Зәбур 81 - Изге Язма

¹ Аллаһы, илаһлар җыенының уртасына басып, хөкемен игълан кылды:

² «Кайчангача сез, хаксыз карарлар чыгарып, яманнар мәнфәгатен яклаячаксыз?

³ Юксыл-көчсезнең, ятимнең дәгъвасын яклагыз, мазлумның, фәкыйрьнең хакын даулагыз!

⁴ Юксыл-көчсезне, мескен-бичараны аралап алыгыз, аларны яманнар кулыннан коткарыгыз!

⁵ Аңламыйсыз, төшенмисез сез, караңгыда йөрисез! – Дөньяның нигезләре какшаган!

⁶ Мин әйттем: „Сез – илаһлар, һәммәгез Аллаһы Тәгалә углыдыр.

⁷ Әмма сез, кешеләр кебек, үлемледер, һәрбер хөкемдар кебек югарыдан егылып төшәчәксез!“»

⁸ И Аллаһы, калык! Хөкем ит җир йөзен! Чөнки халыкларның барчасы да Синекедер.