1 Biturus 3 - Mewar Alqawarang

Khar Ɓu̱ri

¹ Tun nusuku ɓu̱rkandi vu̱r ma ɗyinonu ye zhimenu. Ku̱me mbu̱ khuzuku nggur chele ɓaanda nu̱ maita ɓalar ɓu̱ Magham ɓa, bai nu̱ ku̱nshe ɗye shir mbarkandiku ɓu̱ nusuki ɓaanda ka nggot ku, aa nduk a nje nu̱ shiki ɓala ye wor ɓa.

² Khuzuku nu̱ke nu̱ maita ɓa ndang ka na ɗye shir ɓaanu mbarkandi ndu̱ mburi zu̱r ɓaanda nu̱ke tun a shiran, tu̱ nggoɗ ku.

³ Ku̱ khar mbari ɓaanu khan ɗyine viri nun ka shiki ɗyenda ɓa, wa dlebti nun ka shiki, ndu̱ ɗye ginarweku, ndu̱ ɗye sarku nu̱ me mu̱zhindi.

⁴ Me ɓu̱ nang ku̱ viri ɓaanu kha ma viri nu̱ke a memu̱na nu, chin ke viri nu̱ ɓu̱tokh memu̱na ndu̱ ku̱si ɗyin, nu̱ke nu̱ka shi vi ɓar ɓa, yang ɗya ɗye zhaaji maɗyikandi she Magham.

⁵ Jiwa nang ke pooni viri nu̱ke nusuku nu̱ sawar Magham nu̱ saki memu̱na wor nu̱ ɗyine nda shiki ku zhu. Wa ka mbu zu̱r ɓu̱ zhime wora,

⁶ wa nu̱ Saratu mbuki zu̱r ɓu̱ zhimen Yibram, tu̱ ka qa nda za zhinkir ɓaran gwaanji. Yang tun qusonggi ɓaran zhirekandi mbu̱ tun wa shi tlu̱nar mbarkandi, nun tu̱k sawa ɓa.

⁷ Wanang tu̱k tun khuzuku, tun shi khar ɓaanu ndu̱ nusuku ɓaanu ndu̱ kwaari. Vu̱r ma gorkir ye wora, nu̱ke du̱mbu̱ran ku wa tun ɓa. Jiwa tun ndu̱ nusuku ɓaanu kap, tun dlu̱ mu̱nkir gwaanji nu̱ nyifiri ɓu̱ Magham su̱yen. Shi ma wanang ma ku̱ ɗyi nggur nggu̱tl barar ɓaanu gwar dlu̱r ɓa.

Zar Bonye ku̱me Tlu̱nar Dambu

⁸ Ye lauɗar san, gonta ma ɗyinonu ye maa da tu̱ kwaari ɓaanu kha da. Tun a na zhiyaye ɓu̱ yen, tun a ndola yen wa khachinkirku, tun a shaata yen gwaari ɗyin su̱ ɓa.

⁹ Ku̱ dli nu mu̱na ndu̱ mu̱na ɓa, yang ku̱ dli nu pu̱zi ndu̱ pu̱zi zum ɓa, dli ma gaɗe pu̱zang ndu̱ sar barke. Ai, Magham qa nu ma pooni ɗyiku nang, ma ku̱ gwa nu ɗye mbu̱ ge barke.

¹⁰ A nje bu̱laran za, “Njif nu̱ke a shim ku̱ tu̱k nji mu̱ndi khar viti ɓaran ndu̱ na nji qaandi virkirku mbarkandi, ku̱ ku̱s ghiindan nu̱gha ma ku̱ shi mu̱na ɓa, tu̱ ku̱s men ndu̱ zu̱r wollo.

¹¹ Ku̱ shakh ɗyinan ndu̱ mu̱na, tu̱ shi mbarkiri, tu̱ laɓ qaandi memu̱na tu̱ wuta gwaran.

¹² Jiwa yiti Zhinkir gwaanji a ɗyine nduki nu̱ke a tlu̱na dambi, dlu̱mndan wa ka tu̱k barar ɓaanda. Yang yiti Zhinkir gwaanji wa zhang nu̱ tlu̱nar mu̱nar ku.”

¹³ Yang mbu̱ tun a sa ɗyinonu ma tlu̱nar ɗyi nu̱ke mbarkandi, ki ka ɗu̱maki shi ɗyi nggur ye nwa?

¹⁴ Mbu̱ yang tun ka za bonye ku̱me shir ɗyi nu̱ke torop, barkya ve nu. Ku̱me nang “Tu̱k nu sawar ɓu̱ ɗyiku nu̱ke a sawaran ku ɓa, yang ku̱ damta nu ndu̱ wor zum ɓa.”

¹⁵ Yang mbu̱ memu̱nanu da ma Masiya tu̱ kha ma Zhinonu gwaanji. Kha ma daasaran aakochi ma tlogha nu ye nu̱ zhamndonu ɗyi nu̱ saki tun sa memu̱na nu ye mbu Masiya. Yang shi ma nang ndu̱ ɓu̱tokh memu̱na ndu̱ vu̱rti gorkiri.

¹⁶ Wanang tu̱k, shi ma aa nu̱m aakochi ndu̱ memu̱nar zhirekandi ku̱me mbu̱ wa zu̱ ɗyi malkandi nu̱ ɗyine nu, nduki nu̱ zu̱kyang ka tu̱k kawa ku̱me ɗye shir mbarkandi ɓaanu mbe Masiya.

¹⁷ Jiwa wa duk ndu̱ mbaari, mbu̱ Magham daasaki ma ku̱ za nu bonye ɗyine tlu̱nar mbarkandi me ɓu̱ shir ɗyi galkandi.

¹⁸ Jiwa Masiya mu̱t ku̱me solar ku sar kaada ye kharki, nu̱ dambi ku̱me nu̱ song dambi, ma ku̱ ɗu̱ ndu̱ tun she Magham. Wa tlagha nda nu̱ gha mbu̱ man va, yang wa vu̱r nyifi yenda mbu̱ jiimba,

¹⁹ tu̱ ɗu̱ she jiimbiku nu̱ke a mbu̱ zhaaru̱m mbu̱ jiimba, tu̱ shi waazu ye wora.

²⁰ Nang ke jiimbiku nu̱ mbu̱ zhaaru̱m nu̱ zhangki mbu zu̱r ɓu̱ Magham gha zhu ye sarchi ɓu̱ Nukhu. Aa nu̱ke Magham wa shi kaɗanyi ye sarchi nu̱ke Nukhu a khu̱ɓ du̱mbu̱lang. Ba nduki koɗom ɗanaki mbu̱ du̱mbu̱lang ye sarchi ni, nduki miyasi lawaki mbe ɗyimang.

²¹ Yang ɗyim nang a khar wa baptisme nu̱ka ɗanaki nu. Tun yang tun wa gwa ɗanar nu̱ ku̱nshe ɗyim baptismyang. Yang ɗanar nyem gwaki nang chem gwa ku̱me shiɓti ru̱gnar ɓar ve vaarem ɓa. Chem gwa ɗanarang ku̱me alqawar chele ɓaarem nu̱ Magham ndu̱ memu̱nar mbarkandi, kom ndu̱ jiiri ɓu̱ Yesu Masiya ɓar mbe mu̱ti.

²² Masiya wa ɗu̱ viɗi. A nje ɗyin bu̱n zu̱ma ɓu̱ Magham, ye maa nu̱ saki nu̱ ru̱ktiku ɓu̱ Magham, ndu̱ nu̱ kwaaɗarku, ndu̱ nu̱ zalaleku nu̱ mbu̱ bu̱nan.