1 Korintiyeku 1 - Mewar Alqawarang

Zoɓar Qaandi

¹ Lagarkati nang a vi sha, nga Bulus nu̱ Magham qaki nga ma ku̱ kha nga ma pude ɓu̱ Masiya Yesu, kom ndu̱ mu̱dlerem Sostanus.

² Ma yir she tabar ɓu̱ nu̱ mbu Magham ku nu̱ke a mbu̱ ghai Koranti. Tun nu̱ qaki nu ma ku̱ kha nu wakaran mbe Yesu Masiya Zhinerem gwaanji ndu̱ Zhinkir ɓaanu gwaanji tu̱k.

³ Ku̱ mu̱nkir ndu̱ qaandi memu̱nar na viki she Magham Zhinerem ndu̱ Yesu Masiya kha gha su̱yen ndu̱ tunu.

Bulus a Kuna Magham

⁴ Nga kuna Magham aakochi ku̱me mu̱nkir nu̱ vu̱rki ye nu nu̱ ku̱nshe Masiya Yesu.

⁵ Jiwa tun gu̱naran mbe nda nu̱ ku̱nshe ɓalar ɓaanu ndu̱ zu̱ndi nun shiki kap,

⁶ leendang tun wa na zhire ɓu̱ ɗyiku nyem saidaki ye nu ɗyine Masiyang mbe nu.

⁷ Ku̱me nang, nun laada gwa aa nyi barka sarchi nu̱ke tun zu̱ki yitonu tun a bu gaɓti ɓu̱ Zhinerem gwaanji Yesu Masiya ɓa.

⁸ Ka sa tun kha ndu̱ du̱mbu̱r tu̱k ma yir ye lauɗar san, ma ku̱ kha nu waare zop ye fu̱ɗar nu̱ke Zhinerem gwaanji Yesu Masiya kaɗa gaɓki.

⁹ Magham ɗya nu̱ nyedli alqawar, yang chin qaki nu ma ku̱ shi nu khar mu̱nkandi su̱yen ndu̱ Yi ɓaran Yesu Masiya Zhinerem gwaanji.

Shakhti Ɗyin nu̱ke a Chele Tabar ɓu̱ nu̱ Mbu Yesu ku nu̱ Koranti

¹⁰ Nga khutonu, nyeezaku, ku̱me Zhinerem gwaanji Yesu Masiya, tu̱ ɓalar ɓaanu kha da. Ku̱ ɗyinonu kha shakhtan ɓa, tun gonta ɗyinonu ye maa da, tu̱ ɗyi nun ku̱rki ndu̱ kwaari ɓaanu kha da.

¹¹ Nyeezaku, nga gwa labaran she nduki nu̱ mbu̱ rafti ɓu̱ Kuluwi, za keele wa gang chele ɓaanu.

¹² Ma nu̱ke meenu nu̱ kha da ɓa, njif nang tu̱ ka zu̱ za, “Ɓang nga mbukya Bulus.” Tu̱ njif naandang zu̱ za, “Nga ɓu̱ Apolos”; tu̱ njif nggur zu̱ za, “Ɓang Kefas ke ɓanga” yang ɓu̱ njif nggur za, “Nga mbukya Masiya.”

¹³ Yang ɓa, bu zham nga nu, Masiya shakhtan mu? Bulus mu̱t ɗyin qu̱far kaatli ku̱me tun kochiya? Nduk a nje nu̱ shiki baptisme ye nu mbu̱ dlu̱m Bulus mu?

¹⁴ Nga kuna Magham nu̱ke nang shi baptisme ye aaki chele ɓaanu ɓa, kope Ku̱rispus ndu̱ Gayus.

¹⁵ Ku̱me nang nduk a nje nu̱ke ka zu̱ki za wa shi baptisme yenda mbu̱ dlu̱ma ɓa.

¹⁶ (Ai, nga kor tu̱k nu̱ ɗyine nga shi baptisme ye nduki nu̱ nu̱ mbu̱ rafti ɓu̱ Fanus; qu̱rse nang, nang kor mbu̱ ke nga shi baptisme ye njif nggur tu̱k ɓa.)

¹⁷ Ai, Masiya nu̱ ɗa ru̱kti nga ma baptisma ɓa, a ru̱kti nga ma wopa Labar Mbarkandang waare boote ndu̱ shaandi ɓu̱ nduku, ma ku̱ nduk mbu̱t nar zhaaji ɓu̱ mu̱ti nu̱ Yesu shiki ɗyine qu̱far kaatlang ɓa.

Masiya ɗya Zalale ɓu̱ Magham ndu̱ Kaɗari ɓaran

¹⁸ Labar mu̱ti ɓu̱ Yesu ɗyin qu̱far kaatlang ɗya ɓalar bamndi she nduki nu̱ saghaki, yang she rem, chem nyem ɗanaki, labar mu̱ti ɓu̱ Yesu ɗyin qu̱far kaatli ɗya zalale ɓu̱ Magham.

¹⁹ Ku̱me a nje bu̱laran ɗo za: “Ngga su̱bu̱r kaɗari ɓu̱ nduki nu̱ tamanki za wor nu̱ kaɗari. Ngga lukhsha ghu̱rti ɓu̱ nduki nu̱ tamanki za wor ghu̱rtan.”

²⁰ Yang ɗo, a fu̱n nu̱ kaɗarikwang na? A fu̱n nu̱ shogar Bibiti ɓu̱ Musa ɓara na? A fu̱n nduki nu̱ tamanki ku za wor wa zu̱n aa nu̱m ndu̱ aanu̱mang na? Ai Magham wa wut za ghu̱rti ɓu̱ nu̱ shaandiku nu̱ mbu̱ larji nang ɗya me nggu̱bu̱ng.

²¹ Jiwa Magham mbe kaɗari ɓaran wa sa tu̱ nduki nu̱ larji ku̱na zu̱ndi nda nu̱ ku̱nshe kaɗari ɓaanda. Me ɓu̱ nang, tu̱ dat ku̱ ɗana nji nduki nu̱ maitaki nda nu̱ ku̱nshe Labar mbarkandi nyem wopaki nu̱ke a naran ku wa ɗya me nggu̱bu̱ngang.

²² Yakhudeku a gang ɗye lazham ma nanda nu̱ si, Kheleneku a laɓkya kaɗari.

²³ Yang ɓaarem chem a wopakya labar ɓu̱ Masiya nu̱ mu̱tki me qu̱far kaatli, ɗyi nu̱ khaki ma ɗye ji sar ye Yakhudeku, tu̱ nduki nu̱ke ɗya Yakhudeku ɓa da ku ma me nggu̱bu̱ng.

²⁴ Yang she nduki nu̱ Magham qaki wora aa ɗya Yakhudeku aa nduki nu̱ke ɗya Yakhudeku ɓa, Masiya ke zalale ɓu̱ Magham ndu̱ kaɗari ɓaran.

²⁵ Jiwa ɗyi nu̱ Magham shiki kap, tu̱ yang nduk na wa ɗya me nggu̱bu̱ng wa duk ghu̱rti ɓu̱ nduku, yang tu̱k ɗyi nu̱ shiki tu̱ kha wa ɗya ɗyi katakandi wa duk du̱mbu̱r ɓu̱ nduku.

²⁶ Nyeezaku, nggu̱t ma ɗyi nu̱ke tun a mban sarchi nu̱ Magham qaki nu ɓa. Khang chele ɓaanu ɗya nduki nu̱ke nduki daki wor ma nggu̱bu̱ng, nu̱ kwaaɗarku nu̱ chele ɓaanu tun nun maitaki khang ɓa, yang tun qusonggi ɓu̱ nduk kudaandi zum ɓa.

²⁷ Magham wa dat ɗyiku nu̱ nduk tamanki za ɗya me nggu̱bu̱ng ma ku̱ nu̱ ghu̱rti ku nu̱ larji tu̱k kawa. Tu̱ dat ɗyiku nu̱ nduki naki wa du̱mbu̱r ɓaanda kata ma ku̱ nu̱ du̱mbu̱r ku tu̱k kawa.

²⁸ Ɗyiku nu̱ mbu̱ larji nu̱ nduki ndu̱mki, tu̱ na wa zhaaji ɓaanda kata, tu̱ na boota su̱ ɓa yang ɗya aa nu̱m ɓa, nang ke ɗyiku nu̱ke Magham datki a boote si ma ku̱ gu̱ɗa ɗyi nu̱ naki wa boota sang.

²⁹ Magham shi wanang ma ku̱ aaki shi wakhti gume nda ɓa.

³⁰ Magham saki ku̱ khanu nu̱ mbe Masiya Yesu, chin saki tu̱ Masiya kha chin ke kaɗari ɓaarem. Chem gwa dlu̱r she Magham, chem kha ma nduki ɓaran wakakandi chem lawa me khar maavi ɓu̱ sola nu̱ ku̱nshe nda.

³¹ Yang ɗo, ba wa nu̱ke a nje bu̱laranang, “Njif nu̱ke a ma wakhti mbe ɗyi ngguri, ku̱ shi wakhtang mbe ɗyi nu̱ Zhinerem gwaanji shiki.”