1 Biturus 1 - Mewar Alqawarang

Zoɓar Qaandi

¹ A vi she Biturus, pude ɓu̱ Yesu Masiya. Ma yir she nduki ɓu̱ Magham nu̱ datki, nu̱ke a khar runggiku mbu̱ larji, lakhtakandi ku mbu̱ ghai Pontus, ndu̱ Galatiya, ndu̱ Kapadokiya, ndu̱ Asiya, ndu̱ Bitiniya.

² Tun ke nduki nu̱ Magham Zhinki datki nu wa nu̱ daasaki, tu̱ gaɓ ndu̱ tun konggol nu̱ ku̱nshe wakar nu̱ Jiimbi shakhshakhndi shiki ye nu. Ɗya shimndi ɓaran ku̱ mbu nu zu̱r ɓu̱ Yesu Masiya, tun gwa boote ni nu̱ Ku̱nshe baatli tom ɓaran. Bu ku̱ Magham boosa nu ndu̱ mu̱nkir ndu̱ qaandi memu̱nari.

Magham wa Vu̱r ɗye Sar Memu̱nari

³ Barke wa kha Magham, Zhin Zhinerem gwaanji Yesu Masiya! Chin tu̱kki zhiyaye ɓaarem maɗyi, tu̱ vu̱r mewar nyifi yerem ndu̱ sar memu̱nar nu̱ nyifiri nu̱ ku̱nshe jiiri ɓu̱ Yesu Masiya ɓar mbe mu̱ti.

⁴ Yang chem a sa memu̱narem ye gwar ɗye mbu̱ ge nu̱ Zhinkir gwaanji du̱ngki gha viɗi ku̱me qusonggi ɓaran. Yang du̱ngdi nang nu̱ka mu̱tl ɓa, nu̱ka shi su̱bu̱r ɓa, yang ɗyiman ɓu̱ vi ɓar ɓa.

⁵ Tun nu̱ke nu̱ ku̱nshe maito ɓaanu zalale ɓu̱ Magham a khutloro nu. A shim ku̱ khu̱l nu ma gwa nu ɗanar nu̱ daasaki, ma ku̱ wuti nda ye dalangi ye lauɗar su̱ qaandi virkirku.

⁶ Mbu̱ ɗyi nang shi ma ɓong memu̱nar maɗyikandi, aa nu̱ke leendang memu̱na nu chit ku̱me buuriku zum zum nu̱ke tun a mban.

⁷ Buuriku nang a ɓa ma buu maito ɓaanu mbu̱ ɗya maito zhirekandi. Nduki ka buu ginarwa ndu̱ ɓai, yang ɗya ɗyi nu̱ka woɗaki. Wanang tu̱k a buu maito ɓaanu nu̱ dukki ginarwa zhaaji. Shir wanangang ka sa tu̱ maito ɓaanu a ɓa ndu̱ makhtar ye nu ndu̱ zhaaji ndu̱ gorkiri ye fu̱ɗar nu̱ke Yesu Masiya ka ɗa gaɓki.

⁸ Aa nu̱ke nun na Masiya Yesu sar da ɓa, yang kap ndu̱ nang tun a ndola nda. Aa nu̱ke tun a na nda leendang ɓa, kap ndu̱ nang tun a maita nda, tun a kashar wa nu̱m gom,

⁹ ku̱me tun a dlu̱kya ɗyi nun saki nu̱ guma mbu̱ maito ɓaanu nang ke gwar ɗanar ɓu̱ nyifi ɓaanu.

¹⁰ Yang viɗ ɗyine gwar ɗanar nang, annabiku nu̱ shiki ɓalar ɓu̱ mu̱nkir nu̱ke ka ɗa ɓa ki ye nu, wa laɓ mban nu̱ gha mbari ndu̱ shaandi.

¹¹ Wa shim ku̱ zu̱n nda sarchi nu̱ke ɗyi nang ka shiki, kom ndu̱ ɗa ka shi kikimndana. Ye sarchi nu̱ Jiimbi ɓu̱ Masiya shiki ɓalar mbu̱ memu̱na wora, a wut bonye nu̱ke Masiya ka zaki kom ndu̱ zhaaji nu̱ke a ma vu̱rtan yenda qu̱rsan.

¹² Magham wa wut ye wor nu̱ ɗyine, sarchi nu̱ke a zu̱ ɓalar ɓu̱ Magham ku, a vu̱r ɓalarang ye wor ku̱me wor ɓa, a vu̱rtan ku̱me tunu. Yang leendang Jiimbi shakhshakhndi nu̱ Magham a ru̱kki viɗi, wa sa tu̱ zu̱ mbu̱ ɗyiku nang ye nu kap mbu̱ Labar mbarkandi ɓu̱ Masiya nu̱ wopaki she nu. Ai, ɗyiku nang aa nu̱ ru̱ktiku ɓu̱ Magham wa kasha ku ma ku̱ zu̱n nda ɗyin mban.

Ɗye Shir nu̱ Shipaki nu̱ Mbu Yesu

¹³ Ku̱me nang tun daasa memu̱na nu ma tlu̱nari, tun ku̱s vaanu yeyen, tun sa memu̱na nun ve mu̱nkir nu̱ke a ma vu̱rtan ye nu ye fu̱ɗar nu̱ke Yesu Masiya ka ɗa gaɓki.

¹⁴ Ye leendang nu̱ke tun wa kha ma qusonggi mbarkandi, ku̱ njig nu ɗyi nun ka kashaki shiran ɗau fara tu̱ da khangkal ɓaanu ɓar ɓa. Sarchi nun ka shiki ɗyiku nang ɗau fara ai tun a shiranang ku̱me song zu̱ni.

¹⁵ Yang nu̱ke Magham nu̱ qaki nu shakhshakh, tun kha shakhshakh tu̱k mbe ɗye shir ɓaanu kap.

¹⁶ A nje bu̱laran za, “Kha ma shakhshakh, ku̱me nga shakhshakh.”

¹⁷ Ma nu̱ke tun wa ka qa Magham “Zhinki” sarchi nu̱ke tun a barari. Ku̱me nang tun shi khar ɓaanu ndu̱ sawa ma ɓar ye sarchi nu̱ke tun ka woɗaki khar runggi nu̱ke tun a shiran mbu̱ larji nang. Ku̱me Magham ɗya nu̱ kuma yang ka kuma tlu̱nar ɓu̱ aa nyi nduku waare shimndi ɗyin.

¹⁸ Jiwa tun wa zu̱n nu̱ ɗyine wa dli ɗyinonu mbe me ghaiku bamndi nu̱ zhikannu njigki ye nu. Nu̱ dli ɗyinonu ndu̱ ɗyiku nu̱ka su̱bu̱rki wa ghuri ndu̱ ginarwe ɓa.

¹⁹ Dli ɗyinonu ndu̱ tom ɓu̱ Masiya nu̱ke zhaaji a si, wa kha wa ye gamndi nu̱ sadke, nu̱ke me chiɓi nje ve nda ɓa yang beeko ɓa.

²⁰ Magham datkya chin me ku̱ du̱ng larji, yang wuti nda ye dalangi ye lauɗar su̱ qaandi virkirku nang ku̱me tunu.

²¹ Tun wa maita Magham nu̱ ku̱nshe nda chin nu̱ jiiki ndu̱ chin ɓar mbe mu̱ti tu̱ vu̱r zhaaji yenda. Ku̱me nang maito ɓaanu ndu̱ sar memu̱nar ɓaanu a mbe Magham.

²² Leendang nu̱ke tun wa kha shiɓtan nu̱ ku̱nshe mburi su̱qur zhire tun a ndola nyeezo nu ndu̱ memu̱na nu da, ndolama yen maɗyi mbu̱ memu̱nanu.

²³ Jiwa tun wa gwa mewar khari. Yang mewar nyifi ɓaanu nang tun gwa she pooni nu̱ke wa ka mu̱t ɓa, tun gwa she pooni nu̱ke nu̱ka shi mu̱t ɓa. Kha nu nu̱ ku̱nshe ɓalar ɓu̱ Magham nu̱ke nyifiri a si yang nu̱ka shi mu̱ti ɓa.

²⁴ Jiwa Ɓalar ɓu̱ Magham wa zu̱ za, “Nduk kap a khar wa wuzu̱ndi, yang zhaaji ɓaanda kap a khar wa viiri ku mbu̱ gaari. Wuzu̱ndi wa ka su, tu̱ viiri ku ku̱ɗba,

²⁵ yang ɓalar ɓu̱ Magham a nje aakochi koɗokh si ɓa.” Ɓalar nang chin ke Labar mbarkandi nu̱ shiki waazu ni ye nu.