1 Biturus 4 - Mewar Alqawarang

Khar Viti ɓu̱ nu̱ Mbu Masiya

¹ Nu̱ke Masiya wa za bonye mbu̱ man va, da ma ɗyin saaran tu̱k. Ai, kap njif nu̱ zaki bonye mbu̱ man va, wa shakh ndu̱ tlu̱nar sola.

² Ku̱me nang khar ɓaran mbu̱ man va, ɗyi nu̱ke ka shiki zalale ndu̱ chin, ɗya shimndi ɓu̱ Magham, ɓu̱ mbu shimndi ɓu̱ manva ɓa.

³ Jiwa tun wa woɗa su̱bu̱r sarchi mbe khar ɓaanu ɗau fara, nang ke pooni khar nu̱ke nduki nu̱ke nu̱ zu̱n Magham ɓa a tu̱k mu̱ndan. Tu̱ na aa nyi ɗye shir malkandi, ndu̱ melakh ɓu̱ man var ku zum zum, ndu̱ me kuyari, ndu̱ nggar zu̱mndi bamndi, ndu̱ zar ɗyiku bam bam, ndu̱ ghaari ghai ye mu̱lu̱mku, nu̱ khaki ma ɗye zhaana.

⁴ Leendang yang raptonu ku nu̱ zhu a lazham gontar ɗyin nun zhangki shiran gha ndu̱ wor ma shi ɗyi malkandi ku nun ka shiki zhu ndu̱ wora, a shipiti pu̱zi ye nu ku.

⁵ Yang Magham daasaran ma ku̱ kuma nu̱ nyifi ku ndu̱ nduki nu̱ mu̱tki. Ka shiga su̱ ɗyi nu̱ wor shiki gume nda.

⁶ Nang ke ɗyi nu̱ saki tu̱ wopa Labar Mbarkandang kap nu̱ nduki nu̱ke leendang mu̱tanku, ku̱me ka kuma wora ba wa nduki mbu̱ man va, yang she Magham a nje nu̱ nyifiriku mbe jiimba.

⁷ Lauɗarsi aa nu̱m wa shi bing. Ku̱me nang shi ma nggu̱ti mbari, tun ku̱r vaanu. Ku̱me ku̱ ɗu̱ma nu tun shi barari.

⁸ Guma ndu̱ aa nu̱m, ndola ma yen ndu̱ memu̱na nu da. Ku̱me ndola wa ka lu̱pa ɗyin zop khangndi.

⁹ Qu̱n ma me vi ɓaanu ye yen, ruru su̱ ɓa.

¹⁰ Ku̱ aaki shi boote ndu̱ vu̱rti nu̱ Magham shiki yenda ma shaata yen, ma ku̱ kha nu ma nu̱ du̱ngndi ɗyiku zum zum nu̱ Magham vu̱rki du̱ngdan ye nu mbe mu̱nkir ɓaran.

¹¹ Njif nu̱ke vu̱rti ɓaran ɗya nu̱ waazu, ku̱ shi waazwang wa Magham ndu̱ ɗyinan kya ɓalarang nu̱ ku̱nshe nda. Mbu̱ yang vu̱rti ɓaran ɗya nu̱ tlu̱nar ye nduku, ku̱ ki tlu̱nar nang ndu̱ du̱mbu̱r nu̱ Magham vu̱rki yenda kap. Shi ma wanang ma ku̱ vu̱r nu gorkir ye Magham nu̱ ku̱nshe Yesu Masiya. Zhaaji ndu̱ kwaaɗar ɗya ɓaran koɗokhsi ɓa. Amin.

Zar Bonye ku̱me Mburi Yesu

¹² Nyeeza nu̱ke nga ndolaran, shi nu lazham ku̱me bonyeku gu̱rgu̱rndi nu̱ke a gwa nu ma buuro nu ɓa. Ku̱ da nu za ɗya ɗyi mewakandi kya gwa nu ɓa.

¹³ Me ɓu̱ nang, shi ma kasha ma nu̱ke tun a zakya bonye nu̱ Masiya zaki, ma ku̱ ɓa shi nu ɓong memu̱na ndu̱ kashar nu̱ke koɗokhsi ɓa ye sarchi nu̱ke a ma wut zhaaji ɓaran.

¹⁴ Aa pu̱zo nu ku̱me dlu̱m Masiya, ai, tun nu̱ barka, ku̱me Jiimbi nu̱ zhaaji, Jiimbi ɓu̱ Magham kharan su̱yen ndu̱ tunu.

¹⁵ Yang nggu̱t ma mbari, ma ku̱ nduk za bonye ku̱me ɗya nu̱ tlaghar mu̱ɗ ɓa, yang nu̱ muuru ɓa, yang nu̱ shir ɗyi malkandi ɓa, yang nu̱ yirti maa ɓa.

¹⁶ Mbu̱ yang nduk wa za bonye ku̱me Ku̱rista, ku̱ tu̱k kawaran ɓa, ku̱ gor dlu̱m Magham ku̱me wa da nda nu̱ mbu̱ nu̱ mbu Masiya.

¹⁷ Jiwa sarchi kumar nduki a ɓa. Yang ka nggaasan ndu̱ nduki ɓu̱ Magham. Mbu̱ yang ka nggaasi kumarang ndu̱ chem, ɓu̱ nduki nu̱ zhangki tu̱k Labar mbarkandi na viki she Magham ɗa ka kha kikimndana?

¹⁸ Ba wa nu̱ke a nje bu̱laran za, “Mbu̱ yang nduki nu̱ dambu ka gwa ɗana var wor gu̱rgu̱r, ɓu̱ nduki nu̱ song dambu ndu̱ nu̱ solarku ɗa?”

¹⁹ Ku̱me nang, nduki nu̱ke a za bonye mbu̱ shimndi ɓu̱ Magham, ku̱ sa nyifi ɓaanda nu̱ mbu̱ khar Magham nu̱ zhire nu̱ du̱ngki wora, kom ku̱ zu̱m guma ku nu̱ shir mbarki.