Яратылыш 25 - Изге Язма

Ибраһимның башка угыллары. Ибраһимның вафаты

¹ Ибраһим Кытура исемле башка берәүне дә хатынлыкка алган иде.

² Кытурадан Ибраһимның Зимран, Йокшан, Медан, Мидьян, Ишбак, Шуах исемле угыллары туды.

³ Йокшаннан Шеба белән Дедан туды. Дедан ашшурим, летушим һәм леумимнәрнең нәсел атасы булды.

⁴ Мидьяннан Эйфа, Эфер, Ханох, Абида һәм Элдага исемле угыллар тудылар. Боларның һәммәсе – Кытура ягы балаларыдыр.

⁵ Ибраһим үз карамагында булган бар нәрсәне Исхакка тапшырды.

⁶ Ә җарияләреннән туган угылларын Ибраһим бүләкләр биреп бәхилләтте дә, углы Исхактан ераклаштыру өчен, әле үзе исән чагында ук аларны көнчыгыш тарафка, шундагы җирләрдә үзбашларына көн күрергә җибәрде.

⁷ Ибраһим үзе йөз дә җитмеш биш ел яшәде. Аның гомере шул кадәрле иде.

⁸ Ибраһим, тормышта барысын татып-кичереп, олы яшьтә вафат булды һәм үзенең ата-бабалары белән кушылды.

^9-10 Угыллары Исхак белән Исмәгыйль аны хитти Сохар углы Эфроннан Ибраһим үзе сатып алган җирдә – Мәмре каршысындагы Махпела кырында урнашкан мәгарәгә илтеп дәфен кылдылар. Ибраһим белән хатыны Сараның каберләре икесенең дә шундадыр.

¹¹ Ибраһимның вафатыннан соң, Аллаһы аның углы Исхакны мөбарәк кылды. Исхак Беер-Лахай-Роида яши иде.

Исмәгыйльнең нәсел шәҗәрәсе

¹² Сараның асравы мисырлы Һаҗәрдән туган Ибраһим углы Исмәгыйльнең шәҗәрәсе болайдыр.

¹³ Шәҗәрәдә Исмәгыйль угылларының исемнәре: беренче углы Нәбают, аннан соң Кыдар, Адбеил, Мибсам,

¹⁴ Мишма, Думаһ, Мәссә,

¹⁵ Хадад, Тейма, Итур, Нафиш һәм Кыдыма.

¹⁶ Исмәгыйльнең бу унике углы аерым-аерым кабиләләргә баш булып, ул кабиләләр һәм алар тереклек иткән җәйләүләр башлыкларының исемнәре белән аталдылар.

¹⁷ Исмәгыйльнең гомер еллары болайдыр: ул йөз дә утыз җиде яшендә соңгы сулышын алды һәм үзенең ата-бабалары белән кушылды.

¹⁸ Исмәгыйльнең угыллары исә Ашшурга бара торган юл буендагы Хавилә белән Шур җирләре арасында, Мисыр чиге якынында урнашып, кардәшләре белән низаглы мөнәсәбәттә булып тереклек иттеләр.

Ягъкуб һәм Эсау

¹⁹ Ибраһимның углы Исхакның шәҗәрәсе болайдыр: Ибраһим Исхакка ата булды.

²⁰ Паддан-Арамнан арами Бетуилнең кызын, арами Лабанның сеңелесе Рәбиканы хатынлыкка алганда, Исхакка кырык яшь иде.

²¹ Рәбика кысыр булганлыктан, Исхак, үз хатынының сихәтләнүе өчен, Раббыга догалар багышлады. Раббы, аның догасын ишетеп, хатынны сихәтләндерде, һәм Рәбика балага узды.

²² Карынында ике җан иясе тибүен белгәч, Рәбика: – Әгәр алай икән, бу хәлдән миңа ни булыр? – дип, Раббыдан сорарга китте.

²³ Раббы аңа әйтте: «Карыныңда синең ике кавем җаны бар, синнән аерым ике халык туачак. Берсе икенчесеннән көчле булачак, өлкәне кечесенә хезмәт итәчәк».

²⁴ Бала тудырыр көн җиткәч, Рәбика игезәк ике бала тапты.

²⁵ Алдан дөньяга килгәненең бөтен тәне кып-кызыл һәм йонлы тире кебек төк белән капланган иде. Аңа Эсау дип исем куштылар.

²⁶ Аннан соң игезәкнең карындаш икенчесе дөньяга килде. Анысы кулы белән Эсауның тәпиенә ябышып чыккан иде. Шуңа күрә аңа Ягъкуб дип исем куштылар. Игезәк балалары туганда, Исхакка алтмыш яшь тулган иде.

²⁷ Игезәкләр үсеп җитеп, Эсау кыр-дала кешесе, киек-җәнлек аулауда оста сунарчы булды. Ә Ягъкуб чатыр тереклеге белән көн күрүче тыйнак бер адәм иде.

²⁸ Исхак Эсауны яратарак төште, чөнки Эсауның аудан алып кайткан кош итләре бик тәмле була иде. Рәбика исә Ягъкубны якынрак күрде.

²⁹ Беркөнне Ягъкуб аш пешерде, шул чакны кырда ауда йөреп кайткан Эсау килеп керде. Ул бик талчыккан кыяфәттә иде.

³⁰ Ягъкубка: – Миңа шул кызылдан, шул кызыл аштан бераз салып бир әле, бик ачыктым, – диде ул. (Шул сүздән Эсауга Эдом дигән кушамат тагылды.)

³¹ Ягъкуб әйтте: – Иң әүвәл син миңа үзеңнең дөньяга беренче булып туу хокукыңны сат, – диде.

³² – Аһ, үләм! Беренче булып туу хокукының миңа ни хаҗәте бар?! – диде Эсау.

³³ – Алайса, сатам, дип, хәзер үк минем алда ант ит, – диде Ягъкуб. Эсау ант итте һәм үзенең беренче булып туу хокукын шулай Ягъкубка сатып җибәрде.

³⁴ Шуннан соң Ягъкуб Эсауның алдына ясмык ашы белән икмәк китереп куйды. Эсау ашады, эчте дә, торып, чыгып китте. Ана карыныннан беренче булып туу хокукына аның исе дә китмәде.