Зәбур 96 - Изге Язма

¹ Тантана итсен җир йөзе, куанышсын барлык утраулар: хакимлек Раббы кулында!

² Раббыны болытлар вә караңгылык урап алган; тәхетенең нигезендә хаклык вә гаделлектер.

³ Аның алдыннан ут-ялкын атлап бара, тирә-ягындагы бар дошманны көйдереп.

⁴ Яшененнән бар дөнья балкып яна, һәм тетрәнә бөтен җир йөзе моны күреп.

⁵ Таулар балавыздай эреп ага Раббы алдында, бөтен җир йөзенең Хуҗасы каршында.

⁶ Күкләр сөйли Аның хаклыгы турында, халыклар күрәдер Аның дан-шөһрәтен.

⁷ Оятка калсын сыннарга табынучылар, хур булсыннар потларны данга күтәрүчеләр; Раббы алдында сәҗдә кылсын бар илаһлар!

⁸ И Раббы, гадел хөкемеңне ишетеп куана Сион, Яһүдә шәһәрләре тантана итә.

⁹ Чөнки Син, и Раббы, Бөекләрнең Бөеге җир йөзендә, бар илаһлардан өстен Син!

¹⁰ Әй сезләр, Раббыны сөючеләр, явызлыкка нәфрәт белән карагыз! Үзенә тугрыларның тормышын саклый Раббы, яманнар кулыннан йолып ала;

¹¹ тәкъва җаннарга нурын сирпи, саф йөрәкләргә сөенеч китерә.

¹² Әй тәкъва җаннар, куанычыгыз Раббыда булсын! Аның изге исеменә рәхмәтләр укыгыз!