi nu̱ke a yir su̱yen ndu̱ worang ɗo. Yang dleng nang ɗya Masiya.

⁵ Yang kap ndu̱ nang, nduki khang chele ɓaanda Magham nu̱ tu̱k mu̱ndi ɓaanda ɓa, tu̱ mu̱t ku lakhɓiɓi mbu̱ gaarang.

⁶ Ɗyiku nang chem ka nan ve wora tu̱ kha yerem ma ɗye shoga ma ku̱s mi shir ɗyi malkandiku wa nu̱ shiki kwang ɓa.

⁷ Ku̱ ghar nu ghai ye mu̱lu̱mku wa nu̱ ɓeenan ku shikyang ɓa. Wa nu̱ke a nje bu̱laran za, “Ndukyang wa kha ku gha, tu̱ zu̱m ku, tu̱ za ku, tu̱ ku̱s sapar ku a zawarku.”

⁸ Kha mi ma nu̱ zawarku wa nu̱ ɓeenan ku shiki, tu̱ nduki du̱pu ɗyirap qu̱m kunung mu̱t fu̱ɗar da ɓa.

⁹ Ku̱ buu mi Zhinkir gwaanji wa nu̱ ɓeenan ku shiki, tu̱ su̱tiku tlagha worang ɓa.

¹⁰ Ku̱ shi mi ruru wa nu̱ ɓeenan shiki, tu̱ nu̱ ru̱kti ɓu̱ Magham nu̱ tlaghar mu̱ti tlagha worang ɓa.

¹¹ Ɗyi nu̱ ɗatlki ndu̱ wor nang ɗya ɗye shoga, bu̱lan gha ma ku̱ wurerem. Yang nu̱ shi wa chem nu̱ke a nje mbu̱ lauɗar su̱ qaandi virkirku nang ɓa.

¹² Ku̱me nang mbu̱ to chingndan shaanggu̱ɗang ye nar ɓaaro, ching gha va buran ma ku̱ nggu̱ɗ na ɓa.

¹³ Buuri nggur a nje nu̱ gwaki nu, nu̱ke za nu̱ shi ye njif nggur ɓa ɓa. Magham ɗya nu̱ zhire, ɓu̱ njig ku̱ buuro nu ndu̱ ɗyi nu̱ dukki du̱mbu̱r ɓaanu ɓa, ka qu̱n njiv ye nu, nu̱ke tun ka ɗu̱maki gu̱n memu̱na nu mban.

¹⁴ Ku̱me nang raptaku ndolakandi, shakh ma ɗyinonu ndu̱ ghaari ghai ye mu̱lu̱mku.

¹⁵ Nga ɓalar nang ye nu tun nu̱ kaɗari ku, nggu̱t ma mbu̱ ɗyi nu̱ke nga zu̱ranang mbari.

¹⁶ Ɗyekhti nu̱ barke nyem ka kunakyang, chin ke nu̱ sa rem chem kha ma ɗyi da mbu̱ tom ɓu̱ Masiya ɓa goma? Chin ɓu̱rti tolir nyem ka ɓakhlakyang chem nji nang ke nu̱ sa rem chem kha ma man var da mbe man var Masiya ɓa goma?

¹⁷ Nu̱ke chin ɓurti tolirang ba da, alapa chem khangndi nang chem a khar ɗyi da, nu̱ke chem zu̱mkya ɓurti tolir da.

¹⁸ Nggu̱t ma qusa Israila ɓa, nduki nu̱ zu̱mki sadkyang, a khar da ku ndu̱ yen kom ndu̱ khar da mbe tlu̱nar ɓu̱ du̱ku̱lang ye Magham ɓa goma?

¹⁹ Nu̱m ke mbu̱ ɓalar nu̱ke nga shiran nangang na? Ɗyi nu dlaki ye mu̱lu̱mku ke ɗyi nggur mu? Yang mu̱lu̱mang ke ɗyi ngguri?

²⁰ Auwo, nga ɓalarang ɗyine sadkeku nu̱ke nu̱ ghaari ghai ye mu̱lu̱mku ka dlaki, ka dla qur ɗyikwang ye khu̱kheetiku, a dlaran ku ye Magham ɓa. Yang nang shim ku tun gonta nu ndu̱ khu̱kheetiku ɓa.

²¹ Ɓu̱ shi tun za mbu̱ ɗyekhti ɓu̱ Zhinerem gwaanji, tun gaɓ tun za mbu̱ ɓu̱ khu̱kheetiku tu̱k ɓa. Tun ɓu̱ zu̱m ɗye zu̱mndi ɗyin tebu̱r ɓu̱ Zhinerem gwaanji, tun gaɓ tun zu̱m ɓu̱ khu̱kheetiku tu̱k ɓa.

²² Shwat, chem a shimkya gang mi Zhinerem gwaanji ma ku̱ shi zhiri mu? Chem wa dukti nda du̱mbu̱r mu?

Shi ma Aa nu̱m ma gor Dlu̱m Magham

²³ A zu̱ran ku za, “Wa njigterem ku̱ shi mi aa nyi tunu” yang aa nyi tun ke boota si ɓa. A zu̱ran ku za, “Wa njigterem ku̱ shi mi aa nyi tunu” yang aa nyi tun ka shaataki nduk ɓa.

²⁴ Ki na kor ɗyino ɗyenda ɓa, ki kor mu̱dlo tu̱k.

²⁵ Nji ma aa nyi ɗyi nun gwaki ye maa masar dlu ɓara, waare zhamndi san, ku̱me ku̱ memu̱na nu damta nu̱ maa nu̱ dlwang a viki su̱ ɓa.

²⁶ Jiwa ɓalar ɓu̱ Magham wa zu̱ za, “Larji ndu̱ ɗyi nu̱ke a mban kap ɗya ɓu̱ Zhinkir gwaanji.”

²⁷ Mbu̱ njif nu̱ke ɗya nu̱ mbu Yesu ɓa wa qa nu ma zu̱m ɗye zu̱mndi, mbu̱ tun wa ɗi, tun zu̱m aa nyi tun nu̱ saki nu̱ gume nu, zham nu san ɓa. Ku̱me ku̱ damta nu mbu̱ memu̱nanu ɓa.

²⁸ Mbu̱ yang njif nggur wa ze nu za, “Dlu nang dla tu̱ vu̱r ye mu̱lu̱mku,” zu̱m nu ɓa, ku̱me chin nu̱ zu̱ki ye nwang, ma ku̱ kwaari ɓaanu tu̱k kha waare zop.

²⁹ Nga ɓalarang ɗyine kwaari nu̱ memu̱na nu ɓa, nga shiran ndu̱ kwaari nu̱ mbu̱ memu̱na njifang. Yang bai njif nggur ka zu̱ za “Yang nu̱m saki kwaari nu̱ memu̱na njif nggur ka nggu̱tlki nga shir khalandi ɓanga?

³⁰ Mbu̱ nga zu̱m ɗye zu̱mndi ɓang ndu̱ kuna, nu̱m ka saki tu̱ nduk ndu̱mndi nga nu̱ ɗyine ɗyi nang zu̱mki su̱yen nu̱ kunar Maghama?”

³¹ Kap ɗyi nu̱ke tun a shiran, aa tun a zu̱m tunu, aa tun a zakya tunu, tun shi aa nu̱m ma ku̱ Magham gwa zhaaji mban.

³² Ku̱ sa nu Yakhudeku, aa nduki nu̱ke ɗya Yakhudeku ɓa ndu̱ tabar ɓu̱ nu̱ mbu Yesu ku tu̱ shi sola ɓa.

³³ Tun shi ba wa nang ka shiki. Nga shim ku̱ aaki tu̱k mu̱ndi mbu̱ ɗyi nu̱ke nga shiran kap, yang nga shiran ku̱me ɗyina ɓa, nga shiran ma boote ɓu̱ aaki ma ku̱ nduki khang gwa ɗanar ku.