Зәбур 25 - Изге Язма

¹ И Раббым, хакымны Үзең хакла, мин бит пакь юлдан йөрдем, икеләнүсез бары Сиңа өмет баглап яшәдем.

² Тикшер мине, Раббым, сынап кара, күңелемдәге уй-ниятләргә бәһа бир!

³ Синең мәрхәмәтең һәрчак күз алдымда, мин Сиңа һәрчак тугрылык саклыймын.

⁴ Ялганчылар янында утырмыйм, монафикъларга ияреп китмим.

⁵ Явызлар җыенына нәфрәт саклыйм, яманнар яныннан урын алмыйм.

^6-7 И Раббым, гаепсез булуымны раслап кулларымны юармын да, Сиңа рәхмәтләр укып, могҗизалы эшләреңне бәян итә-итә мәзбәхеңне әйләнеп чыгармын.

⁸ И Раббым, Мин сөям Синең дан-шөһрәтең тулы, Син яшәгән йортны.

^9-10 Харап итмә җанымны, хәятемне, гөнаһка баткан, уң куллары белән күпләп ришвәт алучы канэчкеч явызлар арасында калдырып.

¹¹ Мин бит пакьлек юлыннан атлаучы – кызган, коткар мине!

¹² Аягым тигез җирдә нык торыр, җыенда мактау-шөкерләрем Раббыга булыр!