Зәбур 1 - Изге Язма

Беренче китап

¹ Бәхетледер кеше, яманнар үгете белән йөрмәсә, гөнаһлылар юлына басмаса, мыскыллап көлүчеләр арасында утырмаса!

² Раббы канунында булыр аның ирке, көне-төне өйрәнер шул Канунны.

³ Агымсу ярында үскән агач кебек ул: җимешен үз вакытында бирер, яфраклары шиңмәс-корымас; һәр эшендә уңышка ирешер ул.

⁴ Яманнар андый түгелләр, җилгәреп очырган ашлык чүбе кебек алар.

⁵ Шунлыктан яманнар хөкемдә акланмас, тәкъвалар арасында гөнаһлылар урын тапмас.

⁶ Тәкъваларның юлын Раббы саклый, ә яманнарның юлы һәлакәткә илтә.