Зәбур 7 - Изге Язма

¹ Беньямин ыругыннан Куш исемле кеше кылган эшләр хакында Давытның Раббыга әйткән кайгы җыры.

² Сиңа сыенамын, и Раббы Аллам! Барлык эзәрлекләүчеләрдән коткар мине, азат ит!

³ Юкса алар мине арысландай ботарлар, өзгәләп ташлар, һәм беркем мине коткармас.

^4-5 И Раббы Аллам! Әгәр мин ялгыш гамәл кылган булсам: кулларымны хаксыз эшкә сузсам, дус кешемә яманлык эшләсәм, дошманыма сәбәпсез явызлык тели калсам,

⁶ шул чакта дошманым мине эзәрлекләсен, куып җитеп җиргә салып таптасын, намусымны туфрак белән бутасын.

⁷ Дәһшәтең белән күтәрел, и Раббы! Дошманнарым фетнәсенә каршы чык! Хөкемеңне оештыр, минем хакка уян!

⁸ Халыклар, килеп, Синең тирәңә җыелсын, һәм Син алар өстеннән югарыга ашып утыр!

⁹ Халыкларны хөкем кыл, Раббы, миңа да хөкемеңне чыгар – тәкъва һәм гаепсез булуымны расла!

¹⁰ Акыл вә күңелләрне сынаучы и гадел Аллаһы! Явызларның явызлыгын туктат, тәкъваларга ныклык бир Син!

¹¹ Аллаһы – минем калканымдыр, пакь, туры күңелләрне яклаучыдыр.

¹² Аллаһы – гадел Хөкемче, көн дә хак карарын чыгаручы.

¹³ Дөрес юлга кайтмаса яманнар, кылычын Аллаһы үткенләп кайрар, ук-җәясен корып куяр.

¹⁴ Аның үлем коралы әзер, утлы булыр атар уклары.

¹⁵ Шулай яман кеше явызлыктан буаз калыр, йөге аның афәт булыр, ул үзенә ялган тудырыр.

¹⁶ Бүтәнгә дип казыган чокырына үзе барып егылыр.

¹⁷ Аның явызлыгы үзенә әйләнеп кайтыр, рәхимсезлеге үз башына төшәр.

¹⁸ Хаклыгы өчен Раббыга рәхмәтләр укыйм, Аллаһы Тәгалә исеменә дан җырлыйм!