1 Biturus 2 - Mewar Alqawarang

Tun ke Nduki Wakakandi ɓu̱ Magham

¹ Ku̱me nang shakh ma ɗyinonu ndu̱ aa nyi maatli khali, ndu̱ wollo, ndu̱ mu̱na ndu̱ zhiri, ndu̱ aa nyi pu̱ziku bam bam.

² Me ɓu̱ nang tun kha wa ɓeelar qusonggi nu̱ke a kasha zar ɓiɓi me ɗyinan, tun kasha ɓalar ɓu̱ Magham wanang ma ku̱ gor nu tun khu̱l ye gwar ɗanari,

³ nu̱ke leendang tun wa woɗa dar mu̱ndi ɓu̱ Zhinkir gwaanji.

⁴ Wa nu na ɓa ki she nda ndogdi nu̱ nyifiri nu̱ nduki zhangki gha, yang Magham wa daato nu tu̱ vu̱r zhaaji ye nu.

⁵ Tun yang, gaɓ wa ndogdiku nu̱ nyifiri nu̱ka shiki boote ndu̱ wor ma du̱n rafti nu̱ jiimba. Ma ku̱ kha ma tabar ɓu̱ kuruku shakhshakhndi ɓu̱ rafti nang, tun a zoɓa sadke nu̱ jiimba nu̱ ku̱nshe Yesu Masiya, nang ke pooni sadke nu̱ke Magham a shimndan.

⁶ Jiwa a nje bu̱laran mbu̱ bu̱lar Ɓalar ɓu̱ Magham za, “Wonji, nga du̱ng ndogdi gha Sikhiyona ndogdi ngginggeetli datkandi nu̱ zhaaji. Yang njif nu̱ dlaki varan nu̱ ve nda, ɗye kawa ɓu̱ gwa nda sar da ɓa.”

⁷ Ɗyen ɗya zhire she nu, tun nun dlaki vaanu nu̱ ve nda, ndogdi nang zhaaji si. Yang ɓu̱ nduki nu̱ zhangki maita nda gha, “Ndogdi ni nu̱ du̱ndikwang zhangki gha, wa kha ma ndogdi ngginggeetli nu̱ dukki ndu̱ boote.”

⁸ Yang a nje bu̱laran tu̱k za, “Ɗya ndogdi ji sar, ɗya ndogdi nu̱ka ɓa ki ndu̱ nggu̱di ɓu̱ nduk tu̱k!” Nduki ji saari worang ku̱me wa zhang mbu ɓalar ɓu̱ Magham gha. Yang daasa ye wor ma wanang.

⁹ Yang ɓaanu, tun nduki nu̱ Magham datki ndu̱ varan tun tabar ɓu̱ kuruku ɓu̱ Kuji gwaanji. Tun dlar ghai shakhshakhndi tun nduki ɓu̱ Magham ma ku̱ wopa nu khamndiku ɓaran chin nu̱ qaki nu ɓar mbu̱ zhumi ma yir mbu̱ yarang ɓaran nu̱ke ɗya ɗye lazham.

¹⁰ Ɗau fara, tun ndukiku nu̱ke zhaaji ve nu ɓa, yang leendang tun nduki ɓu̱ Magham. Ɗau fara nun gwa ɗaanar ɓu̱ Magham ɓa, yang leendang tun wa gwa.

Mburi Zu̱r ɓu̱ Dlegumeku

¹¹ Raptaku nu̱ke nga ndolaran, nu̱ke tun a shikya khar runggu mbu̱ larji nang, maa kha nu fan ɓa, nga khutonu, shakh ma ɗyinonu ndu̱ ɗye shir malkandi nu̱ melakh ɓu̱ nduku, ɗye shir nang a wute ndu̱ jiimbonu.

¹² Tun kha ndu̱ ɗye shir mbarkandi chele nduki nu̱ke nu̱ zu̱n Magham ku ɓa. Shir wanang ka sa tu̱ ɓa vu̱r zhaaji ye Magham ye sarchi ɓar ɓaran, ku̱me tlu̱nar ɓaanu mbarkandi, aa nu̱ke wa ka da zhaano ku ɓaanu.

¹³ Ku̱me Zhinkir gwaanji, mbu ma aa nyi nu̱ kwaaɗarku nu̱ke a kwaaɗar ɗyine nduki. Tun mbu zu̱r ɓu̱ Kuji gwaanji, ku̱me a kwaaɗar ɗyine aaki,

¹⁴ aa nggomneku, nu̱ke chin kujirang datki ma ku̱ wu nu̱ zop ku, tu̱ makhta nduki nu̱ shir ɗyi mbarkandi.

¹⁵ Jiwa ɗya shimndi ɓu̱ Magham ku̱ shi nu tlu̱nar mbarkandi gume nduki nu̱ke ghu̱rtan ku ɓa, ma ku̱ za nu me nduki nu̱ke a ɓalar ɗyine nu mbu̱ song zu̱ndi.

¹⁶ Shi ma khar ɓaanu wa nduki nu̱ke ɗya maava ɓa, yang ku̱ gaɓ nu ndu̱ nang tu̱ kha ma njiv shir ɗyi nu̱ke galkandi ɓa. Shi ma khar nu̱ke ka wutki za tun maaviku ɓu̱ Magham.

¹⁷ Vu̱r ma zhaaji ye aaki: Tun ndola nyeezonu nu̱ mbu Yesu, sawa ma Magham, tun vu̱r zhaaji ye kuji gwaanji.

¹⁸ Maaviku, mbu ma zu̱r ɓu̱ zhinonu nu̱ rafa tun vu̱r zhaaji ye wor aa nyi sarchi, tun ka shi nang ye nduki nu̱ka shiki mbarkir ye nu ndu̱ nu̱ ɓu̱tokh memu̱na ɗyenda ɓa, shi ma ye nu̱ dakhla tu̱k.

¹⁹ Ai, njif nu̱ zaki bonye ɗyi nu̱ke nu̱ shi zop mban ɓa, yang za bonyang ku̱me korkya shimndi ɓu̱ Magham, Magham ka shi barke yenda.

²⁰ Mbu̱ yang wa shi kurpi ye nu ku̱me zop nun shiki, a tun wa gu̱n memu̱na nu tun ɓu̱ gwa ɗyi nggur ku̱men ɓa. Yang mbu̱ tun wa shi tlu̱nar mbarkandi, tun za bonye ku̱men, yang tun gu̱n memu̱na nu tu̱k, ɗyi nun shikyang ka kha dlu̱ran she Magham.

²¹ Jiwa Zhinkir gwaanji qa nu ku̱me pooni bonye nang. Masiya wa za bonye ku̱me tun tu̱k. Shir wanang wa njig dulbu yerem ma ku̱ mbu mi ɗyin saaran.

²² “Sar da nu̱ shi zop ɓa, nu̱ shi wollo sar da ɓa.”

²³ Sarchi nu̱ nduki pu̱zki nda, nu̱ nggam ye wor ɓa; Sarchi nu̱ zaki bonye, nu̱ zu̱ za chin ka dli gaɗe ni ɓa. Wa dla varan nu̱ ve Magham nu̱ kumar zhire.

²⁴ Chem shiki sola, yang chin daki solarku ɓaaremang ye ɗyinan sarchi nu̱ katlki nda gha me qu̱fari. Shi wanangang ma ku̱ shakh mi ndu̱ solarku ɓaarem nu̱ ku̱nshe mu̱ti ɓaran, shem khar ɓaarem ndu̱ dambi. Ruɓar nu̱ shiki yenda saki tun shaana.

²⁵ Jiwa tun wa ndu̱ɓangku nu̱ke a ma saghari, yang leendang tun a gaɓ nu̱ she Nu̱ khutloronu, chin nu̱ka Khutloki nyifi ɓaanu.