1 Biturus 5 - Mewar Alqawarang

Khutlo ma Shapir ɓu̱ Masiya

¹ Ma yir she ku̱mandiku nu̱ chele ɓaanu, nga khutonu ma nu̱ke nga ku̱maandi nduk wa tunu nga nang naki bonye nu̱ Masiya zaki ndu̱ yita, yang tu̱k nga gwa zhaaji nu̱ke ka ɓa ɗatlki ye dalangi.

² Khutlo ma shapir ɓu̱ Magham nu̱ vu̱rki nggu̱tan ye nu tun a tlu̱nar wa dlegumeku. Na nu wa a shikya ranna nu ɓa, ku̱ memu̱na nu da ye nu tun shi ba wa nu̱ke Magham a shimndan. Shi nu tlu̱nar nang ku̱me mu̱zhin ɓa, shi ma ku̱me memu̱na nu wa da ye nu ku̱ shi nu tlu̱narang.

³ Ku̱ kha nu ma nduki nu̱ke a shim wut zalale ɗyine nduki nu̱ke Magham vu̱rki ye nu ɓa, tun kha ma nduki nu̱ke shapirang ka shimki shoga tun khanu.

⁴ Mbu̱ tun wa shi wanang, ye fu̱ɗar nu̱ke Masiya chin Gorkir Nu̱ khutlorang ka ɗa ɓa ki, ka vu̱r ɗye zhar nu̱ zhaaji ye nu nu̱ke ɗyiman nu̱ka shi vi ɓar ɓa.

⁵ Wanang tu̱k tun nyakhtlirku, mbu ma zu̱r ɓu̱ nduki nu̱ke a guma ye nu kap ɓaanu. Wut ma katar ɗyin ye yen, jiwa a nje bu̱laran za, “Magham wa zhang nu̱ gwaari ɗyin, yang wa ka shi mu̱nkir ye nu katar ɗyin.”

⁶ Ku̱me nang kata ma ɗyinonu nu̱ gha mbu̱ khar Magham nu̱ zalale aa nu̱m kap, ma ku̱ vu̱r zhaaji ye nu ye sarchi nu̱ shimki.

⁷ Sa ma damtar ɓaanu nu̱ mbu̱ kharan, ku̱me wa damta ndu̱ tunu.

⁸ Ku̱s ma vaanu ye yen, tun kha daasaran. Wonji nu̱ zhangndi ɓaanu Sheɗan a paɗari, a quri wa mu̱zamndi, a laɓ njif nu̱ke chin ka njerki nu̱ gha ma njiiran.

⁹ Ngga nu dalang yenda ɓa. Ching ma gha shaanggu̱ɗang mbe maito ɓaanu, nu̱ke tun wa zu̱n nu̱ ɗyine nyeezonu nu̱ mbu Yesu nu̱ke a aa fu̱n mbu̱ larji nang, a za bonye nang wa nu̱ke tun a zaran.

¹⁰ Qu̱rse tun wa za bonye nang me sarchi koɗomma, Magham nu̱ mu̱nkir kap, chin nu̱ qaki nu ma gwa nu zhaaji su̱yen ndu̱ chin koɗokhsi ɓa mbe Masiya. Ka gaɓ ndu̱ tun tun kha nyeedlan, ka pa du̱mbu̱r ye nu tun ching gha shanggu̱ɗang.

¹¹ Ku̱ kwaaɗar kha nda koɗokhsi ɓa. Amin.

Lauɗarsi Zoɓar Qaandi

¹² Nga bu̱la lagarkati koɗommandi nang ye nu ndu̱ shaatar ɓu̱ Sila, nu̱ke nga da nda ɗya khachinkir maitokandi yang nga na wa khu̱l ku̱ qa nga nda nu̱ shir zhire. Nga pa du̱mbu̱r ye nu, wut nga yenu nang ke mu̱nkir ɓu̱ Magham zhirekandi. Ku̱me nang ching man mbe mu̱nkir ɓu̱ Magham nang ndu̱ du̱mbu̱r.

¹³ Tabar ɓu̱ nu̱ mbu Yesu ku nu̱ke a fan Babilon, wor nu̱ Magham datki ba wa nu̱ datki nu, a qaandi ye nu ku. Woi ɓang Markus, a qaandi ye nu tu̱k.

¹⁴ Shi ma qaandi ye yen ndu̱ khaapar wuti ndola. Ku̱ qaandi memu̱na kha gha su̱yen ndu̱ tun kap, tun nu̱ke a mbe Masiya.