Зәбур 149 - Изге Язма

¹ Раббыны данлагыз! Раббы шәрәфенә яңа җыр көйләгез, тугрылары җыенында Аны данлагыз!

² Үзен бар кылган патшаны күңел түрендә тотып куансын Исраил, шатлансын Сион угыллары!

³ Бии-бии Аның исемен данлагыз, шөлдерле барабан кагып, гөсләдә уйнап, Аңа мәдхияләр җырлагыз!

⁴ Чөнки Раббы – Үз халкын хуш күрүче, мазлумнарны коткарып югары күтәрүче.

⁵ Аның тугрылары дан-гыйззәт эчендә тантана итсеннәр, хәтта яткан җирләрендә сөенеп җырласыннар!

⁶ Авызларында – Аллаһыны олуглау сүзе, кулларында исә ике яклы үткен кылыч булсын:

⁷ шулай алар чит кавемнәрдән үч алырлар, ят халыкларга тиешле җәзасын бирерләр,

⁸ патшаларын чылбырлар белән бәйләп-чорнап, түрә-башлыкларының аяк-кулларына тимер зынҗырлар салырлар –

⁹ шул дошманнарына чыгарган хөкемне гамәлгә ашырырлар. Раббының тугрылары өчен бу зур өстенлектер. Раббыны данлагыз!