Зәбур 146 - Изге Язма

¹ Раббыны данлагыз! Аллабызга мәдхияләр җырлау – яхшы эштер! Никадәр ләззәтле вә килешледер Аны мактау!

² Раббы Иерусалимне яңадан төзи, сөрелгән Исраил халкын җыеп ала;

³ яралы күңелләрне савыктыра, аларның яра-җәрәхәтләрен бәйли.

⁴ Йолдызларны хисапта тота Ул, аларның һәркайсына исеме белән дәшә.

⁵ Бөектер Хуҗа-Хакимебез вә бик кодрәтледер, гакылының чиге юктыр!

⁶ Раббы мазлумнарны югары күтәрә, яман бәндәләрне исә түбән төшерә.

⁷ Раббыга рәхмәт җырлары багышлагыз, гөслә кылларын чиртеп, Аллабызга мәдхияләр җырлагыз!

⁸ Улдыр күкләрне болытлар белән каплаучы, җир өстенә яңгырлар яудыручы, тау битләрендә үлән үстерүче.

⁹ Хайваннарга азыкны Ул бирә, җим сораган карга балаларын Ул ашата.

¹⁰ Атның зур көченә дә, кеше аягының йөгереклегенә дә Раббының исе китмәс.

¹¹ Ул фәкать Үзеннән куркучыларга, мәрхәмәтенә өмет баглаучыларга илтифатын күрсәтә.